Sunday, August 31, 2008

أمى ... و القرآن

كل عام و أنت بخير يا جماعة .. و ربنا يتقبل منكم الشهر الكريم

اتأخرنا عليكم فى المواضيع .. بس معلش اعذرونا .. الدنيا مشاغل .. أنا مش عارف هل لسة فيه ناس بتتابعنا و لا لأ .. لكن على العموم إحنا نرجو لكم التوفيق فى هذا الشهر الفضيل

نيجى للموضوع

أمى ست كبيرة جاوزت الستين من العمر .. و اسمها فاطمة .. أيوة أنا ما باتكسفش من ذكر اسم أمى .. بالعكس بابقى فخور باسمها.. أمى لم تكمل المرحلة الابتدائية فى التعليم .. خرجت من سنة خامسة ابتدائى و ما كملتش السنة السادسة الابتدائية لكن بتعرف تقرا و تكتب على بسيط .. إلى جانب إنها نظرها الضعيف و مابيخليهاش تقدر إنها تستغل قدرتها البسيطة على القراءة فى إنها حتى تقرأ خبر فى جريدة أو عنوان فى نشرة أو ما إلى ذلك


نسيت صحيح أقول لكم إنها عندها خشونة فى المفاصل و دة مخليها مابتقدرش تمشى مسافة أكتر من حوالى مائة متر إلا لما لازم تقعد عشان تستريح شوية .. و كمان مابتقدرش تعدى الرصيف اللى فى الشارع إلا بصعوبة شديدة أو لما تسند على حد .. أمى أصلا لما بتعمل لنا الأكل فى المطبخ مابتقدرش تقف على رجلها كتير .. هى حاطة كرسى فى المطبخ .. فتعمل جزء من الأكل و تروح تستريح شوية و هكذا


كل الكلام دة ليه ؟؟


أصل من حوالى عشر سنين فتح جنبنا مسجد كبير و المسجد دة عمل معهد لتحفيظ القرآن بحيث إن الواحد يقضى فيه ست سنوات و يتخرج حافظ القرآن كله يعنى يحفظ فى السنة خمسة أجزاء .. المسجد دة عامل برضه قسم لتحفيظ الأميين بس دول بيحفظوا جزئين فقط فى السنة

أمى من حوالى أربع سنوات قالت لى إنها عايزة تشترك فى حلقات تحفيظ القرآن دى ... أنا قلت فى بالى إنها مش هاتقدر تكمل عشان المشوار بتاع المسجد هايبقى متعب ليها إلى جانب إنها فى القراءة العادية بتلاقى صعوبة .. طب هاتعمل إيه فى قراءة القرآن اللى محتاجة حرص و مهارة فى إخراج الألفاظ و ما وراء ذلك من الأحكام من مد و إضغام و إخفاء و إظهار ... و ترقيق و تفخيم .. حاجات كتيرة مش سهلة

إلى جانب إن أنا نفسى اشتركت فى المسجد دة بس قضيت عدة أشهر فقط حفظت فيهم جزء "عم" اللى أنا حافظه أصلا و ماكملتش عشان كنت ابتديت اشتغل

أنا قلت خلاص .. أعمل لها اللى هى عايزاه و اشترك لها فى المسجد و أنا متوقع إنه هاييجى يوم و تقول لى إنها مش قادرة تكمل

بدأت أول سنة .. و ما أقولكوش على كمية المجهود الضخم اللى أمى بذلته عشان تقدر تقرا سور جزء "عم" بشكل مناسب .. الفتح و الضم و الكسر و التسكين و التشديد للحروف كان بالنسبة لها حاجة مرهقة جدا دة بجانب إن نظرها ضعيف .. و ابتدت تصدع من وقت للتانى .. و نسيت أقول إن المسافة بين البيت و بين المسجد حوالى مائتى متر و فيهم ثلاثة أرصفة عالية ... يعنى المشوار اللى بيتكرر مرتين أسبوعيا بالنسبة لها يعد مشوار غاية فى الإرهاق .. مرة سمعتها بتتكلم مع إحدى قريباتنا و بتقول لها إنها لما بترجع من مشوار المسجد دة بتبقى خلاص عايزة تبكى من الألم


المهم .. قلنا نعمل لها نضارة للقراءة عشان تتمكن من القراءة بسهولة و الصداع اللى بيجيلها دة يخف شوية ... و الحمد لله .. النضارة جابت نتيجة .. و بقت تقريبا كل أوقات فراغها بالاقيها ماسكة المصحف و بتقرا فى الكام سورة اللى أخدتهم .. و لما عرفت إنها ممكن تصلى السنن و هى بتقرا من المصحف كانت سعيدة جدا و بقت تقرا و هى بتصلى السنن السور اللى
محتاجة حفظ كتير


