Showing posts with label درس أصول الفقة. Show all posts
Showing posts with label درس أصول الفقة. Show all posts

Wednesday, April 9, 2008

أبو حنيفة قال : لأ

بسم الله الرحمن الرحيم
ولا تقولوا لما تصف ألسنتكم الكذب هذا حلال وهذا حرام لتفتروا على الله الكذب
إن الذين يفترون على الله الكذب لا يفلحون
صدق الله العظيم
من اجل ذلك : أبو حنيفة قال لا
من اجل ذلك فإن السادة الاحناف - على فكره استاذي اللي درس لي الاصول كان مالكيا..لكن كلما جاء ذكر الاحناف كان يقول " السادة" الاحناف ..فلا ينكر احد فضل علماء الاحناف في الفقة
الاحناف كانوا يتورعون عن اطلاق حكم التحريم على شئ حتى لا يقعوا تحت طائلة الاية السابقة ويكونوا ممن يفترون الكذب على الله فيقولون هذا حرام اى ان الله منع هذا على الناس ..ثم لا يكون حراما فتلك اذن الطامة الكبرى ان يقول الرجل قال الله .. ثم لا يكون إلا مفتريا على الله
وذلك عكس القول بالاباحة لان الاباحة يقين فهي الاصل في الاشياء يقول تعالى : هو الذي خلق لكم ما في الارض جميعا
لذلك يجب ان يكون دليل التحريم قطعيا ويقينيا ..لان حكم الاباحة اليقيني لا يزول إلا بمنع يقيني
لذلك .. قال الاحناف ان دليل التحريم لا يكفي ان يكون جازما وانما يجب ان يكون بدليل قطعي لا شبهة فيه
احنا درسنا قبل كده سويا : ان الحرام هو -طلب الكف عن الفعل طلبا جازما اى على سبيل القطع والحتم والالزم
وان الحرم يأتي بصيغة غالبا هي على وزن : لا تفعل
بس هنا : النص "لا تفعل..كذا" ده دليل وجازم في طلب عدم الفعل ..ولا توجد قرينة تصرفه الى الكراهة قلنا ان فى الحالة دي لا تفعل يكون معناها التحريم
ايه رأيكم لو كان النص " لا تفعل كذا" هذا النص فيه شبهة من حيث الثبوت يعنى مش متأكدين هل هو يقينا من الشرع ولا لا؟
مثال احاديث الاحاد وهي ما رواها عدد يقل عن الجمع المطلوب في التواتر في العصور الثلاثة الاولى عصر الصحابة والتابعين وتابعي التابعين
فقالوا اذا كان النص الناهي عن الفعل مصدره ظني في ثبوته عن رسول الله اي خبر احاد يعني النص فيه شبهة وهى انه يحتمل عدم ثبوته عن النبي ..يبقى النهي هنا ورغم عدم وجودة قرينة تصرفه الى معنى الكراهة ..لكن لا يكون حراما زى ما بيعتبره جمهور الفقهاء ولكن يكون مكروه كراهة تحريمية
اذن ..ونركز شوية مع بعض
الحرام عند الاحناف هو : طلب الترك او الكف عن الفعل طلبا جازما اي حتما بدليل قطعي
المكروه كراهة تحريم عند الاحناف : هو طلب الترك او الكف عن الفعل طلبا جازما اى حتما ولكن ..بدليل ظني فيه شبهة
مثال المكروه كراهة تحريم عند الاحناف : لبس الحرير والتختم بالذهب للرجال
النصوص الواردة بتحريم الحرير والذهب على الرجال وردت في صحيح البخاري ومسلم ..ولكن الاحناف لا يجرؤن على القول بتحريم شئ بدليل احاد ظني الثبوت ..لان الحكم بصحة الحديث ولو من خبير مدقق مثل البخاري لا يجعله فى حكم الحديث المتواتر لان هذا التدقيق والتصحيح لا يعدوا إلا ان يكون عملا اجتهاديا لا ينقل الخبر الى درجة القطع اليقيني بثبوته عن رسول الله ..لذلك لا يكفي للاحتجاج بخبر الاحاد عند الاحناف ان يكون صحيحا ولكن وضع له شروط وكذلك فعل المالكية ووضعوا شرطا واحدا هو عدم مخالفة حديث الاحاد لما يعمله اهل المدينة ..ما عدا الشافعية والحنابلة فالحديث الصحيح عندهما حجة تثبت به الاحكام دون شروط
