أمى ... و القرآن

كل عام و أنت بخير يا جماعة .. و ربنا يتقبل منكم الشهر الكريم

اتأخرنا عليكم فى المواضيع .. بس معلش اعذرونا .. الدنيا مشاغل .. أنا مش عارف هل لسة فيه ناس بتتابعنا و لا لأ .. لكن على العموم إحنا نرجو لكم التوفيق فى هذا الشهر الفضيل

نيجى للموضوع

أمى ست كبيرة جاوزت الستين من العمر .. و اسمها فاطمة .. أيوة أنا ما باتكسفش من ذكر اسم أمى .. بالعكس بابقى فخور باسمها.. أمى لم تكمل المرحلة الابتدائية فى التعليم .. خرجت من سنة خامسة ابتدائى و ما كملتش السنة السادسة الابتدائية لكن بتعرف تقرا و تكتب على بسيط .. إلى جانب إنها نظرها الضعيف و مابيخليهاش تقدر إنها تستغل قدرتها البسيطة على القراءة فى إنها حتى تقرأ خبر فى جريدة أو عنوان فى نشرة أو ما إلى ذلك


نسيت صحيح أقول لكم إنها عندها خشونة فى المفاصل و دة مخليها مابتقدرش تمشى مسافة أكتر من حوالى مائة متر إلا لما لازم تقعد عشان تستريح شوية .. و كمان مابتقدرش تعدى الرصيف اللى فى الشارع إلا بصعوبة شديدة أو لما تسند على حد .. أمى أصلا لما بتعمل لنا الأكل فى المطبخ مابتقدرش تقف على رجلها كتير .. هى حاطة كرسى فى المطبخ .. فتعمل جزء من الأكل و تروح تستريح شوية و هكذا


كل الكلام دة ليه ؟؟


أصل من حوالى عشر سنين فتح جنبنا مسجد كبير و المسجد دة عمل معهد لتحفيظ القرآن بحيث إن الواحد يقضى فيه ست سنوات و يتخرج حافظ القرآن كله يعنى يحفظ فى السنة خمسة أجزاء .. المسجد دة عامل برضه قسم لتحفيظ الأميين بس دول بيحفظوا جزئين فقط فى السنة

أمى من حوالى أربع سنوات قالت لى إنها عايزة تشترك فى حلقات تحفيظ القرآن دى ... أنا قلت فى بالى إنها مش هاتقدر تكمل عشان المشوار بتاع المسجد هايبقى متعب ليها إلى جانب إنها فى القراءة العادية بتلاقى صعوبة .. طب هاتعمل إيه فى قراءة القرآن اللى محتاجة حرص و مهارة فى إخراج الألفاظ و ما وراء ذلك من الأحكام من مد و إضغام و إخفاء و إظهار ... و ترقيق و تفخيم .. حاجات كتيرة مش سهلة

إلى جانب إن أنا نفسى اشتركت فى المسجد دة بس قضيت عدة أشهر فقط حفظت فيهم جزء "عم" اللى أنا حافظه أصلا و ماكملتش عشان كنت ابتديت اشتغل

أنا قلت خلاص .. أعمل لها اللى هى عايزاه و اشترك لها فى المسجد و أنا متوقع إنه هاييجى يوم و تقول لى إنها مش قادرة تكمل

بدأت أول سنة .. و ما أقولكوش على كمية المجهود الضخم اللى أمى بذلته عشان تقدر تقرا سور جزء "عم" بشكل مناسب .. الفتح و الضم و الكسر و التسكين و التشديد للحروف كان بالنسبة لها حاجة مرهقة جدا دة بجانب إن نظرها ضعيف .. و ابتدت تصدع من وقت للتانى .. و نسيت أقول إن المسافة بين البيت و بين المسجد حوالى مائتى متر و فيهم ثلاثة أرصفة عالية ... يعنى المشوار اللى بيتكرر مرتين أسبوعيا بالنسبة لها يعد مشوار غاية فى الإرهاق .. مرة سمعتها بتتكلم مع إحدى قريباتنا و بتقول لها إنها لما بترجع من مشوار المسجد دة بتبقى خلاص عايزة تبكى من الألم


المهم .. قلنا نعمل لها نضارة للقراءة عشان تتمكن من القراءة بسهولة و الصداع اللى بيجيلها دة يخف شوية ... و الحمد لله .. النضارة جابت نتيجة .. و بقت تقريبا كل أوقات فراغها بالاقيها ماسكة المصحف و بتقرا فى الكام سورة اللى أخدتهم .. و لما عرفت إنها ممكن تصلى السنن و هى بتقرا من المصحف كانت سعيدة جدا و بقت تقرا و هى بتصلى السنن السور اللى
محتاجة حفظ كتير

و مش بس أوقات فراغها .. كمان فراغات وقت ماهى مشغولة .. يعنى لو بتسخن مية مثلا عشان تعمل لنا مكرونة .. ألاقيها حطت حلة المية على النار و تجيب المصحف تقرا آية و لا اتنين و تبذل مجهود ضخم عشان تقراهم .. بعد كدة تقفل المصحف و تقوم تكمل عمايل المكرونة

و لو يوم المدرسة بتاعتهم فى المسجد غابت .. ألاقيها راجعة تطلب منى إنى أقرا لها الجزء المتوقع إنهم ياخدوه المرة الجاية عشان تبقى مستعدة

لكن بجد بقت تصعب عليا جدا فى امتحانات الشهر أو آخر السنة .. أنا بقيت أشوف أمى خايفة لاحسن ما تعرفش تسمع كويس .. و تقعد تسهر تحفظ و تقرا و تشكيلى إن السورة دة كلماتها صعبة ... أو الآية دى شبه آية تانية و بتلخبطها .. و لا لما ترجع من الامتحان و هى مرهقة من المجهود الذهنى اللى بذلته .. و لا لما تبقى فرحانة و طايرة من الفرح لما تجيب درجة عالية .. أو تبقى متضايقة إنها حصلت على درجات أقل من اللى بيحفظوا معاها