و مش بس أوقات فراغها .. كمان فراغات وقت ماهى مشغولة .. يعنى لو بتسخن مية مثلا عشان تعمل لنا مكرونة .. ألاقيها حطت حلة المية على النار و تجيب المصحف تقرا آية و لا اتنين و تبذل مجهود ضخم عشان تقراهم .. بعد كدة تقفل المصحف و تقوم تكمل عمايل المكرونة

و لو يوم المدرسة بتاعتهم فى المسجد غابت .. ألاقيها راجعة تطلب منى إنى أقرا لها الجزء المتوقع إنهم ياخدوه المرة الجاية عشان تبقى مستعدة

لكن بجد بقت تصعب عليا جدا فى امتحانات الشهر أو آخر السنة .. أنا بقيت أشوف أمى خايفة لاحسن ما تعرفش تسمع كويس .. و تقعد تسهر تحفظ و تقرا و تشكيلى إن السورة دة كلماتها صعبة ... أو الآية دى شبه آية تانية و بتلخبطها .. و لا لما ترجع من الامتحان و هى مرهقة من المجهود الذهنى اللى بذلته .. و لا لما تبقى فرحانة و طايرة من الفرح لما تجيب درجة عالية .. أو تبقى متضايقة إنها حصلت على درجات أقل من اللى بيحفظوا معاها

كذا مرة جبنا لها أنا و اخواتى هدايا عشان جابت درجات عالية .. كانت فرحانة جدا

الغريب إن الوضع بينا و بين أمى اتقلب .. زمان كان هى اللى بتهتم بينا و بمذاكرتنا و بتقلق علينا لما نروح نمتحن أو نشوف النتيجة .. دلوقتى بقت هى اللى بتخوض الامتحان و احنا اللى بنقلق عليها .. بالفعل وضع غريب

زمان لما أمى كانت تزن عليا و تقعد تقول لى: ذاكر ذاكر .. كنت باقول لنفسى هى بتزن عليا عشان الكلام بالنسبة لها سهل .. أما لو جت مكانى و قعدت تذاكر هاتبقى عايزة تهرب من المذاكرة بأى شكل .. لكن الزمن أثبت لى إن أمى عندها عزيمة ماضية .. لأنها فى الأربع سنين دول .. بعد ما كانت حافظة الفاتحة و المعوذتبن و الإخلاص و العصر فقط و كانت بتصلى بيهم كل صلواتها و بتقراهم فى كل مناسبات حياتها .. هى دلوقتى حافظة ثمانية أجزاء من القرآن الكريم

44 comments:

مهندس مصري said...

ربنا يبارك لك فيها و يخليها لك و تكمل حفظ القرآن كله ان شاء الله
يارب
أمانة توصل لها السلام
:)

مع اصرارى said...

اللهم صلى على حضرة نبيك سيدنا محمد الهادى الأمين
تلك هى العقيدة الخالصة والإيمان الصادق والمعرفة الجلية

بلغ سلامى لأمى
مع أحب التحيات
السلام عليكم ورحمة الله

عصفور المدينة said...

تكبدت مشقة كبيرة لأكتب هذا التع م الموبايل ولكن ذلك لايوفي هذه المرإة حقها حفظها الله. احفظ ياكسلان

عصفور المدينة said...

تكبدت مشقة كبيرة لأكتب هذا التع م الموبايل ولكن ذلك لايوفي هذه المرإة حقها حفظها الله. احفظ ياكسلان

عصفور المدينة said...

بالمرة ادعو اللهم أمتنا على دين العجائز

mony said...

بسم الله ماشاء الله


اللهم بارك


ربنا يبارك لها في حفظها و يثبتهلها

و يجعلها من اهل الله و خاصته


اللهم آمين

نهر الحب said...

الله عليك يا عسقول
بجد بارك الله فيك وفيها
تقولى فيا ليه اقولك لانك فخور بأمك بشكل جميل وطيب ( طيبة من طيبة الاسلام وجمالة )
بجد الحاجة فاطمة مثال جميل للست المسلمة اللى بتحاول تتقرب من ربنا وبتحرص على قرأة كلماتة بارك الله فيها وقر عينها برؤية النبى صلى الله عليه وسلم وقر عينها فى الدنيا بكم

بارك الله لكم فيها وبارك لها فيكم


كل عام اونت بخير
رمضان كريم

الطائر الحزين said...

