Sunday, March 2, 2008

المدرسة فتحت والحضور بالملابس الرسمية

بسم الله الرحمن الرحيم
دار الكاشفة للثقافة الاسلامية
الدرس الاول : الحكم الشرعي
مقدمه
محدش يتخض..كملوا يلا
الحمد لله نقدر نقول فيه صحوة دينية بين الشباب ومن اهم مظاهرها هو حب العلم والمعرفة الدينية
علشان كده هنتعلم سواء بعض الامور المهمه لكل مسلم وهى ازاى نفهم الاحكام الشرعية - علشان نكون على وعي بما نقراه وبما نسمعه
وكيف يستنبط الفقيه والمجتهد الحكم الشرعي ومعرفة الحلال والحرام
الفقيه المجتهد مش بيجتهد كده ويقول ده حلال وده حرام بمزاجه او لمجرد ان قرا كتاب فى السيرة او كتاب فى الاحاديث وانما ده علم له اصول وهو بناء على معرفته بالاصول دى بيجتهد ويستخرج الاحكام
والاصول التى يجتهد فيها الفقيه لمعرفة الاحكام الشرعية هى احدى عشر : القرآن , السنة , الاجماع , القياس , الاستحسان , المصالح المرسلة , الاستصحاب , الذرائع , العرف , قول الصحابي , شرع من قبلنا
وان شاء الله هنبدا سوا كلام مبسط علشان على الاقل يكون عندنا ثقافة فقهية عامة حول اصول الفقة تمكننا من فهم الاحكام الشرعية
كله يربط الحزام , ممنوع التدخين , الطائرة الان تتحرك وتنطلق نحو اول درس توكلنا على الله
يا رب ما نلاقي برج فى وشنا ده احنا غلابه , استرها معانا يا رب علشان خاطر الولايا اللى معانا
الدرس الاول : الحكم الشرعى
نبدأ الاول نقول اصول الفقة يعنى ايه ؟
هو مجموعة القواعد التى يستنبط من خلالها الباحث الاحكام العملية من ادلتها التفصيلية
يعنى ايه الكلام ده : مجموعة القواعد يعنى المبادئ والاصول او الطريقة التى يتبعها الباحث - والاحكام العملية يعنى المتعلق باعمال الناس والحلال والحرام - انما الاحكام العقائدية فدى لا تدخل ضمن نطاق دراسة اصول الفقه - من ادلتها التفصيلية يعنى الادلة السابق ذكرها زى القران والسنه والقياس والاجماع الخ
يا مسهل يا رب
ندخل على تعريف الحكم الشرعي ونسأل حكم شرعي يعنى ايه؟
الحكم الشرعى هو : خطاب الله المتعلق باعمال المكلفين على جهة الاقتضاء
وجهة الاقتضاء يعنى زى ما يقولك الامر يقتضي منك ان تفعل كذا او لا تفعل كذا
او على جهة التخيير - يعني الاباحة - او الاعم وضعا
والاعم وضعا يعنى وضع امرين وجعل احدهما سببا للاخر او شرطا فيه او مانعا ونعرف ده بالتفصيل يعنى ايه بس واحده واحده
يبقى تعريف الحكم الشرعي هو : خطاب الله المتعلق بافعال المكلفين على جهة الاقتضاء او التخيير او الاعم وضعا
طيب من خلال التعريف ده نقول ان الحكم الشرعي له قسمين
ركز معايا شويه وانتبه لو سمحت
عندى حكم شرعى تكليفي ..وحكم شرعي وضعى
يعنى ايه الكلام ده؟
حكم شرعى وضعي : يعنى هو خطاب الله المتعلق بجعل الشئ سببا او شرطا او مانعا او صحيحا او فاسدا او عزيمة او رخصة
يعنى ربنا هو اللى جعل رؤية الهلال سبب للصوم وجعل الطهارة شرط فى الصلاة وجعل اختلاف الدين مانع من الميراث ..وهندرس بعدين ايه الصحة والفساد والرخصة والعزيمة
واحده واحده مش بحب الاستعجال
.
نرجع للقسم الاول من اقسام الحكم الشرعي وهو الحكم الشرعي التكليفي
معناه ايه : هو خطاب الله المتعلق بافعال المكلفين على جهة الاقتضاء او التخيير
وقلنا اقتضاء يعنى يقتضى طلب الفعل او الترك والتخيير اللى هو الاباحة
ومن خلال التعريف ده يا جماعة نقدر نعرف اقسام الحكم التكليفي ..اوعى يكون حد فك الحزام ازعل منه احنا لسه فى مرحلة الاقلااااع
احنا قلنا الاقتضاء يعنى اقتضاء طلب الفعل اوطلب الترك
والطلب له نوعين فيه طلب جازم ومؤكد وفيه طلب غير جازم وغير مؤكد
يبقى الطلب نوعين 2 في الاقتضاء 2( الفعل والترك ) = 4
طلب فعل جازم , طلب فعل غير جازم
طلب ترك جازم , طلب ترك غير جازم
والتخيير = الاباحة
انفع مدرس رياضيات صح ؟
يبقى اقسام الحكم الشرعى التكليفي خمسة اقسام