كما ان القول بالكراهة التحريمية خالف فيها الاحناف جمهور الفقهاء الذين يساوون بين الحرام والمكروه كراهة تحريم ..اما كراهة التنزيه عند الاحناف فهي نفسها الكراهة عند جمهور الفقهاء كما سبق وبيناها
كذلك الفرق بين الفرض والواجب عند الاحناف
هو فرق في دليل طلب الفعل
فاذا كان الدليل اي النص " أفعل "قطعيا كان فرضا
واذا كان الدليل "أفعل" ظني فيه شبهة فأنه يكون واجبا
..والواجب بمعنى الفرض عن جمهور الفقهاء
وترتب على ذلك عند الاحناف : ان ترك فرض في عبادة يبطل العبادة اما ترك واجب فلا يبطلها
مثال الوقوف بعرفة فرض تركه يبطل الحج
السعي بين الصفا والمروة واجب تركه لا يبطل الحج عند الاحناف
بناء عليه
منكر الفرض منكر معلوم من الدين بالضرورة يكفر لانه ثبت بدليل قطعي لا شبهة فيه
ومنكر الواجب ليس منكرا لمعلوم من الدين بالضرورة لانه ثبت بدليل فيه شبهة
ولكن عند جمهور الفقهاء منكر الواجب كمنكر الفرض لانهما بمعنى واحد عندهم
وبذلك نكون انتهينا من الحديث عن اقسام الحكم التكليفي الخمسة : الوجوب والندب والكراهة والتحريم والاباحة وعرفنا الفرق بين كراهة التحريم والحرام وبين الفرض والواجب عند الاحناف وجمهور الفقهاء
جزاكم الله خيرا ..ونفعنا بما علمنا وجعله في ميزان عملي وعملكم
نحتسب عند الله اجر السعي فى طلب العلم وفي تيسيره على المسلمين

Friday, April 4, 2008

الدرس الثالث: الفرق بين ..المكــروه والحـــرام


بسم الله الرحمن الرحيم
الله المستعان
انا كبرت الخط اهو علشان محدش يبقى له حجة
نكمل سوا ان شاء الله الدرس التالت من دروس اصول الفقة
زى ما قلنا هنتكلم بأختصار ..علشان نقدر نوصل المعلومه المهمة لاكبر عدد من المشاركين
نتوكل على الله
نربط الاحزمة ..نواصل الانطلاق في رحلتنا الجوية رقم تلاته
فاكرين فى الدرس الاول اتكلمنا في نهايته ازاى افرق بين الواجب والمندوب
لان كلاهما بيأتي بصيغة الامر : أفعل؟

وقلنا فيه قاعدة بتقول الامر يفيد الوجوب ما لم توجد قرينة تصرفه الى مراد اخر
يعنى الندب او الاباحة
هنا ممكن حد ظريف يسأل هو ممكن الامر يبقى معناه الاباحه مش الوجوب او حتى الندب؟
نقول ايوه لان فيه قاعدة شرعية بتقول : الامر بعد الحظر يفيد الاباحه
مثال الحديث : كنت نهيتكم عن زيارة القبور ألا فزوروها
فزيارة القبور مباحة لان الامر بها ورد بعد حظر يعنى كانت ممنوعة
وافكركم بمثل سريع لما قلناه عن التفرقة بين الواجب والمندوب
يقول تعالى : يا ايها الذين امنوا اذا تداينتم بدين الى اجل مسمى : فأكتبوه
الامر فأكتبوه ..قلنا لا يفيد الوجوب او الالزام والحتم ..وانما هو مندوب يعنى غير ملزم او حتمي
والمندوب ما يثاب فاعله ولا يعاقب تاركه
وعرفنا انه مندوب من قرينة ..هى قوله تعالى في نفس الاية : فإن امن بعضكم بعضا فليؤد الذي اؤتمن امانته
يعنى اذا وجدت الامانه فخلاص تكفي الامانه وليؤد الذي اؤتمن امانته
.........