والله يا أخى أمك هذه حجه علينا جميعا
ولقد يسرنا القرآن للذكر فهل من مدكر

(اسمح لى أن أضع هذه التدوينة عندى)

صاحب المضيفة said...

الله أكبر على العزيمة والاصرار


بوس لي ايديها وقلها تدعي بجد يا عسقول


ربنا يبارك لك فيها يارب ويجعلها نوارة البيت دايما

Doba said...

بسم الله ماشاء الله
لقد أقشعر بدنى كله لحكاية الغالية فاطمة

ربنا يبارك فيكم
ويحفظها لكم ويثيبها خيراً بحق عملها الجميل

ربنا يدينا القدرة والمقدرة للعمل مثلها والأقتداء بها
==========
برده بتكتب حلو قوى بشكل مريح
ويدخل القلب مباشرة
====
كل سنة وانت واسرتك بكل الخير
ورمضان كريم

تحياتى
هبة

appy said...

يعنى اول مرة اجى هنا اتحرج كده ربنا يسامحك بقى كل سنه وانت وهى بخير
انضم للصف بتاع الكسلانين واحفظ بقى علشان انا وشى جاب ميه لون

ابن الإخوان والأزهر said...

ايه ده ياعم

ده أمك دي باين عليها جبل

تصدق لازم أقوم إن شاء الله أراجع دلوقت
على رأي الطائر الحزين أمك حجة علينا

ňįĝŗő said...

عارف يا محمد
لما كنت معايا بتوصلني لمحطة المترو
جالك اتصال وقتها من والدتك
فيه جزيئية عجبتني فيك جداً
بتقول لوالدتك يا "أمي"
مش بتقول لها ماما مثلاً
انت عارف عجبتني ليه
لأن مفيش كلمة بأحس فيها بكم الحنان و التقدير و الفخر بالمعنى ده "ألا و هو معنى الأم" غير كلمة أمي
و اتمنيت لحظتها لو اني انادي أمي كده
كلماتك عن "أمك ... و القرآن" أدمعت عيني بإبتسامة طالت
بارك الله في أمك
بارك الله لك في أمك
بارك الله لكم في أمك

محمد يا ... ابن حجر العسقلاني
إني أحبك في الله

كلماتك الجميلة العطوفة الهادئة استفزتني إني أخرج من الشرنقة الرمضانية و أعلق عليها

ربنا يبارك فيك
ربنا يبارك فيك



يلا سلام

الباحث عن الحقيقة said...

ياخويا قاعد تشكيلي عن مدى تعب والدتك ربنا يحفظها
قلت هو الواد فتحها شئون اجتماعية من ورانا ولا ايه
انما كل ده علشان توضح لنا انه رغم مدى هذا الارهاق هذه الام العظيمة عندها اصرار انها تحفظ كتاب الله بينما شباب زي الحيطه مش حافظ غير جزء عم ..واخد بالك انت
تحياتي لامي ام ابو العساقيل
وقولها لو فكرت تدخل معهد اعداد الدعاة علشان تطلع على قناة الناس ..قولها مدرس الفقة موجود الحصة بطبق مكرونه
نيهاهاهاها
بطلت تضحك الضحكة دي ولا لسه شغال؟
سلام يا قهوجي

عاشــــــ النقاب ـقــــة"نونو" said...

السلام عليكم
حمد الله على السلامة
ورمضان كريم وكل عام وانتم بخير
سلام كبير وقبلة بين عينيها امانة توصلها لماما وتوصيها تدعيلي وتدعي لولادي
يوسف سبقها بجزء
باذن الله رمضان الجاي تختم ويختم يوسف الحفظ للقران كله
واعمل وليمة لهم مع بعض مامتك امنا كلنا ويوسف
ولازم تحضر باذن الله وماما هاجي اخدها بنفسي
ورمضان كريم وربنا يبارك لنا فيها يارب

Soul.o0o.Whisper said...