كذا مرة جبنا لها أنا و اخواتى هدايا عشان جابت درجات عالية .. كانت فرحانة جدا

الغريب إن الوضع بينا و بين أمى اتقلب .. زمان كان هى اللى بتهتم بينا و بمذاكرتنا و بتقلق علينا لما نروح نمتحن أو نشوف النتيجة .. دلوقتى بقت هى اللى بتخوض الامتحان و احنا اللى بنقلق عليها .. بالفعل وضع غريب

زمان لما أمى كانت تزن عليا و تقعد تقول لى: ذاكر ذاكر .. كنت باقول لنفسى هى بتزن عليا عشان الكلام بالنسبة لها سهل .. أما لو جت مكانى و قعدت تذاكر هاتبقى عايزة تهرب من المذاكرة بأى شكل .. لكن الزمن أثبت لى إن أمى عندها عزيمة ماضية .. لأنها فى الأربع سنين دول .. بعد ما كانت حافظة الفاتحة و المعوذتبن و الإخلاص و العصر فقط و كانت بتصلى بيهم كل صلواتها و بتقراهم فى كل مناسبات حياتها .. هى دلوقتى حافظة ثمانية أجزاء من القرآن الكريم

ازاي تخلي ..الملائكة تحبك

ايه احساسك اول ما تسمع كلمة الملائكة؟
بتحس بصفاء وراحة وتأتي في ذهنك هالات من النور وتشعر بلهفة واشتياق
كأنه صديق عزيز كنت مفتقده وفجأة لما ذكر اسمه قدامك تذكرت كل شئ حلو متعلق في ذهنك به
النهاردة هنتكلم عن ازاي تقوي صلتك بالملائكة وتقوي علاقتك بيهم
أفتح معايا شمس المعارف الكبرى صفحة 7
ايه نسيتم تجيبوه معاكم
بسيطه
أفتح معايا كتاب الكبريت الاحمر صفحة 9
برضه نسيتم تجيبوه معاكم
ولا يهمكم
ولعوا في الكتب دي اصلا
وافتح معايا كتاب ربنا القرآن الكريم
واللى هيقول نسيته هعلقه على باب الكاشفة
يقول تعالى بعد اعوذ بالله من الشيطان الرجيم
بسم الله الرحمن الرحيم
إن الذين قالوا ربنا الله ثم استقاموا
خد بالك ده شرط العلاقة
تتنزل عليهم الملائكة

دي ثمرة العلاقة
تتنزل عليهم الملائكة ألا تخافوا ولا تحزنوا وأبشروا بالجنة التي كنتم توعدون
نحن أولياؤكم في الحياة الدنيا وفي الاخرة ولكم فيها ما تشتهي أنفسكم ولكم فيها ما تدعون
صدق الله العظيم
تلاقي في كتب العفاريت اللي ذكرناها قبل الاية علشان تتصل بجني مسلم او غير مسلم
لازمك رياضة نفسية جامده اوى ..تنعزل وتترك اهلك
تصوم اربعين يوم ولا تأكل من ذي روح
وتقعد طول الليل ترسم في دواير ومثلثات وتكتب في حروف وتدور على ساعات السعد وساعات النحس وتبعد عن الاعمال لما يكون شرف زحل في منزلة المريخ ولما يكون عطارد قريب من الزهرة ويا سعدك لو المشتري في منزلة الشمس تبقى هاصت معاك العملية ولو انت برج الحوت ابعد عن القوس ومتنساش تحسب اسم امك
المهم علشان ما نطولش
ربنا بين لنا كل شئ في كتابه العزيز
والملائكة مخلوقات الله وعلشان تنول اي حاجه في ملك ربنا لازم تنولها برضاه
ويا مصيبتك لو نولتها وانت على معصية - فولي وجهك شطر جهنم يا جميل عدل
( قل تمتع بكفرك قليلا انك من اصحاب النار)
علشان تتقرب من الملائكة لازم تعرف انت دي علاقة تبعية
يعني ايه
يعني لازم يكون هدفك الاساسي هو ربنا ..انك تقرب من الله
انك تحب ربنا
هتلاقي كل حاجه بعد كده سهله ..حتى الملائكة هي اللى هتتقرب منك مش جائزه لك ولكن انت اللى جايزه لها
فالملائكة تحب كل من هو قريب من الله
علشان كده جاء في الحديث : ما اجتمع قوم في بيت من بيوت الله يتلون كتاب الله ويتدارسونه بينهم إلا حفتهم الملائكة وغشيتهم السكينة وذكرهم الله فيمن عنده
طيب علشان تقرب من ربنا والملائكة تحبك وتكون ولي لك في الدنيا والاخره
والولي : من الولاية والنصرة والحماية
يبقى ولاية الدنيا هي : الحماية والنصرة
ولاية الاخره : هي الشفاعة
طيب كيف ننال رضا الله وحب الله
عندي شرطين بس ذكرتهم الاية
الشرط الاول : الذين قالوا ربنا
بسيطة صح؟
لا مش سهله كده اصبر على رزقك
الشرط الثاني: ثم استقاموا
ومخك ييجي في دي ويروح مقفل ويقول هو ماقلش استقاموا يعنى اعمل ايه بالظبط عايز كده واحد, اتنين ,تلاته
نوضح علشان اللى اوله شرط اخره نور
الشرط الاول : الذين قالوا ربنا الله
طبعا انت افتكرتها سهله علشان (قالوا) يعني بمجرد ما (قالوا) خلاص اللي بعده بقى
لا.. متنساش دي علاقة مع ربنا ..يعنى اول ما تقول (قالوا) يعنى تقول : ربي الله ..وخلاص كده
ان لم تكن كذلك فعلا ..يقول الله لك كذبت
سبحانه عارف كل حاجه
يبقى المسألة مش قول باللسان بس
شوف انت ربي الله يعني ايه
هديك امثله علشان البطيخة اللى فوق كتافك تفهم
فلان استاذي ..يعني بسمع كلامه
فلان مديري ..يعني بنفذ اوامره
فلان أبي ..يعنى مقدرش أخالفه
الله ربي ..يعني ....( اكمل مكان النقط)...؟
وضحت ؟؟ البطيخة فهمت؟؟
اسمع البيتين دول لابن القيم وهتفهم اكتر
تعصي الاله وانت تزعم حبه ..هذا لعمري في القياس شنيع
لو كان حبك صادقا لأطعته ..ان المحب لمن أحب مطيع
ندخل على الشرط التاني
الشرط الثاني : ثم استقاموا
هنا بقي بنتلكك..وكل واحد فاهم الاستقامة على مزاجه
الاستقامه هنا مكملة للشرط الاول بمعنى الاستقامه على طاعة الله وأتيان اوامره واجتناب نواهيه
الرجل الامي فهمها وكانت واضحه بالنسباله ومحتاجش يستفسر
جاء اعرابي الى رسول الله وقال له قل لي في الاسلام قولا لا اسئل عنه احدا بعدك ابدا
يعني انا راجل فهمي على قدي ومش بتاع علوم ولا حفظ اديني كلمتين أعمل بيهم يكونوا سهلين على اللى زيي
قال له رسول الله : قل أمنت بالله ثم أستقم
وفي رواية : قل امنت بربي ثم أستقم
والراجل زي ما سمعهم خدهم وقال يا فكيك ..لا سمعناه قال استقامه يعني اعمل ايه ..وما اعملش ايه
لان الاستقامة امر فطري كلنا عارفينه بس بنقاوح وبنوجد لنفسنا المبررات
يعني اللى بيسفه أراء غيره عارف ان التسفيه في حد ذاته فعل قبيح
اللى بتقول ان المنقبه ومش بتعمل بيه بتكون اشبه بكيس زباله ..عارفه ان ده تشبيه قبيح حتى لو كانت مش بتعمل بيه فعلا
اللى بيقول ان النبي كان علماني في حياته - قعدت اضحك - هو عارف انه بيغالط نفسه
هههههههههه قال نبي وعلماني ..بذمتكم دي جمله لها محل من المنطق
ده مش تسفيه لاراء الاخرين ده انا بقول يا شمس انتى منوره
حقيقة وواضحة اعمل ايه
كلنا عارفين ايه الصح ..وعارفين ايه الغلط مهما قمنا من مبررات
كلنا عارفين لما بنت تنزل الشارع لابسه بنطلون وفانله ( بلوزه او تي شيرت) والام ضميرها مرتاح اوي علشان فوق الفانله حجاب
يا صلاة الزين على عزيزة يا صلاة الزين- على رأي عبد المطلب
يبقى محدش يقول استقامه يعني ايه ..واضح
يبقى حققنا الشرطين : الذين قالوا ربنا الله ثم استقاموا
تعالوا نشوف ثمرة هذا العمل