دلوقتى هنتكلم ازاى افرق بين المكروه والحرام؟؟
نذكر الاول بمعنى كلا من المكروه والحرام
المكروه هو : طلب الكف عن الفعل طلب غير جازم يعنى على غير وجة الالزام والحتم
الحرام هو: هو طلب الكف عن الفعل طلب جازم ..يعنى بوجه ملزم او حتمي
الاتنين الصيغة الغالبة او الاشهر لهما هى صيغة النهي : لا تفعل
ولكن الحرام قد يأتي بصيغ اخرى ذكرناها مثل الاجتناب او نفي الحل : لا يحل ..او التوعد بالعقاب
او لفظ التحريم نفسه مثل: حرمت عليكم الميتة ..زى ما وضحنا الدرس السابق
والمكروه يأتي باكثر من صيغة وممكن يأتي بصيغ زي اللى بتيجي في الحرام ..ما عدا لفظ التحريم
لكن تأتي بلفظ كره مثل الحديث : ان الله حرم عقوق الامهات ووأد البنات ومنعا وهات ..
وكره لكم ثلاث قيل وقال وكثرة السؤال واضاعة المال
وبالتالي لازم اعرف ازاى افرق بينهم..لان العبرة هنا بالقرينة التى تصرف المعني المراد من التحريم الى الكراهة

اما عن كيف نفرق بينهم ؟ ..نقول
القاعدة هي : النهي يفيد التحريم ما لم توجد قرينة تصرفه الى مراد اخر
وزى ما قلنا فى الفرق بين الواجب والمندوب ان القرينة نوعين..هنا كمان القرينة نوعين قرينة منصوص عليها وقرينة غير منصوص عليها او تستفاد من خارج النص
نقول مثال
يقول تعالى : يا ايها الذين امنوا لا تسألوا عن اشياء ان تبد لكم تسؤكم
النهى هنا : لا تسألوا ..هل يعنى ان السؤال عن كل ما لم يرد بشأنه حكم شرعي حرام؟؟
الاجابة : النهي في الايه يفيد الكراهة مش التحريم
ليه يا عم الحج مش ده نهي اهو؟؟
ايوه نهي بس فيه قرينة ..والقرينة دى منصوص عليها وهي فى نفس الاية
يقول تعالى : وان تسألوا عنها حين ينزل القرآن تبد لكم . سورة المائدة ايه 101
فلو كان السؤال حرام ..لم يكن مكنش يبقى جائز حين ينزل القرآن
يبقى معنى كده ان السؤال عما لم يرد بشأنه حكم شرعي مكروه .. لكن اذا نزل فيها قرآن او حكم شرعي جاز السؤال عنه
هنا القرينة اللى عرفنا بها ان النهى للكراهة مش التحريم منصوص عليها
دلوقتى هنقول مثال ازاى نفرق بينهم بقرينة غير منصوص عليها ولكن عرفناها من خارج النص
مثال
قال رسول الله صلى الله عليه وسلم : دع ما يريبك الى ما لا يريبك
النهى هنا : دع اى اترك ..ما يريبك ..يعنى ما كان محل شك
النهي ده ..هل يعني ان كل شئ محل شك يبقى حرام ويجب انى اتركه ؟؟
قالوا : لا ..النهي هنا يفيد ان فعل المشكوك فيه مكروه ..وليس حراما
طب عرفنا ازاى انه مكروه مش حرام؟
قلنا لازم تكون فيه قرينة ..والقرينة هنا غير منصوص عليها ..عرفناها من خارج النص وهى قرينة العقل والمنطق
فالشئ المنهي عنه مشكوك فيه ..يعنى مش متأكدين هل هو حرام ..ام حلال
فكما يحتمل الخطأ او الحرمة يحتمل الصواب ايضا او الحل
وراجعوا الدرس الاول فى نهايته هتتذكروا كيف افرق بين الواجب والمندوب؟
................................
استراحة كالعادة علشان تنفعوا الكانتين ..انا سمعت ان فيه ناس مش بتشتري
وفيه ناس بتغالط في الحساب ..شكلي لازم اشد عليكم اكتر من كده
انا عارف ان زميلي ابن حجر كان مدلعكم في الاستراحة
..........................