السلام عليكم و رحمة الله و بركاته

إزيك يا باشمهندس ؟؟ أخبارك ايه؟؟
كل سنة و انت طيب ورمضان كريم


معلش عارفة إنى أتاخرت فى التعليق على البوست بس معلش
والله

المواصلات بقى و كمان لسه ماهنيتش بقيت المدونين و شكلى بقى وحش خالص


بس ياللا معلش ... اكيد مسامحنى ..صح؟؟


بجد ما شاء الله على والدتك
ربنا يحفظها يارب
و يقويها

بتفكرنى بوالدتى والله
بس هى لسه ماكملتش الستين
و هى متعلمة عشان كدا الحمد لله ربنا من عليها و حفظت القرآن كله
فى خمس سنين

و كمان ربنا يبارك لنا فيها يارب
قعدت أربع سنين تقريبا عشان تاخد السند
و الحمد لله أخدته قبل رمضان مباشرة

و أنا الحمد لله محلك سر
تصدق والله شكلنا وحشششششششششششششششش
و مش عارفة هنحس على دمنا امتى؟؟!!..

ربنا يرزقنا همة كدا
و يوفقنا لطاعته يارب



خالص تحياتى لك وللوالدة الغالية

جنّي said...

السلام عليكم

بارك الله في والدتك ومتعها بالصحة والعافية وتقبل الله منها ..

سلامي للباحث

وياريت تكون بلغته سلامي الذي تركته له في الاستراحة وقوله : من السهل على الانسان ان يجد صديق ولكن من الصعب ان يحافظ عليه .. وانا لازلت محفظ على اخوتي وصداقتي فأين هو ؟؟؟
سعيد

Ahmed Al-Sabbagh said...

ياااااااااااه

انت متأكد ان انت بتتكلم عن مامتك ؟؟

مش عن امى انا ؟؟

ده شكلهم قرايب اوى يا جدع فى كل حاجة

بجد انا مبسوط اوى بالبوست ده

ربنا يكرمك يارب

ويكرمها ويديها الصحة

الباحث عن الحقيقة said...

جثى
ابو السيد
حد برضه ينسى احبابه
معلش يا استاذنا انا جيت القاهرة ودخلت المفرومه
ووحداني يا عيني
قريبا بإذن الله استعيد نشاطي
دعواتكم لنا
وتحياتي لكل من يسأل عني
واخص بالذكر الدكتورة ايمان اللى ما عبرتناش

Soul.o0o.Whisper said...

الباحث

و بعدين هنتشاكل مع بعض تانى

دا أنا دخلت مخصوص أقولك كل سنة و أنت طيب
و دخلت هنيت أبو العساقيل

و دخلت ردين على البوست
و أنت ماشفتش كل دا


و بعدين اسأل الوسيط و أنت تعرف إذا كنت عبرتك و لا لا

ماشى


معلش يا بشمهندس
بس اعتقد يعنى مشش هتمانع لو اتخانقت مع الباحث هنا ...صح؟؟

على الاقل هتحجز بينا
;)


و بردوا تحياتى ليك و للباحث
هه ....بس



<< قال يعنى هو عبرنى و لا زارنى ..ماشى يا باحث لما أشوفك بس

همس said...

ماشاء الله

اللهم لا حسد

انا خايفه على والدتك من عين تكون نص كم كدا

ربنا يباركلك فيها ويحفظهالكم

تحياتى

أبو على said...

طول المده اللى فاتت دى وانا مكنتش اعرف اسم الحاجه فاطمه على كل حال ربنا يتقبل ويجزيها بالقرآن خير الجزاء فهو الركن وإن خانتك أركان

صبرني يارب said...

ما شاء الله ربنا يحميها يارب
ويخليها لك يا عسقلاني ويكرمك بها وفيها
واكيد الادوار بتتبدل ويا بختها وبوسلي اديها

سومه...مجنونه فى بلد عاقل said...

ربنا يبارك ليك فيها ويديها الصحه والعافيه جدتى نفس الوضع دا برضوا بتمتحن بس على كبر واحنا اللى بندعيلها :))
يعنى الموضوع اتقلب
قبل لى يدها فانها نعم الام
اه انا كنت كتبت شكر ليك عند باحث مش عارفه شوفته ولالا بس عموما اقولك تانى جزاك الله كل خير على يوم ابو الريش تحياتى ليك سومه_87

جنّي said...

السلام عليكم


تقبل الله منا ومنكم الصيام والقيام ايمانا واحتسابا لوجه الله الكريم

وعفا الله عنا وعنكم في ليلة القدر

بت خيخة وأى كلام said...