الوجوب والندب والتحريم والكراهة والاباحة ..الاحكام دى الافعال التى ترد عليها او تتعلق بها بيسموها في اصول الفقة متعلقات الحكم التكليفي
مثال الوجوب يعنى الفعل بتاعه واجب والندب اى فعله مندوب وهكذا ..الافعال ى بيسموها متعلقات ..معلش لو صعبه مش مشكلة المهم اننا نعرف معنى الواجب والمندوب والحرام والمكروه والمباح
الواجب : هو طلب الفعل طلبا جازما يعنى مؤكد وقاطع ..زى مثاال : أقيموا الصلاة
مفيهاش فصال ..اقيموا يبقى اقيموا
المندوب : هو طلب الفعل طلب غير جازم او غير قاطع - وله تعريف اخر وهو ما يثاب فاعله ولا يعاقب تاركه
زي مثال ايه يا جماعة : فإن خفتم إلا تقسطوا فى اليتامى فانكحوا ما طاب لكم من النساء
الحرام : هو طلب الترك او الكف طلبا جازما .. مثال قوله تعالى : لا تقربوا الزنا
المكروه : هوطلب الترك او الكف طلب غير جازم ..مثال الحديث : اذا دخل احدكم المسجد فلا يجلس حتى يصلي ركعتين
المباح : وهو خطاب الله المخير للمكلف بين الفعل او الترك دون ترجيح لاحدهما مثال قوله تعالى : وطعام الذين اوتوا الكتاب حل لكم وطعامكم حل لهم
طيب فيه ملحوظه هنا ..يعنى واحد ذكى هيسأل - مش ذكى جمعة طبعا - هيقول ايه؟
انت قلت قوله تعالى : اقيموا الصلاة واجب
وقوله تعالى : فانكحوا ما طاب لكم من النساء مندوب
طب ده فعل امر والتانى برضك فعل امر
ازاااى اعرف افرق بين الامر امتى يكون واجب والامر امتى يكون مندوب ؟ اعرفهم من بعض ازاى يعنى؟
مش عارف فيه وقت نجاوب ولا ايه
معلش فاصل اعلانى ونعود
الباشنمهندز ابن حجر يقدر ينزل بالكانتين يقلب عيشه وكمان تنفعوا الاستراحة
عدناااااااااااااااااا
عساكم من عواده - ومحدش يسألنى معناها ايه
اجابة السؤال اللى اخدناه قبل الفاصل نقول احنا عندنا قاعدة شرعية بتقول : الامر يفيد الوجوب مطلقا
ما لم توجد قرينة تصرف الامر عن معناه الحقيقى وهو الوجوب
والقرينة دى نوعين
قرينة منصوص عليها ..وقرينة غير منصوص عليها يعنى بنعرفها من خارج النص
هنقول امثله سريعه مثل ايه ؟
يقول تعالى : اذا تداينتم بدين الى اجل مسمى فأكتبوه
فاكتبوه هنا أمر ..يعنى واجب ولا مندوب ؟ قلنا مندوب
طب ازاى عرفنا انه مندوب؟
عرفنا من القرينة؟
ايوه اللى هى ايه القرينة دى ولا فين هي؟
القرينة هى قوله تعالى فى نفس الاية : فإن امن بعضكم بعضا فليؤد الذي اؤتمن امانته
فربنا قال انه عند الامن فلا حرج في عدم كتابة الدين..يبقى الامر كان للندب وليس الوجوب والقرينة هنا اهى منصوص عليها
طب نقول مثال عن القرينة الغير منصوص عليها
يقول رسول الله : دع ما يريبك الى ما لا يريبك
الامر اللى فيه شك النبي قال : دع ..يعنى اترك
طب يعنى هل كل امر انا مرتاب فيه او عندى فيه شك يبقى لازم اتركه زى ما قال الحديث
قلنا فعل الامر هنا دع افاد الندب مش الوجوب
طب ايه القرينة يا عم الحاج؟ عرفتها منين؟
عرفناها بالعقل وهى ان الامر المأمور بتركه مشكوك فيه يعنى قد يكون صحيحا كما قد يكون خطأ واليقين لا يزول إلا بيقين مثله
مثال كمان اهو .. يقول تعالى : فكاتبوهم ان علمتم فيهم خيرا
الامر : وكاتبوهم يعنى اللى عنده عبد يكتب معاه زى عقد كده ان يعتقه مقابل العمل لفترة معينة او ان يصبح حرا بعد وفاة سيده حسبما يتفق
طيب الامر هنا يعنى واجب اى لازم يعمل كده؟
لا مش واجب ولكن مندوب ..
طب عرفنا ازاى ان الامر ده مندوب مش واجب؟
وبعدييين ..انا محبش الغبي ركز معايا اهو كويس
قلنا فيه قرينه والقرينة هنا مش منصوص عليها فى الاية ولكن عرفناها من خارج النص وهى حرية المالك فى التصرف فى ملكه
وان شاء الله الدرس القادم هنتكلم عن بالتفصيل عن كل قسم من الاقسام التكليفية وكمان نقول ليه ابو حنيفة اختلف وقال ان فيه حاجه اسمها الفرض ودى غير الواجب وفيه كمان كراهة تحريمية وكراهة تنزيه
انتظرونا الدرس القادم
واياك حد ييجي متأخر او يفكر ينط من على السور