عدنـــــــــــــــــــــــــــــــــــــــا
ونقول الجرس ضرب .. هنتكلم الدرس القادم عن الفرق بين الفرض والواجب
والفرق بين الكراهة التحريمية والكراهة التنزيهية
انتظرونا ومحدش يزوغ ..هنعمل جدول حضور وانصراف بعد كده وهنكهرب السور ادينى حذرت
ملحوظة : اسيبكم مع الموضوع ده في الاستراحة الدنيا ربيع والجو بديع ..ربنا يستر اعتبروها وجهة نظر

Friday, March 14, 2008

الفرق بين : فرض العين وفرض الكفاية , والحرام لذاته والحرام لغيره؟؟

السلام عليكم ورحمة الله وبركاته
معلش اتأخرت عليكم
انا عارف ان الموضوعات دى مش سهله .. لذلك تم تغيير الخطة الى تقديم موضوعات ميسرة فى اصول الفقه
مش هنقول كل حاجة بالتفصيل هنقول اللى يهمك انت كمسلم انك تعرفه واللى عايز يهتم بالعلم ده يقدر ينزل الكتب من النت او يجتهد بطريقته فى تحصيل هذا العلم العظيم
نبدأ
قلنا تعريف الواجب الدرس السابق وازاى افرق بين الواجب والمندوب لان كلاهما بيأتى بصيغة الامر : أفعل .. وقنا بيكون فيه قرينة منصوص او غير منصوص عليها
ايه نسيتم كده بسرعة ولا ايه؟؟ ..هات العصاية يابن حجر من الفصل اللى جنبنا بسرعة
اليوم هنتكلم عن اقسام الواجب
طبعا الواجب له اقسام كتيره بتختلف حسب الاساس اللى بيتم عليه التقسيم
وسواء كان الواجب موسع او مضيق في وقته ..وسواء كان مخير فيه بين عدة امور زى التخيير فى واجب كفارة اليمين بين الاطعام او الكسوة او عتق رقبه او صيام ثلاثة ايام او غيرمخير ومعين مثل الصلاة ..وسواء كان واجب مقيد بوقت زى صوم رمضان او غير مقيد بوقت زى اداء الكفارات ..او واجب مقدر بمقدار معلوم زى الزكاة او غير مقدر زى النفقة في سبيل الله
فكل هذا واجب يتعين على الفرد المسلم الاتيان به.. وتقريبا كده يعتبر شرحناهم باختصار
لكن المهم تعرف الفرق بين الواجب العينى والواجب الكفائى
او زى ما بنسمع يقولوا : فرض عينى وفرض كفاية ..والفرض بمعنى الواجب عند جمهور الفقهاء
طب ايه اهمية انك تعرف الفرق بينهما ؟؟ علشان تعرف ايه الواجب اللى لازم تعمله بنفسك ..وايه الواجب اللى لو غيرك عمله يبقى انت براءة ومش عليك حاجة؟؟
نقول
الواجب العيني : هو ما طلبه الله من كل فرد من الافراد المكلفين ..المكلف يعنى مسلم بالغ عاقل
مثال : الصلاة الصوم الزكاة الحج , واداء الكفارات زى كفارة اليمين
الواجب الكفائي : هو ما طلبه الله من مجموع المكلفين بحيث لو قام به البعض فانه يسقط عن الباقى - وسمى كفائى لانه يكتفى فيه بقيام البعض بفعله
يعنى ببساطه المسلمين هنا بيكونوا زى " تيم وورك " او " جروب " المجموعه دى مطلوب منها تعمل كذا ..يبقى لو واحد عمل الشئ ده او كلهم مش هتفرق المهم انه يتعمل ..مثال المجموعة دى عليها انها تبنى حائط مثلا ..لو واحد بس بنى الحائط فانه يغنى عن المجموعه ..او لو فى مسابقه فيها مجموعتين لو واحد من المجموعه جاوب النقطه بتحسب للفريق كله
نقول امثله شرعية : رد السلام واجب كفائي او فرض كفاية زى ما اشتهر بين الناس
..تعلم العلوم الشرعية وافتاء المسلمين, تغسيل الميت وتكفينه والصلاة عليه فرض كفاية
طيب ازاى افرق بين واجب العين وواجب الكفاية؟؟ علشان اعرف ايه اللى لو حد عمله ..انا ممكن خلاص ما اعملوشششش؟؟
واجب العين : هوكل امر فرضه الله وجعله حقا لله على العباد ..زى الصلاة والصوم والعبادات جميعا
واجب كفاية : هو ما فرضه الله وجعله حقا للعباد على العباد ..زى رد السلام ده حق ربنا فرضه لصالح العبد اللى ألقى السلام ..وصلاة الجنازة وتشييعها حق ربنا فرضه حق للعبد على العبد المسلم
اهو النوع ده هو اللى لو عمله البعض سقط عن الجميع
..................