شكلي زبااااااااااااالة

انت كاتب البوست ده تقريبا من شهر وانا لسة عارفة النهاردة

ابقى قولى اعمل الرايدر ده ازاي



ربنا يباركلك فى والدتك يارب يا عسقول

والدتك ست عملت اللى عليها
ربتك انت واخواتك تربية كويسة
والحمد الله طلعتكم احسن الناس

دلوقتي هي بتعمل حاجة لنفسها بقى

عارف اللى بيكافئ نفسه
عل حاجة حلوة هو عملها

وانا صغيرة شوية
لما كنت اذاكر كويس
اكافئ نفسي باني اكل شكولاتاية واشرب ازازة بيبسي

مامتك دلوقتي بتكافئ نفسها
بانها تحفظ القرأن

هى عملت حاجة حلوة اوى لما ربتكم كويس
ولازم تكافئ نفسها بحاجة حلوة اوى بأنها تحفظ القرأن


بس ياااااه عليها
شوف اد ايه الموضوع صعب عليها صحيا وفيه مشقة
الا انها ما زهقتش ولا ملت ولا كسلت فى يوم

ربنا يديها الصحة وطول العمر
وتفرح بيوم حفظها للقرأن كاملا
ان شاء الله

البوست ده مليان طيبة اوى
طيبة منك يا عسقول
وكمان طيبة الست والدتك

ربنا يخلهالكم يارب


تحياتي ليك
اختك خيخة

أختكم فى الله said...

السلام عليكم

ما شاء الله عليك

ربنا يبارك فيك وفى والدتك ويعطيها الصحة والعافية

ويخليهاك يا رب

وتدخل الجنة بيها وهى تدخل الجنة بيك

كل السلام والتحية لوالدة حضرتك

ابن حـجـر الـعـسـقـلانـى said...

مهندس مصري

الله يخليك يا هندسة ... و الله قلت لها تدعى لكل الناس .. أهم حاجة بس انت تدعى لها .. و يا رب نشوفك على خير

-------------------------------------

مع اصرارى

و عليكم السلام ورحمة الله
الف شكر على الكلام الجميل ... ربنا يكرمنا كلنا

-------------------------------------

عصفور المدينة
أستاذنا عصفور المدينة

و الله قلت لأمى تدعي لحضرتك بالاسم .. و قلت لها كذا مرة .. و بجد كنت سعيد جدا إن حضرتك علقت من الموبايل .. ربنا يحفظك يا أستاذنا و يتقبل منك الشهر الكريم

حاضر يا أستاذنا .. هاحاول أحفظ من هنا و رايح

اللهم أمتنا على دين العجائز
اللهم آمين

-------------------------------------
mony

الله يحفظك .. أشكرك بشدة على الكلام و الدعاء الجميل ... و ربنا يتقبل منك رمضان يا رب

-------------------------------------

نهر الحب

الله يخليكى يا نهر الحب .. بجد كلامك جميل و يبعث على الأمل و يدفع على الفعل
بالفعل أنا فخور جدا بأمى .. و بجد حاسس بالحرج من نفسى أمام اللى هى عملته

و بجد أشكرك جدا جدا على الدعاء الجميل اللى دعيتيه لأمى و اللى باين إنه طالع من قلبك بصدق و إخلاص .. و أرجو من الله لك بمثل ما دعوتى لنا و أكثر

و يا رب يتقبل منك رمضان و يجعله فى ميزان حسناتك أضعافا مضاعفة

-------------------------------------

الطائر الحزين

و الله يا طائر أنا نفسى محرج من المجهود اللى هى عملته .. لأنى ماعملتش جزء و لو بسيط من اللى هى عملته .. ربنا يعيننا على العمل

و أنا باعتذر لك لأنى اتأخرت فى الرد .. و أنا ماعنديش مانع أبدا إنك تاخد التدوينة .. بس مش عارف لسة هاينفع و لأ ... أنا بجد آسف على تأخرى

و بارك الله فيك و تقبل منك الشهر الكريم

-------------------------------------

صاحب المضيفة

الله يكرمك .. و الله قلت لها تدعى لكل الناس اللى علقوا .. ربنا يكرمك يا رب

جزاك الله خيرا على كلامك الجميل .. و افتكرنا فى دعواتك
-------------------------------------

Doba

أشكرك يا دوبا على كلامك الجميل .. و بجد أشكرك على دعائك لوالدتى

و كل سنة و انت بخير بمناسبة رمضان و بمناسبة العيد كمان

فى رعاية الله

-------------------------------------

appy

يا آبى انت تيجى فى أى وقت و أى مكان .. و الله أنا كمان محرج من نفسى قدامها .. و نفسى أكسر الكسل دة و أعمل اللى هى عملته