الايات 30: 32 من سورة فصلت
بسم الله الرحمن الرحيم
إن الذين قالوا ربنا الله ثم استقاموا تتنزل عليهم الملائكة ألا تخافوا ولا تحزنوا وأبشروا بالجنة التي كنتم توعدون
نحن أولياؤكم في الحياة الدنيا وفي الاخرة ولكم فيها ما تشتهي انفسكم ولكم فيها ما تدعون
نزلا من غفور رحيم

صدق الله العظيم
والسلام عليكم ورحمة الله وبركاته
ابقى تعالوا كل يوم

بدايتي كانت محاولة : تأليف قرآن

بدايتي الفكرية كانت بمحاولة تأليف (قرآن) كنت في اولى ابتدائي او تانية ابتدائي وعجبني الزخرفه اللى في كتاب الدين في سور القرآن..فقلت اما اعمل زيها

فرحت جبت كراسه مش بستعملها وقعدت ازخرف فيها زي شكل السور القرآنية ونقلت الزخرفه بدقه

وبعدين كتبت : بسم الله الرحمن الرحيم يسبح لله ما في السموات وما في الارض لانه هو الذي خلق الانسان

وبس ..لاني كنت تعبت من الزخرفه طبعا كنت طفل في اولى او تانية ابتدائي بالكتير والزخرفه وحدها اخدت ساعة

وكانت هذه هي المحاولة الاولى والاخيرة في حياتي

محاولة تفسير القرآن

تاني حاجه في مرحلة بداياتي الفكرية كانت وانا في تانية ابتدائي بالظبط . وابويا كان جايب الشيخ احمد حسين الله يرحمه علشان يعمل خاتمه فجبت كراسة وقعدت قريب من الشيخ وكان هو يقرا القرآن وانا اكتب اللي بفهمه منه

محاولة تفسير يعني ..وكنت اروح اقعد جنب ستي ربنا يديها الصحة واقعد اقرالها اللى كتبت وهي تهز دماغها

وبرضه هذه المحاولة لم تتكرر

كنت موهوب بس ما لاقتش اللي يشجعني وده نظرا لظروف البيئة المحيطة ومنظومة التعليم عامة ولغاية اليوم

...................................