كده كفاية علينا اللى عرفناه عن الواجب واظن الدرس يسمع اننا ناخد نتكلم كمان عن الحرام
فاصل ونواصل
اعلان تجارى : مع استراحة الكاشفة اشرب واكسب ..كل خمس مشروبات من الاستراحة عليهم مشروب مجاني عبارة عن كوب واحد ماء
مع تحيات ابو العساقيل
رئيس مجلس الادارة ابو البواحث
...................
عـــــــــــدنــــــــــــــــــــــا
نكمل الدرس
الحــــــــــــــــــــــرام
الحرام هو : طلب الكف عن الفعل طلبا جازما وقاطعا
وده بييجى بصيغة النهى المعروفه : لا تفعل
ولكن قد يأتى باكثر من صيغة اخرى مثل نفي الفعل : لا تقربوا الزنا .. ومثل لفظ الاجتناب : اجتنبوا كثيرا من الظن ..ومثل نفي الحل : لا يحل دم امرئ مسلم إلا بثلاث ... او يأتى بلفظ حرم مثل : حرمت عليكم امهاتكم
وقد يستفاد التحريم من خلال التوعد بالعقاب على الفعل مثال : ومن يقتل مؤمنا متعمدا فجزاؤه جهنم خالدا فيها
انــــــــــواع الحــــــــــــــــرام
حــــــــــــرام لذاتـــــــــــه ... حـــــــــــــــــرام لغيـــــــــــــــره
يعنى ايه الكلام ده : الحرام لذاته هو اللى ربنا حرمه لما فيه من ضرر متعلق بذاته ..يعنى الشئ ده ضرر ..مثل القتل , السرقة , شرب الخمر , اكل الميتة , الزنا , زواج المحارم ..الخ
والحرام لغيره هو : ما حرمه الله لا لذاته ولكن لما يترتب عليه من فعل محرم او ما يقترن به من امر يستلزم تحريمه
يعنى الحرام لغيره نوعين
النوع الاول حرام لغيره يترتب على فعله فعل امر محرم ..مثال النظرالى عورة المرأة يترتب عليه فعل محرم هو النوع الزنا ..الزواج من الاختين او البنت وعمتها او البنت وخالتها ..يترتب عليه فعل محرم هو قطع الارحام
يقول النبي صلى الله عليه وسلم لا تنكح المرأة على عمتها ولا على خالتها ولا على ابنة اخيها ولا على ابنة اختها انكم ان فعلتم ذلك قطعتم ارحامكم
النوع الثاني من الحرام لغيره هو : الحرام بسبب ما يقترن به من امور تستلزم تحريمه
يعنى الفعل نفسه مشروع وجائز ولكن يقترن به او يرتبط به امر يجعله حرام
مثال : الصوم يوم العيد .. صوم التطوع مباح ..ولو كان صوم كفارة فهو واجب ..ولكن اذا اقترن او ارتبط بامر هو انه حصل يوم عيد فقد اصبح حراما
وليه الصوم يوم العيد حرام لان المسلم فى يوم العيد يكون في ضيافة الله وحق على المضيف ان يكرم ضيفه وصوم العبد فى هذا اليوم بمثابة رفض لما يقدمه الله له واعراض عن ضيافته سبحانه وتعالى
مثال اخر : البيع وقت النداء لصلاة الجمعة ..البيع مشروع وحلال ..لكن حصوله وقت النداء للجمعة جعله غير مشروع وحرام لقوله تعالى : اذا نودى للصلاة من يوم الجمعة فاسعوا الى ذكر الله وذروا البيع
طيب ايه النتيجة المترتبه على تقسيم الحرام الى حرام لذاته وحرام لغيره؟؟
قال الفقهاء الحرام لذاته لا يصلح ان يكون محلا للتعاقد ..يعنى لا يجوز ان تبيع او تشترى اللحوم الميته او الزواج بالمحارم او بيع الخمور او الاتفاق على السرقة