30 comments:

فرنسا هانم said...

يظهر الموضوع عايز قعده
نحجز

عصفور المدينة said...

السلام عليكم
وفقك الله
والأسلوب ظريف بس الجرعة كبيرة فيما أعتقد وياريت ترسم شكل توضيحي

وأيضا يرجى تصحيح الآية
فإن امن بعضكم بعضا فلا جناح عليكم
مفيش آية كدة

الباحث عن الحقيقة said...

فرنسا هانم
احجزى يا ستى براحتك انا عارفك تحبي تقعدى من قدام
وده مش علشان نظرك ضعيف ولا حاجه لا سمح الله
ويا ريت اعرف رأيكم فى طريقة الشرح والكميه هل كبيرة ولا معقوله؟

................

استاذنا عصفور المدينة
قلي بس نعمل ايه من غيرك؟
ربنا يباركلنا فيك انا قمت بتصحيح الاية
فليؤد الذي اؤتمن امانته
معلش يا استاذنا الدرس ده كله انا كاتبه شفوي من الذاكرة
وبخصوص الرسم التوضيحي انا بعت ابن حجر يجيب طباشير من المكتبة اللى جنبا ولسه مجاش وياريت لغاية ما ييجى تقولى تقصد ايه بالرسم التوضيحى ده؟
والجرعة والله اعلم هى معقوله انما اعمل ايه الدرس هو اللى جامد شوية
مش عارف احذف منه ولا ايه؟
عموما هنراعي ده فى المرات القادمة
وجزاكم الله كل خير

Ahmed Al-Sabbagh said...

السلام عليكم

صديقى واخى العزيز

انا يمكن ما بتحطش تعليقات عندك كتير

لكن متابع جيد جدا لمدوناتك

وكمان بقتفى اثارك فى المدونات

:)

وتعليقاتك عند اصحابنا وحبابينا

بس المرة دى

فى كلمة عايز اقولها اوى بقالى يومين كدة
ولازم اقولها

اوعى ما تمسكنيش

بجد

انت مدوّن محترم اوى

وانا بعتز بيك اوى اوى

وبفرح اوى اما بتنزل بوست جديد او اشوف الكومنت بتاعك فى حتة

بس

هى دى الكلمة اللى كنت عايز اقولها

الحمد لله

كدة اتنفس بقى

:)

بص يا سيدى

احنا بنتقابل فى البورصة الخميس الساعة 6 مساء الكافية ماسكة واحد اسمه طاهر

عموما هبعت لك رقمى على الايميل

وانا ايميلى

ahmed4u21@yahoo.com
ahmed000eg@hotmail.com

لو عندك ماسنجرات ضيفنى

عشان كمان هقولك على لقاء تانى

تحياتى

اخوك

احمد الصباغ

الباحث عن الحقيقة said...