نشأت بطبعي وانا احب القراءة عن فهم وعن بحث مش بحب نظام التلقين ولا التقليد

لاني اصلا ما وجدتش حد يلقني ولم اجد من اقلد عنه سواء شخص او كتاب

فجعل ذلك مواهبي تنمو بشكل لم تتدخل فيه يد بشر وهو ايضا ليست جهودا ذاتيه ولا انسب فيها فضل لنفسي ولست مغرورا ولا متعاليا حين اقول ان الفضل في ذلك هو لله - فقد عرفت في بداياتي حياة روحانية كانت هي الفتح الذي اثر في عقلي حياة روحانية متزنه وهبني الله اياها من حبي منذ كنت صغيرا للمساجد

ثم جائت مرحلة المراهقة

مرحلة النقد والاكتشاف : فقد اخضعت عقيدتي التى اؤمن بها الى النقد العقلي بدأ من الالوهية والقرآن ومحمد علية الصلاة والسلام

انتهت الى نتيجة عقلية ان الله حق وهو واحد لا اكثر وان القرآن كتاب الله المحكم المعجز وان محمد نبي كسنة الله في الانبياء واحقيته بالرسالة دون غيره من العالمين حتى تاريخنا فلم يظهر ولن يظهر شخصية مثله

ثم تعرضت لمحنة نفسية اثرت كثيرا جدا على شخصيتي هي نوع من الوسوسه جعلني مشتت الذهن فاقد التركيز

استمرت معي زمنا طويلا افقت منها لاجد فراغا مكانها فعشت وانا اشعر بغربة ذاتيه

تنازعنى ميولي الروحانية وضرورة الاتصال بالواقع لتعويض ما فات لذلك كنت في هذه الفترة عندى مشكلة في الادراك لما حولي فكنت استجيب متأخرا لما يحدث حولي لاني كنت اتعامل مع الواقع كشخص كبر فجأة ويحتاج لفواصل زمنية ليستوعب ما يدور حوله من مجريات الحياة الزمنية

استمرت هذه المحنة وعوارضها زمنا طويلا ..تعافيت بفضل الله منها ومن كثير من عوارضها

ولم يبق إلا مرحلة الاستقرار -وتأمين وسائل العيش حتى يمكنني التفرغ لميولي الروحانية الانعزالية ولكن باعتدال دون تطرف

ان ما أعيبه على الصوفيه هو انها جماعات ..فالتصوف عندي مرادف للزهد والزهد عمل فردي لان الزاهد يتقي الرياء وشبهاته ولا يحلو له انس إلا في خلوه ولا يتم وصال إلا اذا خلا ما بين المحب ومحبوبه مما سواهما فيهيمن المحبوب على حبيبه فيأخذ بقلبه وعقله وجواراحه فيصير المحب عدما ويصبح الوجود كل الوجود هو المحبوب

إلهي وسيدي ..مولاي وخالقي شكرا لانك جعلتني عبدك ..شكرا لانك سيدي

........................