-------------------------------------
ابن الإخوان والأزهر
الله يخليك .. و ألف شكر على كلامك الجميل .. ربنا يعينا على حفظ كتابه الكريم .. و يعينك على مراجعته وحفظه فى القلب
-------------------------------------
nigro
يا نيجرو انت انسان محترم جدا .. و كلماتك رقيقة و مؤثرة جدا .. بجد مش عارف أقول لك إيه .. بجد متشكر جدا على الدعاء اللى واضح جدا إنه طالع من قلبك

و الله يا نيجرو انا باعزك جدا .. و باحبك فى الله
و يا رب تكون أعمالك فى رمضان مقبولة .. و كبيرة قوى عندى إنك تقطع خلوتك و تعلق على الموضوع .. هاكلمك فى العيد إن شاء الله

-------------------------------------
الباحث عن الحقيقة

يا باحث انت داخل تدعى للحاجة و لا داخل تخبطنى كلمتين فى جنابى .. يا باحث هو انت كنت بتدى دروس فقه فى مقابل طبق طبيخ و لا إيه ؟؟ إحنا هنا بندى دروس فى مقابل قفص طماطم

و ماشى يا باحث ... لما أشوفك
-------------------------------------
عاشــــــ النقاب ـقــــة"نونو"

و عليكم السلام و رحمة الله و بركاته
تقبل الله منا و منك رمضان .. اللهم آمين

ما شاء الله .. ربنا يخلي لك يوسف .. و يتم القرآن كله حفظا و عملا و استيعابا و خلقا

بارك الله فيكى و فى أسرتك .. عزومة مقبولة إن شاء الله .. و ربنا يبارك فيكم جميعا .. و جزاكى الله خيرا على التعليق الجميل

-------------------------------------

Soul.o0o.Whisper

و عليكم السلام و رحمة الله و بركاته

إزيك يا دكتورة ؟؟ كل سنة و انت طيبة بمناسبة العيد .. و تقبل الله منك رمضان

انت اتأخرتى فى التعليق .. و انا اتأخرت فى الرد .. يعنى ماحدش أحسن من حد
ما شاء الله .. ربنا يبارك لك فى والدتك .. و يزيدها من فضله و من علمه
و بالفعل .. شكلنا وحش جدا .. و مش عارف إمتى هانكسر الكسل اللى احنا فيه دة

و بجد شكرا على الكلمات الجميلات وعلى الدعاء .. و ربنا يبارك لك يا رب انت و أسرتك و والدتك
و كل عام و أنت بخير

و براحتك .. اتخانقى مع أى حد .. المجال مفتوح للخناقات .. و أنا هاقف حكم .. أى خدمة
-------------------------------------
جنّي

و عليكم السلام و رحمة الله و بركاته

الله يخليك يا جنى .. و ألف شكر على دعائك .. و الله أنا وصلتله سلامك .. و هو كان مشغول جدا و مش عارف يدخل النت .. و بيسلم عليك جدا جدا

و هو كان عايزك تكلمه على رقم التليفون اللى سابهولك

و مرة تانية ألف شكر على دعائك فى ليلة القدر
-------------------------------------

Ahmed Al-Sabbagh

يبدو يا صباغ إن أمهاتنا نسخ من بعض .. و إحنا كمان نسخ من بعض فى الكسل و النسيان .. عايزين نكسر الكسل اللى احنا فيه دة
ربنا يبارك لك فى والدتك يا صباغ

و كل سنة و انت طيب
-------------------------------------

همس

الله يخليكى .. و أشكرك على كلماتك الحلوة .. و على دعائك .. ربنا يبارك فيكى
-------------------------------------
أبو على

حسن ....... أخى فى الله

ما تعرفش أنا سعدت قد إيه لما شوفت تعليقك .. ربنا يحفظك يا حسن .. و بجد جزاك الله خيرا على دعائك لوالدتى .. و يا رب والدتك تكون دايما بخير و بأفضل حال .. و تتم حفظ القرآن الكريم

اللهم آمين

-------------------------------------

صبرني يارب

الف شكر على دعائك الجميل .. و ادعيلى ربنا يعيننى إنى يكون عندى جزء و لو بسيط من إرادتها

و ربنا يجازيكى خير على كلامك الجميل

-------------------------------------

سومه...مجنونه فى بلد عاقل

ربنا يبارك لك فى جدتك .. و يعينها على تجاوز امتحاناتها بنجاح

يا ستى و الله من غير شكر و لا حاجة .. بل احنا اللى نشكركم انكم حضرتم و شاركتم فى اليوم .. و ربنا يتقبله و يجعله فى ميزان حسناتنا جميعا
اللهم آمين
-------------------------------------