اما الحرام لغيره فانه يصلح ان يكون محلا للتعاقد وتترتب عليه اثاره ..يعنى البيع وقت النداء لصلاة الجمعة حرام لغيره ولكنه بيع صحيح يلتزم فيه البائع بتسليم المبيع ويلتزم المشترى بدفع الثمن ..ولكنهما رغم ذلك عليهما إثم البيع وقت النداء للجمعة
الفرق الثانى : ان الحرام لذاته لا يباح إلا عند الضرورة ..مثال اكل الميتة خشية الهلاك جوعا ..او شرب الخمر لازالة الغصة عند الاكل (يعنى ينزل لقمه واقفه فى زوره ومفيش قدامه غير الخمر فيباح له ذلك رخصة من الله ..بس مش يسوق فيها طبعا) ..اما الحرام لغيره فانه يباح عند الحاجة ..والحاجة اخف من الضرورة
مثال : اباحة البيع وقت النداء من يوم الجمعة عند الحاجة إليه ..مثلا بائع فائت من الشارع ومعاه بضاعه انت محتاجها وقت النداء لصلاة الجمعة يباح لك انك تشترى فى هذا الوقت
مثال اخر يجوز للطبيب ان ينظر الى عورة المرأة بقصد العلاج او الولادة عند عدم وجود انثى تجيد مهنة الطب
........
كفاية عليكم كده النهاردة .. علشان لسه فيه طلبه ما دفعوش الرسوووم

Sunday, March 2, 2008

المدرسة فتحت والحضور بالملابس الرسمية

بسم الله الرحمن الرحيم
دار الكاشفة للثقافة الاسلامية
الدرس الاول : الحكم الشرعي
مقدمه
محدش يتخض..كملوا يلا
الحمد لله نقدر نقول فيه صحوة دينية بين الشباب ومن اهم مظاهرها هو حب العلم والمعرفة الدينية
علشان كده هنتعلم سواء بعض الامور المهمه لكل مسلم وهى ازاى نفهم الاحكام الشرعية - علشان نكون على وعي بما نقراه وبما نسمعه
وكيف يستنبط الفقيه والمجتهد الحكم الشرعي ومعرفة الحلال والحرام
الفقيه المجتهد مش بيجتهد كده ويقول ده حلال وده حرام بمزاجه او لمجرد ان قرا كتاب فى السيرة او كتاب فى الاحاديث وانما ده علم له اصول وهو بناء على معرفته بالاصول دى بيجتهد ويستخرج الاحكام
والاصول التى يجتهد فيها الفقيه لمعرفة الاحكام الشرعية هى احدى عشر : القرآن , السنة , الاجماع , القياس , الاستحسان , المصالح المرسلة , الاستصحاب , الذرائع , العرف , قول الصحابي , شرع من قبلنا
وان شاء الله هنبدا سوا كلام مبسط علشان على الاقل يكون عندنا ثقافة فقهية عامة حول اصول الفقة تمكننا من فهم الاحكام الشرعية
كله يربط الحزام , ممنوع التدخين , الطائرة الان تتحرك وتنطلق نحو اول درس توكلنا على الله
يا رب ما نلاقي برج فى وشنا ده احنا غلابه , استرها معانا يا رب علشان خاطر الولايا اللى معانا
الدرس الاول : الحكم الشرعى
نبدأ الاول نقول اصول الفقة يعنى ايه ؟
هو مجموعة القواعد التى يستنبط من خلالها الباحث الاحكام العملية من ادلتها التفصيلية
يعنى ايه الكلام ده : مجموعة القواعد يعنى المبادئ والاصول او الطريقة التى يتبعها الباحث - والاحكام العملية يعنى المتعلق باعمال الناس والحلال والحرام - انما الاحكام العقائدية فدى لا تدخل ضمن نطاق دراسة اصول الفقه - من ادلتها التفصيلية يعنى الادلة السابق ذكرها زى القران والسنه والقياس والاجماع الخ