عزيزى احمد الصباغ
انا اول واحد يعلق فى مدونتك
بعدها انا اختفيت انما انت قمت بالواجب وتابعتنا وصادف ذلك فترة انقطاعي لكن انا سعيد جدا بمتابعتك للمدونة واعجابك بموضوعاتها اللى بيكتبها زميلي محمد ابن حجر وعلى فكره انا بحسدك جدا من دلوقتى لو قابلته لانى بالفعل اسعد وقت قضيته فى حياتى فى القاهره كانمع الباشمهندس محمد بن حجر حسيت براحة نفسيه وكانى قاعد مع اخ او صديق من عشر سنين
جايز علشان كنت مشتاق له اوى
سعداء بوجودك فى المدونة يا بطل
اخوك احمد الباحث
ملحوظة : وياريت بقى تركز معايا شويه علشان انا اللى هتلاقينى فى وشك على طول الفتره الجاية خاصة فى الصحيفه
منورنا طبعا يا ابو حميد

ابن حـجـر الـعـسـقـلانـى said...

حاااااجة ساقعة بيبس .. حاااااجة ساقعة بيبس .. أيوة المتلج .. ساندايشتات طعمية .. فول .. قهوة شاى ..حاااااجة ساقعة بيبس
-----


إيه دة يا جدعان .. أنا جاى أسترزق ألاقى الناس بتمسمر فى بعضها كدة

و الله يا صباغ انت ذوق و محترم جدا .. و كمان أحمد الباحث هو السبب فى إنى أدون .. و كان ليه فضل كبير فى إنى أكتب بشكل مناسب .. هو أسلوبه سلس و بسيط و نفسى أقلده و مش عارف

و الله أنا كمان متابعك يا صباغ من زمان لكن كنت مقل فى التعليق .. باجى ألاقينى التمانين و التسعين و أقول أستنى الموضوع الجاى يمكن أبقى فى الخمسينات

و ربنا يسهل و نتقابل .. و يالا أشوفكم أمس

حاااااجة ساقعة بيبس .. حاااااجة ساقعة بيبس .. أيوة المتلج

ابن حـجـر الـعـسـقـلانـى said...

الله ينور عليك يا ابو البواحث .. شكلى كدة هاهريك أسئلة .. بس لما ربنا يسهل و تدخل فى الغويط .. أيوة كدة .. ادى للمدونة حيويتها .. و خلى الدم يجرى فى عروقها

حااااجة ساقعة بيــ.... لأ .. أنا مش جاى أبيع فى التعليق دة

الباحث عن الحقيقة said...

البيبس ده من عندنا ولا شارية من بره
بالنص يااااض
انا مش هسيب الفانلة بتاعتك غير ما تطلع حقي الاول تلت ليا وتلت للمكان وتلت تشترى به بضاعة جديده
وانت كفاية عليك بتتعلم اهو مجانى
اعملكم ايه تانى بقى اقطع نفسى ادينى بتطبق معاكم مجانية التعليم
قولى الجرعة كبيرة والاسلوب وكده منتظر رأيك فى الماسنجر اوكى

فرنسا هانم said...

الاخ احمد
ممتاز
ربطنا الحزام واقلعنا معاك
وطلعنا الفاصل
واشترينا حاجات من ابن حجر اللى انتهز الفرصه وغلا الطلبات
انا مشيت معاك للاخر

واسلوبك مبسط وجميل جدا
لكن هو الموضوع طويل شويه
عارف ليه
لو الموضوع بيتكلم عن اى حاجه
مره واحده من القراءه تفهم او تفهم ثلاث اربعه
او نصه
ولكن الموضوع ده
علشان يدخل الدماغ بجد
وخصوصا لمن لم يقرأه
او لمن لم يعرفه
محتاج قراءه مره واتنين وتلاته
فياريت عدم التطويل بالشكل ده
حتى نقراء كذا مره
حكم انا مخى ضلم حبتين

-
-
-
-
لا انا تعليقى خلص
-
-
-
اه مستنيه ابن حجر يجيب باقى ال 50 جنيه
هو فينا من الحركات دى ولا ايه ؟؟؟؟؟؟

عاشقه الفردوس said...

ايه ده كله
ماشاء الله موضوع روعه

بس انت كده مش عارف ان عندك طلبه علي قدهم

قللنا الكميه بس علشان نبقي شاطرين


جزاكم الله خيرا

دكتور حر said...

المره دي بسجل حضور عشان مش نتاخد غياب من اول يوم دراسة

الساعه الان 3 الا ربع صباحا
لا تصلح لقراءة الموضوع بتاتا

لنا عوده
وحمدالله على سلامتك يا عم احمد

الباحث عن الحقيقة said...