بت خيخة وأى كلام

يااااااااااااااااااااااااااااه يا خيخة ... أخيرا علقتى

يا ستى و لا يهمك .. المهم إنك نورتينا

بصى ... أنا هاحاول أعمل لك أكونت على جوجل و بعدها أعمل لك أكونت على الريدر بتاع جوجل ,, و بعد كدة انت ابقى غيرى الباسوورد

و بخصوص أمى

كلامك دة خلانى أبص للموضوع من جانب تانى .. كأن ربنا هو اللى كافئها إنها تحفظ كلامه لأنها تعبت معانا قوى

و بجد بجد .. أنا ماعرفش إزاى هى بتروح الجامع و بترجع .. هى عندها عزيمة ماضية .. دى دلوقتى مابقتش تقدر تمشى زى زمان .. و بتاخد أدوية خشونة المفاصل .. و لو يوم نسيت تاخد الدوا .. بتتعب جدا جدا

أنا نفسى ربنا يقدرها و يخفف عنها الألم عشان تقدر تروح الجامع بسهولة

و يا خيخة و الله انت بجد اللى إنسانة طيبة و مش خيخة أبدا .. و عشان كدة هحاول أسرب لك كحكتين من اللى أمى عملته السنة دة .. أصله طلع كحك جبااااااااااااار .. ماحصلش
-----------------------------------

أختكم فى الله

و عليكم السلام و رحمة الله و بركاته

بجد دعائك جميل جدا .. أشكرك عليه بشدة .. و أرجو لك من الله بمثل ما دعوتى لنا و أكثر

بارك الله فيكى و تقبل الله منك الشهر الكريم

مهندس مصري said...

ملحوظة رفنوعة يا عسقول
أمال إزاي خيخة عندها مدونة من غير جوجل أكونت
:)
لازم يكون عندها جوجل اكونت علشان تشترك في بلوجر
حتى لو الأكونت ده بأي إيميل و مش شرط يكون جي ميل

ركز يا هندسة
هو انت مش باين في الماسنجر ليه اليومين دول ؟

مجداوية said...

السلام عليكم
كل عام وأنتم بألف خير وعيد سعيد ان شاء الله

الباحث عن الحقيقة said...

مجداوية
كل سنة وانتى طيبة يا ابله
سعيد اوي بزيارتك انا رحت مدونتك امبارح مالقتش موضوعات جديده قلت جايز منقطعة في رمضان
دعواتك يا مجداوية
وكل سنة وانتى طيبه

أنت...وأنا said...

السلام عليكم
الصراحه حاجه جميله كالحلم ماشاء الله عليها ربنا يديها الصحه والعافيه وتكمل حفظ القران كله

دعوة الفردوس said...

أخي بارك الله في والدتك وجزاها الله خيرا كثيرا

فعلا هي أحرجتنا كلنا وبالفعل هي حجة علينا كما قال أحد الأخوة
سبحان الله يسر الله القرآن للتلاوة والحفظ والتدبر ولكن من يتكبد المجهود لينال هذا الشرف؟
الأمر بالنسبة لنا يسير من حيث القراءة والصحة ولا نفعل واحد على عشرة مما فعلته أمنا-والدتك-وغيرها

جنّي said...

السلام عليكم ورحمة الله وبركاته

عيدكم مبارك

تقبل الله منا ومنكم
وكل عام وأنتم بخير
كل عام وأنتم من الفائزين
كل عام وقد حصدتم الجائزة
كل عام وأنتم ترفلون في ثوب الفرحة
كل عام وانتم مقبولون الصيام والقيام
كل عام وقد عفا الله عنكم في ليلة القدر

كل عام وأنتي منصورة يا أمتي

أخوكم
سعيد

dreem said...

ما شاء الله لاقوة الا بالله

ربنا يخليها ويديلها الصحة
كل سنة وانتم طيبين يا باحث
وابقى وصل المعايدة للحاجة فاطمة
تحياتى

نهر الحب said...

اللهم زد هـــــــذا الوجه نورا
واجعله دائـما مأجورا
وبلغه العيد مسرورا
امين يارب العالمين
عيد سعيد

Soul.o0o.Whisper said...

عسقوووول

كل سنة و انت طيب
و عيد سعيد عليك و على الامة الاسلامية كلها


شكرا يا فندم
ماتحرمش من خدماتك أبدا

:)

خالص تحياتى

rhf said...