على فكرة مش ده الموضوع اللى كنت عايز اكتبه

انا كنت عايز اكتب حاجه تانية خالص

ههههه

انتظروا الجزء التاني ..هوريكم بفكر ازاي

سلام مؤقت

استئذان

السلام عليكم و رحمة الله و بركاته
كان من المفترض أن يكون موضوع هذه المرة هو عرض لرأى الشيخ الطبيب محمد اسماعيل المقدم فى علاقة الإسلام بالوطنية .. و لكن جدت ظروف جعلتنى أغير الموضوع .. و على العموم .. النقاش مازال مفتوحا فى التعليقات على الموضوع السابق و سوف أظل أتابعه حتى بعد إنزال المواضيع الجديدة
ا
أنا هارغى شوية و هاطول و فى الآخر هاقول إنى هاخد أجازة .. شوية كدة و راجع بإذن الله .. اللى عايز يقرا و يكمل .. يروح الأول يجيب كوباية شاى من القهوة و ييجى يسمع
ا
كل المواضيع التى قمت بكتابتها كانت بمثابة مواجهة لأنفسنا بمشاكلنا .. فأنا أرى أن الكثير من الأزمات التى تمر بها أمتنا نشأت من فهم غير منضبط لإسلامنا العظيم .. ربما يقول بعضكم:"و انت بقى اللى فاهم الإسلام فهم صحيح؟؟" ..هاقول إنى و الله باحاول أفهم ..و كل ما كتبته هو مجرد إشارة منى لمواطن الخلل فى الكثير من القضايا .. قد أكون صحيحا و قد أكون مخطئا .. و لكنى على الأقل حاولت .. و وضحت أماكن التناقض و مواطن الخلل قدر فهمى و قدر استطاعتى .. و كل منا لديه العقل و الإرادة و الضمير الذين يمكنونه من اتخاذ القرار الصائب
ا
كان لا علاقة لى بالتدوين .. كنت أتابع ذلك النشاط فقط كمشاهد من بعيد .. فكنت أظن أنى لا أحمل شيئا جديدا أو ذا قيمة لكى أنشى لأجله مدونة خصوصا فى وجود فطاحل عالم التدوين .. إلى أن تشجعت يوما تحت ضغط الانفعال إلى أن أعلق على مدونة أحد الإخوة معترضا على الطريقة التى عالج بها الموضوع على الرغم من أهمية الموضوع .. و كان عن الحل الإسلامى .. ربما بعضكم يعرف ملابسات الموضوع .. المهم .. يومها طرحت بعض الأسئلة و التى أرى أنها من الأهمية بحيث يجب علينا جميعا أن نعرف إجاباتها .. دار حينها شد و جذب بينى و بين كثيرين .. كانت محصلته ما بين تجاهل و إساءة و سخرية من ناحية (كأن وصفت من أحدهم بأنى أخطر على الدين من المثليات .. أما و قد عرفتمونى.. هل هذا صحيح؟؟)... و بين اهتمام و استحسان و إيجابية من ناحية أخرى.. فقد قام أخى الكريم الباحث عن الحقيقة (و لم أكن أعرف عنه شيئا مطلقا) من نفسه بعرض كل التساؤلات التى أثرتها و أجاب عليها فى تدوينة مستقلة باختصار و روية و تمكن ..و كانت إجابته نافعة جدا جدا بالنسبة لى (خاصة النقطة الخاصة بقراءة التاريخ و اتباع منهج مقارنة النصوص) .. و أجمل ما فى الموضوع أنه اهتم .. نعم اهتم بما أثرته من تساؤلات و هو لا يعرف عنى شيئا .. بل نشر لى رسالة أرسلتها إليه بالبريد .. و قدم أكثر شىء يستطيع تقديمه .. و أعتقد أنه لو كان يستطيع أن يفعل أكثر مما فعل.. لفعل
ا
فى نفس الوقت وجدت الأستاذ عصفور المدينة (الرجل الذى هو من أكثر المدونين إيجابية و لم أكن أعرفه أيضا حينئذ) قد قام بالإشارة فى أحد التعليقات إلى تدوينة كان قد كتبها عن الثوابت و المتغيرات كإجابة على تساؤل من التساؤلات التى أثرتها
ا
أما الأخت الفاضلة فتاة الجنة (و هى التى أنا مقصر فى حق مدونتها بشدة و أرجو أن تعذرنى على ذلك .. و أرجو أن يخبرها أحدكم بهذه التدوينة فأنا سأشعر بالحرج من دعوتها بعد هذه الفترة من الانقطاع) فقد قالت فى حقى قولا جميلا .. كانت كلمات موضوعية يدور معناها حول "و جادلهم بالتى هى أحسن" .. كل ذلك حمسنى أن أتابع المدونات المختلفة بحماس متزايد
ا
إلى أن جاء اليوم الذى فتحت فيه بريدى الإلكترونى ووجدت رسالة من أخى الباحث عن الحقيقة يدعونى فيها إلى مشاركته فى مدونته .. كانت سعادتى غامرة .. يعنى ماكنتش مصدق نفسى من الآخر .. و ظللت أقرأ الرسالة عدة مرات .. و بدأت معه التدوين ..و فوجئت بشخصبة الباحث عن الحقيقة الرائعة .. كان شخصا يحترم "الآخر" بشكل كبير .. كان لا يقاطعنى إذا تكلمنا على "الشات" .. و كان يستمع منى و يهتم لما أقول .. و يسدد النصح بإخلاص .. و كان متحمسا بشكل كبير .. استفدت منه كثيرا .. قدمنا الكثير من الموضوعات .. كانت له روحا عالية .. بل كان هو الذى يبعث الروح فى المدونة على عكسى تماما .. فأنا ممل بشكل كبير و غير جذاب و ربما منفر فى بعض الأحيان .. ربما بسبب طبيعة دراستى .. و كم قلت له أنه هو روح المدونة .. و لكن من عادة الروح .. أنها تحلق فوق عوالم البشر .. تتحرك جامحة بحرية .. تعلو و تهبط .. ننتظرها أن تعود إلينا يوما لتبعث فينا الحيوية و البهجة
ا