يا مسهل يا رب
ندخل على تعريف الحكم الشرعي ونسأل حكم شرعي يعنى ايه؟
الحكم الشرعى هو : خطاب الله المتعلق باعمال المكلفين على جهة الاقتضاء
وجهة الاقتضاء يعنى زى ما يقولك الامر يقتضي منك ان تفعل كذا او لا تفعل كذا
او على جهة التخيير - يعني الاباحة - او الاعم وضعا
والاعم وضعا يعنى وضع امرين وجعل احدهما سببا للاخر او شرطا فيه او مانعا ونعرف ده بالتفصيل يعنى ايه بس واحده واحده
يبقى تعريف الحكم الشرعي هو : خطاب الله المتعلق بافعال المكلفين على جهة الاقتضاء او التخيير او الاعم وضعا
طيب من خلال التعريف ده نقول ان الحكم الشرعي له قسمين
ركز معايا شويه وانتبه لو سمحت
عندى حكم شرعى تكليفي ..وحكم شرعي وضعى
يعنى ايه الكلام ده؟
حكم شرعى وضعي : يعنى هو خطاب الله المتعلق بجعل الشئ سببا او شرطا او مانعا او صحيحا او فاسدا او عزيمة او رخصة
يعنى ربنا هو اللى جعل رؤية الهلال سبب للصوم وجعل الطهارة شرط فى الصلاة وجعل اختلاف الدين مانع من الميراث ..وهندرس بعدين ايه الصحة والفساد والرخصة والعزيمة
واحده واحده مش بحب الاستعجال
.
نرجع للقسم الاول من اقسام الحكم الشرعي وهو الحكم الشرعي التكليفي
معناه ايه : هو خطاب الله المتعلق بافعال المكلفين على جهة الاقتضاء او التخيير
وقلنا اقتضاء يعنى يقتضى طلب الفعل او الترك والتخيير اللى هو الاباحة
ومن خلال التعريف ده يا جماعة نقدر نعرف اقسام الحكم التكليفي ..اوعى يكون حد فك الحزام ازعل منه احنا لسه فى مرحلة الاقلااااع
احنا قلنا الاقتضاء يعنى اقتضاء طلب الفعل اوطلب الترك
والطلب له نوعين فيه طلب جازم ومؤكد وفيه طلب غير جازم وغير مؤكد
يبقى الطلب نوعين 2 في الاقتضاء 2( الفعل والترك ) = 4
طلب فعل جازم , طلب فعل غير جازم
طلب ترك جازم , طلب ترك غير جازم
والتخيير = الاباحة
انفع مدرس رياضيات صح ؟
يبقى اقسام الحكم الشرعى التكليفي خمسة اقسام
الوجوب والندب والتحريم والكراهة والاباحة ..الاحكام دى الافعال التى ترد عليها او تتعلق بها بيسموها في اصول الفقة متعلقات الحكم التكليفي
مثال الوجوب يعنى الفعل بتاعه واجب والندب اى فعله مندوب وهكذا ..الافعال ى بيسموها متعلقات ..معلش لو صعبه مش مشكلة المهم اننا نعرف معنى الواجب والمندوب والحرام والمكروه والمباح
الواجب : هو طلب الفعل طلبا جازما يعنى مؤكد وقاطع ..زى مثاال : أقيموا الصلاة
مفيهاش فصال ..اقيموا يبقى اقيموا
المندوب : هو طلب الفعل طلب غير جازم او غير قاطع - وله تعريف اخر وهو ما يثاب فاعله ولا يعاقب تاركه
زي مثال ايه يا جماعة : فإن خفتم إلا تقسطوا فى اليتامى فانكحوا ما طاب لكم من النساء
الحرام : هو طلب الترك او الكف طلبا جازما .. مثال قوله تعالى : لا تقربوا الزنا
المكروه : هوطلب الترك او الكف طلب غير جازم ..مثال الحديث : اذا دخل احدكم المسجد فلا يجلس حتى يصلي ركعتين