سبحان من هداني لهذه التدوينة الرقيقة
أحسها رسالة من الله لي بإكمال حفظ القرآن وبث روح المثابرة واالعزيمة والقوة على مواصلة ذلك
فلا حجة لنا بعد هذه التدوينة
لا عذر أبدا بعد قراءة هذا الموضوع
.....
بارك الله في أمك وجزاها عنّـــا خير الجزاء وأعانها و وفقها وأقر عينها بك وبإخوتك
خالص تقديري وامتناني لها
تحياتي

عاشقه الفردوس said...

ماشاء الله تبارك الرحمن

بجد خلتني مبسوطه اوي من التدوينه دي

بارك الله فيها يارب واتم عليها نعمه العزيمه وشفاها الله وعافاها وطهرها بمرضها هذا من الذنوب والخطايا

انت فين بقي من والدتك
لازم تتشجع علي فكره الشغل ده مش حجه تستند عليها
لو عايز تحفظ هتحفظ



علي فكره الموضوع ده فكرني بامي اوي

هي كمان من حوالي 8 سنوات كده بدات تبكي كتير اوي
واقولها مالك تقولي بقرأ القران بس حاسه انه تقيل عليا اوي

علي فكره امي متعلمه وبتشتغل في اادراه مدرسه ابتدائي
بس برده الموضوع كان مشقه عليها خصوصا القران

سبحان الله استحملت استخفاف اخوتي الصغار وهما بيصلحولها وانا كنت بقعد معاها ونقرا سوا بس كنت كتير مش بقدر اقعد معاها علشان دراستي

فقالت لا انا عايزة المصحف المعلم واشترته شرايط علشان لو جابته سيديهات هتبقي برده تحت سيطرتنا


والله بقت ماشاء الله ليها وهي اللي بتصحح لاخواتي كمان وكمان بقي عندها همه عاليه انها تحفظ قران

وفي سنه كانت خلصت جزء عم وتبارك من قرائتها لهم في الطريق
كانت بتاخد طريقها من البيت لمدرستها مشي علشان تحفظ صفحه وهي راجعه بتراجعها


بعد ماكان مشوارها لمدرستها غايه في الملل بقي اصح غايه في السعاده انها تمشي لوحدها وتختلي بنفسها في الطريق

اسفه للاطاله
و
انت فين من القرآن؟؟؟؟!!!!!و

مجداوية said...

السلام عليكم

بالله عليك أخى الكريم أن تبلغ والدتك السلام منى وتقبل يدها ورأسها وتقول لها
وما يلقاهاالا الذين صبروا وما يلقاها الا ذو حظ عظيم
فهنيئا لها ان شاء الله وبارك الله فيها
وأخبرها أنها أصبحت ملهمة لى وقدوة حسنة
ما شاء الله ولا قوة الا بالله

المستنصر بالله said...

ماشاء الله
ربنا يبارك فى والدتك ويعنيها على تكمله الحفظ
بلغها سلامنا
ونسالها الدعاء

تحياتى لحضرتك

ojg said...

تصدق لو قلتلك اني مش عارفه ابطل دموع؟؟
بجد ربنا يحفظها وينفعها بما حفظت ويزيد حفظها ويباركلها
عارف والله العظيم والله العظيم انا دلوقتي حالا نفسي اشوفها وابوس ايديها
اول مانت اديتلي الموضوع عشان اقراه
ماكملتهوش لظروف خارجه عن ارداتي
وكذا مرة حصل نفس الموضوع
ادخل واقرا اول سطرين وامشي
دلوقتي لما قريته على بعضه
حاسه ان والدتك ووالدتي وناس كتير بجد دول بجد حاجه كبيرة قووووووووي
بجد
ربنا يخليهالك
ويخليلي أمي
اللهم آمين
عسقول
بالله عليك سلملي عليها
قولها بنتك وزة بتقولك ربنا يخليكي يارب ويباركلك في كل اللي بتحبيهم

رصاصة طـائشة said...

اكيد كل حرف بتقراه وكل خطوة ناحية المسجد تثاب عليها اضعاف

ان كان العامة يللي بيجيدوا القراءة والكتابة بيثابو ع الحرف بعشرة امثاله
فما بالك بهذه السيدة الفاضله المتعبة المسنة
تكد وتتعب وتثابر وكأنها تناضل
بارك الله لك فيها وبارك لها فيك

بوست اكتر من رائع

مودتي

سلوى said...

ما شاء الله
ربنا يحفظها ويديها الصحه وطول العمر