كانت الموضوعات التى كتبتها هدفها الأول هو محاولة لتوضيح بعض الأساسيات و بعض المبادئ العامة .. و أيضا التركيز على الكثير من المشكلات التى لمستها فى حياتى و بين زملائى .. كان هدفى أن نضع يدنا على المشكلة .. فقد كنت أتوجه بما أكتب إلينا .. نعم .. كنت أتوجه إلينا .. إلى الشباب من بنى وطنى و دينى ممن يحملون هم هذه البلاد و هم هذا الدين.. خاصة الذين يكتبون على مدوناتهم مواضيع دينية .. كنت أحاول ألا نقطع جذع الشجرة التى نحن واقفون عليها كأن ننكر تاريخنا و تراثا إلا ما رحم ربى .. فذلك للأسف ما يقوم به الكثير من الناس .. من يرفضون التاريخ و التراث إلا برؤيتهم هم فقط و من دونهم خاطئ.. و يرون أن التاريخ بدأ من نقطة محددة لاغيا كل ما قبله .. و كأن تاريخنا وزر .. يأتى الإسلام فيجب ما قبله من تاريخ و من أوزار (مع أن الفراعنة من أوائل من عرفوا التوحيد .. هناك من عرفه وحيا ..و هناك من عرفه عقلا .. هناك من آمن .. و هناك من كفر) .. و يرون أن التاريخ يسير فى مسار هم حددوه من قبل .. و ما دون هذا المسار يعد بدعا و ضلالات .. لا يوجد إلا فرقتهم هى فقط الناجية .. و هم فقط الذين يعرفون ثوابت الشرع .. و هم أهل التميز و العقل و من دونهم هم الدرجة الثانية .. الاجتهاد هو فقط اجتهادهم و هم أفقه الناس بالنصوص .. رأيهم صواب لا يحتمل الخطأ و رأى غيرهم خطأ لا يحتمل الصواب .. أعتذر عن هذه الكلمات الشديدات .. و لكنى استمعت مؤخرا إلى أحد الدروس و التى وظف الرجل فيها كل ملكاته ليحذر الناس من أباطيل حجة الإسلام أبى حامد الغزالى .. الغزالى العالم الذى اتفق جمهور الأمة على أنه مجدد المائة الخامسة مثلما اتفقوا على أن مجدد المائة الأولى هو سيدنا عمر بن عبد العزيز و مجدد المائة الثانية هو الإمام الشافعى و اختلفوا على غير هؤلاء الثلاثة.. بل هو العالم الوحيد فى تاريخ الإسلام الذى أطلقوا عليه أنه "حجة الإسلام" .. و يا ليت هذا الداعية الحنبلى اقتدى بابن الجوزى الحنبلى .. الذى كان من أشد الناقدين للغزالى و مع ذلك اختصر و هذب كتاب الغزالى "إحياء علوم الدين" فى كتاب "منهاج القاصدين" و بهذه الإيجابية كذلكم كان بن تيمية الحنبلى و الطرطوشى المالكى
ا
إخوانى .. لم أدع يوما أنى الصاحب الأوحد للحق .. و إن كنت ادعيت أنى صاحب حق فلم أقل أنى الصاحب الأوحد له و غيرى باطل .. فأنا لست صاحب فكر أو رؤية مستقلة .. فذلك يستهلك عشرات السنوات.. أنا مجرد شخص عادى .. أقرأ و أستوعب و أفكر .. و فى النهاية أكتب بغرض الإشارة إلى جوانب أراها صحيحة .. و أخشى أن أكون مخطئا .. لذلك أستغرب ممن يستيقنون أنهم على الصواب الأوحد فى أمور هى من أمور الحياة و التى يحتمل الصواب فيها أكثر من وجه ناهيكم عن الاختلاف فى أمور الدين الفروعية (لتجد عبارة "هذا اختلاف غير سائغ" موجهة كسلاح إليك) .. و الطامة الكبرى تكون فى الاختلاف حول أمور الأصول (لتجد عبارات الذم و التهديد و الحدة و ربما تهم الابتداع و حينا آخرا التكفير)ا
ا
كلمة أخيرة .. أحب أن أوجه كل تحياتى و تقديرى للأستاذ عصفور المدينة .. ذلك الرجل .. السلفى المستنير .. الإيجابى .. الذى يكتب ليربى و يوجه .. و يحسن معاملة الناس .. و كأنه أب يربى أبناءه بالحسنى و الحكمة و الموعظة الحسنة .. لك منى يا أستاذنا كل احترام و تقدير
ا
كل ما سبق كان من قبيل استرجاع بعض الأحداث المثيرة فى الفترة السابقة .. إيذانا فى الدخول فى أجازة لن تستمر طويلا بإذن الله .. و سيكون معكم أخى الرائع الباحث عن الحقيقة .. بعض التفاصيل ستجدونها على الاستراحة
ا
أما بخصوص موضوع الشيخ محمد اسماعيل المقدم .. فمنذ أن بدأت كتابة ذلك الموضوع منذ شهور و أنا متردد فى نشره .. لا أدرى بوضوح لماذا.. و لما أخذت قرارى بأن أنشره ظهرت الموانع تلو الموانع .. و لا أدرى هل سأنشره يوما ما أم لا .. و لكن حتى ذلك الحين كنت أود أن يقرأه من اهتم بالعرض الذى قمنا به فى موضوع الوطنية .. فلا أدرى هل أرسله للمهتمين عن طريق البريد الإلكترونى ؟؟ .. حسنا .. جاءتنى فكرة .. سوف أرسله مبدأيا لكل من سوف يشرفنا بالتعليق على هذا الموضوع حتى و إن لم يطلب .. سوف أذهب إلى مدوناتكم و أحصل منها على عناوينكم الإلكترونية .. و من يريد أن يحصل على الموضوع و فى نفس الوقت هو لا يضع عنوانه الإلكترونى على مدونته و لا يريد لأحد أن يعرف عنوانه .. فليراسلنى على عنوانى التالى
Ebn.7ajar.al3asqalani@gmail.com
أما من لا يريدنى أن أرسل له الموضوع فليقل لى تصريحا أو تلميحا و أنا سوف أفهم طلبه و أتفهم رغبته
ا
فى النهاية .. أود أن أوضح عنى بعض المعلومات: فى أمور السياسة و المجتمع فأنا لست إخوانيا (بل أنا لست إخوانيا على الإطلاق).. فى أمور الفكر و الدعوة فأنا لست سلفيا (سلفي بمعنى تبنى الفكر الحالى للتيار السلفى) .. فى صفات الله و تأويلها فأنا لست أشعريا (ربما ظن البعض أنى كذلك لدفاعى عن التأويل) ..أردت بذلك فقط التوضيح لأنى شعرت من البعض فى تعليقاتهم أنهم يظنون أنى أنتمى لفئة من هذه الفئات.. و لجميع هؤلاء احترامى و تقديرى
ا
و أراكم فى التعليقات على خير
ا
يا ترى .. ماحدش فيكم سأل نفسه أنا ليه سميت نفسى على اسم العالم الجليل الحافظ بن حجر العسقلانى ؟؟ لو حد كان فكر فى سبب ياريت يقوله يا جماعة