المباح : وهو خطاب الله المخير للمكلف بين الفعل او الترك دون ترجيح لاحدهما مثال قوله تعالى : وطعام الذين اوتوا الكتاب حل لكم وطعامكم حل لهم
طيب فيه ملحوظه هنا ..يعنى واحد ذكى هيسأل - مش ذكى جمعة طبعا - هيقول ايه؟
انت قلت قوله تعالى : اقيموا الصلاة واجب
وقوله تعالى : فانكحوا ما طاب لكم من النساء مندوب
طب ده فعل امر والتانى برضك فعل امر
ازاااى اعرف افرق بين الامر امتى يكون واجب والامر امتى يكون مندوب ؟ اعرفهم من بعض ازاى يعنى؟
مش عارف فيه وقت نجاوب ولا ايه
معلش فاصل اعلانى ونعود
الباشنمهندز ابن حجر يقدر ينزل بالكانتين يقلب عيشه وكمان تنفعوا الاستراحة
عدناااااااااااااااااا
عساكم من عواده - ومحدش يسألنى معناها ايه
اجابة السؤال اللى اخدناه قبل الفاصل نقول احنا عندنا قاعدة شرعية بتقول : الامر يفيد الوجوب مطلقا
ما لم توجد قرينة تصرف الامر عن معناه الحقيقى وهو الوجوب
والقرينة دى نوعين
قرينة منصوص عليها ..وقرينة غير منصوص عليها يعنى بنعرفها من خارج النص
هنقول امثله سريعه مثل ايه ؟
يقول تعالى : اذا تداينتم بدين الى اجل مسمى فأكتبوه
فاكتبوه هنا أمر ..يعنى واجب ولا مندوب ؟ قلنا مندوب
طب ازاى عرفنا انه مندوب؟
عرفنا من القرينة؟
ايوه اللى هى ايه القرينة دى ولا فين هي؟
القرينة هى قوله تعالى فى نفس الاية : فإن امن بعضكم بعضا فليؤد الذي اؤتمن امانته
فربنا قال انه عند الامن فلا حرج في عدم كتابة الدين..يبقى الامر كان للندب وليس الوجوب والقرينة هنا اهى منصوص عليها
طب نقول مثال عن القرينة الغير منصوص عليها
يقول رسول الله : دع ما يريبك الى ما لا يريبك
الامر اللى فيه شك النبي قال : دع ..يعنى اترك
طب يعنى هل كل امر انا مرتاب فيه او عندى فيه شك يبقى لازم اتركه زى ما قال الحديث
قلنا فعل الامر هنا دع افاد الندب مش الوجوب
طب ايه القرينة يا عم الحاج؟ عرفتها منين؟
عرفناها بالعقل وهى ان الامر المأمور بتركه مشكوك فيه يعنى قد يكون صحيحا كما قد يكون خطأ واليقين لا يزول إلا بيقين مثله
مثال كمان اهو .. يقول تعالى : فكاتبوهم ان علمتم فيهم خيرا
الامر : وكاتبوهم يعنى اللى عنده عبد يكتب معاه زى عقد كده ان يعتقه مقابل العمل لفترة معينة او ان يصبح حرا بعد وفاة سيده حسبما يتفق
طيب الامر هنا يعنى واجب اى لازم يعمل كده؟
لا مش واجب ولكن مندوب ..
طب عرفنا ازاى ان الامر ده مندوب مش واجب؟
وبعدييين ..انا محبش الغبي ركز معايا اهو كويس
قلنا فيه قرينه والقرينة هنا مش منصوص عليها فى الاية ولكن عرفناها من خارج النص وهى حرية المالك فى التصرف فى ملكه
وان شاء الله الدرس القادم هنتكلم عن بالتفصيل عن كل قسم من الاقسام التكليفية وكمان نقول ليه ابو حنيفة اختلف وقال ان فيه حاجه اسمها الفرض ودى غير الواجب وفيه كمان كراهة تحريمية وكراهة تنزيه
انتظرونا الدرس القادم
واياك حد ييجي متأخر او يفكر ينط من على السور