الأحجار

ذات صباح خرج من بيته نشيطا سائرا فى طريقه المعتاد. جذب انتباهه حجر غريب ملقى على الأرض فأسرع و التقطه. ظل يتأمله معجبا بشكله المتناسق فاحتفظ به و سار مكملا طريقه. لم يلبث أن وجد حجرا آخرا فأعجب به أيضا. سارع و حمله الى جانب الآخر. ظل يسير على طريقه بعض الوقت حتى التفت الى حجر أجمل مما يحمل بل و أكبر أيضا. تأمله لفترة ثم حمله بجانب السابقين و سار و هو سعيد. توالت فى طريقه الأحجار الغريبة و الجذابة, الكبيرة و الصغيرة. حدثته نفسه بأن هذا يوم سعده فقد حملها كلها بين يديه و سار بها متمهلا لئلا يسقط منها حجر واحد. عدة خطوات أخر و صادفه حجر آخر أكبر و أجمل و تمنى لو حمله بجانب باقى الأحجار و لكنه لم يجد فراغا على ذراعيه ليحمله, فسارع إلى خرقة بالية كانت ملقاة على جانب الطريق فاستعملها لحمل الأحجار مضافا إليها الحجر الجديد. زادت سعادته حينما وجد كومة من الأحجار التى لم ير لها مثيلا من قبل ملقاة على جانب الطريق فلم يتردد فى حملها إلى جانب ما سبقها فى ما تبقى من فراغ فى خرقته البالية. حدثته نفسه بأنه يجب أن يحصل على جوال مناسب يمكنه من حمل أحجاره بشكل سليم, فقد سقطت منه عدة أحجار أثناء سيره حتى مع تباطؤه فى السير و بذل مجهودا مضاعفا ليستعيدها مرة أخرى. يالحظه! فها هو السوق, يمكنه الآن شراء جوال كبير. تمكن بالفعل من الحصول على واحد متسع بحبل طويل ليحمله على ظهره. أفرغ فيه كل ما جمع من أحجار. فبدون هذا الجوال ما كان ليتمكن من حمل الحجر الجديد الذى صادفه أثناء خروجه من السوق, و لما استطاع حمل الحجرين المتماثلين الضخمين الذين لاقاهما بعد عدة خطوات, و لا الكومة الأخرى من الأحجار المتداخلة التى أذهلته و هى ملقاة على جانب الطريق, و لا استطاع حمل الحجر الهندسى الشكل الذى استعان بأحد المارة لحمله عليه. فقد بدأت الحمولة تثقل عليه مرغمة إياه تباطؤا على تباطئه, و انحناءا على انحنائه. فقد كاد انحناء ظهره و انخفاض جبهته أن يلهياه عن ذلك الحجر الملون الملقى إلى جانب الطريق و الذى ظل يتأمله وقتا طويلا تحت وطأة الحمولة الثقيلة انتظارا لأحدهم حتى يحمله عليه. لم يهتم بالآثار الشديدة التى تركها الحبل على يديه جراء الحمولة الثقيلة التى على ظهره. فقد بدأ الحبل فى التمزق و الانفلات فانتابه رعب شديد من سقوط هذه الحمولة على الأرض, فقد كانت بالنسبة له أقيم من أن يدعها على الأرض و لو للحظة. أسرع قدر استطاعته إلى أحد الحدادين القريبين منه و استبدل ببقايا الحبل سلسلة حديدية باذلا مجهودا خارقا ألا تلمس حمولته الأرض. حالة السعادة التى كان عليها إثر إضافة الحجر الشفاف الضخم الذى وجده بعد خروجه من عند الحداد إلى مجموعته أنسته أنين مفاصله التى كان صراخها قادر على نفض خلايا مخه نفضا. انتصف النهار و تربعت الشمس الحارقة فى وسط السماء, و لكنها لم تفلح فى اختراق حالة النشوى التى اعترته بعد ما ألقى أحد المارة بحجر ثقيل على حمولته استجابة لرجاءاته و توسلاته لإضافة هذا الحجر إلى مجموعته فقد استعجب ذلك الرجل لمشهد الجوال الضخم المشدود بالسلاسل إلى شخص يئن تحته و لا يكاد يستطيع أن يرفع قدما ليخطو خطوة. استحسن من نفسه أنه كان قد تخلص من نعله بعد إضافة مجموعة من الأحجار كان قد صادفها منذ لحظات فقد كان عليه أن يخوض فى صحراء نهاية المدينة ليحصل على ذلك الحجر الذى يكاد يضىء تحت ضوء الشمس. فقد كانت قدمه العارية تغوص فى الرمال مع كل خطوة يخطوها و يبذل مجهودا مضاعفا ليرفع قدمه المغروسة فى الرمال. و لما وصل إلى الحجر ظل واقفا فى هذه الصحراء حتى قاربت الشمس على المغيب لعل أحدهم أن يأتى فيساعده على حمل هذا الحجر إلى مجموعته. وصل أحد البدو فساعده على إضافة الحجر حيث يريد بعد أن اعتلى البدوى ظهر الجمل الذى كان يركبه ليتمكن من تثبيت الحجر الجديد حتى لا يقع بسهولة جراء الاهتزاز العنيف الناشئ عن خطواته المتهالكة. كان عليه أن يخوض الرمال عائدا إلى المدينة التى عاد إلى طريقها الصلب و كان القمر قد توسط السماء. لم يلبث أن انعطف فى أحد الطرق بعد مجهود جبارليحول دون سقوط الحمل من على ظهره حتى وجد بركة من مياه تسربت من أحد المنازل و قد ألقى فيها بحجر لم ير له مثيل. فقد جن جنونه, و خاض البركة منتظرا أحدهم ليحمل عليه الحجر إلى جانب مجموعته. انتظر كثيرا, فقد أمسى لا يتمكن من النداء بصوت عال ليستدعى أحد سكان المنزل حتى يخرج إليه. ظل منتظرا طويلا حتى كادت عظامه أن تنهار تحت وطأة الحمل الرهيب, و لكن مشهد الحجر وسط بركة المياه أطار صوابه. و لم يلبث أن قطع حبل تأملاته رجل خرج لتوه من المنزل, فطلب منه أن يحمل عليه ذلك الحجر. و بعد سيل من توسلاته و استغراب صاحب المنزل استجاب أخيرا. فحمل الحجر بين يديه و اعتلى سطح منزله ليتمكن من إضافة الحجر على قمة مجموعة الأحجار التى انتظر صاحبها بفارغ الصبر وضعه على ظهره. و لم يكد الحجر أن يوضع على ظهره حتى اضطرب جسده اضطرابا شديدا, و ارتعدت فرائصه, و اهتزت قوائمه بشدة. و فجأة انهارت مقاومة جسده و سقط الحمل عليه و انسحق تحته.






السبت الحادى و العشرون من أكتوبر 2006
الساعة الحادية عشرة ليلا
ليلة التاسع و العشرين من رمضان 1427

كل سنة و كل المسلمين بخير

السلام عليكم يا جماعة

تقبل الله منكم الشهر الفضيل

و كل عام و أنت بخير بمناسبة عيد الفطر

و بالمناسبة دى إنتم معزومين عندنا فى مدونة استراحة الكاشفة على طبق كحك معمول عمولة عشان خاطر أجدع مدونين فيكى يا بلد

آه .. نسيت أقول إن كل واحد فيكم ليه كحكة واحدة بس .. و اللى عايز كحك زيادة يدفع بقى لكل كحكة زيادة.. معلش يا جماعة .. أصل مصاريف التدوين زادت اليومين دول

و يا سلام لو تطلبوا كام طلب كدة من القائمة اللى هاتلاقوها هناك .. أهو تنفعونا برده

و أشوفكم هناك بقى

سلام يا جماعة

هلت نسائم الرحمة

السلام عليكم ورحمة الله وبركاته

انتم شامين اللى انا شامه

استنشق كده الهواء وخد نفس وقولى شامم ايه وحاسس بايه

مش حاسس ان فيه ريحه غريبه فى الجو

ريحه مميزه وجميله

مش حاسس بانشراح فى صدرك

الحقيقة انا من يومين كده تقريبا وحاسس ان فيه ريحه هلت كده على الجو مره واحده

لدرجة انى النهاره خلصت شغلى وحسيت انى عايز اتمشى

اتمشيت كتير قوى ومكنتش حاسس بتعب بالعكس كنت مستمتع رغم ان جو اسيوط بالنهار مش ظريف ابدا

بس الحقيقة انا مكنتش عارف تفسير ده ايه؟ ومكنتش فاكر اصلا ان فيه حد واخد باله لغاية من دقيقتين بس وانا حاليا معى على الماسنجر زميلى ابن حجر وسألنى السؤال ده

ابن حجر: انت مش بقالك يومين كدة شامم ريحة رمضان فى الجو ؟؟

الباحث:(بصراحه اتفاجئت لكن ما توقعتش فقلت اسأله يعنى ايه) إزاى يعنى؟

ابن حجر: الجو هنا له ريحه غريبه

الباحث: تقصد الجو يعنى الطقس ولا جو المدونات؟

ابن حجر: الطقس ..رمضان له ريحه مميزه

الباحث: فعلا والله من امبارح بالليل وانا شامم ريحه غريبه ومميزه

ابن حجر: ومش انا بس ..لأ ده المدير بتاعى كمان النهارده

ابن حجر: واخويا

ابن حجر: وامى

ابن حجر: وانت لو سألت الناس حواليك هيقولولك كده

الباحث : فعلا سبحان الله

ابن حجر: ايه رأيك نكتب موضوع عن ده بس اكتبه انت علشان انا اسلوبى جاف بتاع مقدمات ونتايج وتحليل اكتبه انت ونعرف رأى الناس يا ترى هما كمان حاسين بالتغيير فى ريحة الجو

سبحان الله مش لاقى تعليق مش لاقى كلام مش لاقى تفسير ..لسه الموضوع بنتكلم فيه ومكناش محضرين له فعلا سبحان الله

هلت نسائم الرحمة

يقول رسول الله صلى الله عليه وسلم

إِذَا دَخَلَ رَمَضَانُ فُتِّحَتْ أَبْوَابُ الْجَنَّةِ وَغُلِّقَتْ أَبْوَابُ جَهَنَّمَ وَسُلْسِلَتِ الشَّيَاطِينُ رواه البخاري ومسلم

الجنه فتحت ابوابها يا مسلمين ..رمضان كريم عليكم جميعا وعلى الامة الاسلامية

وده لينك جميل جدا لصفحه فيها احاديث عن شهر رمضان

http://www.cultnat.org/new%20site_ar/Ramdan_Web/Ramadan_Religion_Hadith.html

كل عام وانتم بخير

وشكرا للزميل ابن حجر الذى جائنى باللينك وهو صاحب الفكره وقد شاركنى فى اعداده .فهو من اعداده وتقديمى

استئذان فى التدوين

السلام عليكم و رحمة الله و بركاته

أود أن أستأذن الجميع فى أن أبدأ فى التدوين على مدونة الأخ الكريم الباحث عن الحقيقة .. فقد شرفنى و دعانى بأن أشارك جمهور المدونين فى عرض وجهات نظرى فى الأمور المختلفة على مدونته الرحبة.. فاقبلونى بينكم عضوا جديدا

أرجو من الله العون و الهداية و أرجو من الجميع الدعاء و النصيحة

أشكرك سيدى الباحث على استضافتك لى شكرا جزيلا

الصحيفة الكاشفة

بسم الله الرحمن الرحيم

(( ربنا افتح بيننا وبين قومنا بالحق وانت خير الفاتحين ))

الاخوة الاحباب : السلام عليكم ورحمة الله وبركاته

أقدم لكم - مستعينا بالله سبحانه وتعالى - هذه الصحيفة (الكاشفة) نورا وتبيانا -اجمع فيها اشلاء الحق المتناثر هنا وهناك

حتى لا يضيع تحت أقدام العابثين والحاقدين وذوى الصوت والسوط ممن علا صوتهم ليسكتوا به صوت الحق , وعلا

سوطهم ليرهبون به اهل الحق

فقد أبتليت أمتنا بالصنفين

ذوو الصوت ..الذين علا صوتهم يدعون الناس إليهم ,يدعون انهم اهل الحق والحقيقة , ويرهبونهم بفتاوى التبديع والتفسيق والتكفير

وذوو السوط ..من اهل السلطان الجائر الذين يعمدون بسلطانهم الى اخفاء الحقائق , والتدليس على قومهم

ولن ننسى هؤلاء العابثين المشككين الذين يفتنون المسلمين فى دينهم من اهل الزندقة والالحاد

نشير اخيرا الى اننا لسنا اتباع مذهب معين او جماعة او حركة ما ,بل نحن باحث عن الحقيقة ,كما قال صلى الله عليه وسلم (( الحكمة ضالة المؤمن آنى وجدها فهو اولى الناس بها )) ومرحبا بكل قلم يعيننا فى البحث والتحرى والكشف عن الحقائق

والله المستعان