فرنسا هانم
اسفين على تعبك يا هانم
هنعمل ايه الواحد الحماس خده وخلاه يكتب كتير
شكرا لحرصك على الحضور مره تانية والقراءة
فين يااض باقى الخمسين جنية بتاعة خالتك فرنسا

...............
عاشقة الفردوس شكرا لمتابعتك معانا
عموما لو فيه حاجه مش واضحة ممكن اوضحالك فى التعليقات
واشكرك على الانضمام للمدرسة

...........

دكتور حر
اشكرك جدا يا فندم على الحضور
وانا واثق انك هتوفى بوعدكوهترجع تقرا الموضوع
هههه
منتظرك
وجزاكم الله خيرا جميعا
ولما انت تعبانكده ومش لاقى وقت تقرا سهران ليه
ههههه
اشكركم جميعا

المهـ إلي الله ـاجر said...

السلام عليكم

جزاكم الله خيرا علي جهدكم الطيب في عرض علم الأصول بتلك الطريقة السلسة والتي تقرب هذا العلم العظيم لأذهان

وعلم الأصول هو من أحب العلوم إلي قلبي وكنت احب دراسته جداً لانه يشكل قدرة منضبطة من التصور الشرعي للأحكام ومن ثم القدرة علي فهمها وإفاهمها للغير بطريقة صحيحة


وإن كنت اقترح أن تكون البداية بالحديث حو أدلة الاحكام بداية لعرض هذا العلم للقاريء المبتديء حتي يسهل التصور الصحيح


ولمن يرغب في القراءة بشكل سهل أحضرت رابط للكتاب الطيب (الوجيز في أصول الفقه) للدكتور عبد الكريم زيدان جزاه الله خيرا . وهو ايضا الكتاب الذي كنت ادرس منه

علي ها الرابط http://ia341213.us.archive.org/0/items/wfofaz/wfof.pdf

جزيتم خيرا ونفع الله بكم ان شاء الله

رفقة عمر said...

ماشاء طريقه شرح جميله قوى
اصول الفقه بجد دراسته ممتعه جدا
بيفهمنا طريقه اخد الفتوى وازاى وصلنا العلم الشرعى
جزاك الله خيرا وجعله كل كلمه فى ميزان حسانتك
انا هاتابع ان شاء الله

الباحث عن الحقيقة said...

المهاجر الى الله
اشكر تواجدك الكريم فى المدونة وتعليقك على الموضوع واعجابك بطريقة الشرح
وهذه شهادة اعتز بها جدا من اخ كريم عاشق لهذا العلم العظيم
هو بينى وبينك انا كمان مستعجل عايز ابدا بادلة الاحكام لان انا هدفي اكون ثقافة عامه لدى المدونين واللى يحب يتوسع ممكن يحمل الكتاب العظيم للدكتور عبد الكريم زيدان ويتابع منه
علشان كده انا هتكلم باختصار فى هذه الموضوعات وهبين ان شاء الله معناها بشكل سلس جدا يمكن الشخص العادى من معرفة هذه الادلة بشكل واضح نظرا لصعوبة هذا العلم زى ماحضرتك عارف
يعنى الهدف هو ثقافة اصولية

.............

الاخت الغالية / رفقة عمر
اول من قام بتشيجع مدونة الصحيفة الكاشفة
اشكر تواجدك الكريم ورغبتك فى المتابعة هذا شئ يسعدنى جدا من اخت مثل حضرتك لها يد علينا
وان شاء الله يكون الشرح مبسط علشان اقدر حقق هدفى بتوصيل ثقافة اصولية للمدونين بشكل مبسط علشان تكون عندهم فكره عن ادلة الاحكام القران والسنه والاجماع والقياس الخ ونكون عارفين معنى الكلام ده ايه بالظبط

Soul.o0o.Whisper said...

ما شاء الله
ما شاء الله
ما شاء الله

إيه دا كله.. إيه دا كله
لا بجد ما شاء الله عليك
<<< قال يعنى فهمت كل حاجة
أبقى قابلنى
هههههههههههههه

يا أستاذنا
يا معلمنا

الله يكرمك أنا بدأت حلو
جيت لحد النص و بدأت أزغلل
و قرب الآخر كانت العصافير فوق راسى

واحدة واحدة علينا
والله لا قهوة نفعت و لا كابتشينو حتى

و الحمد لله إن الحزام كان مربوط
أحسن كنت تلاقينى الوقتى ماسكة فى عجلة الطيارة
ههههههههههههههه


الأسلوب حلو ما شاء الله
بس عاوز قراءة مرة واتنين و تلاتة علشان نمخمخ

و يا بشمهندس الله يكرمك خف عن دماغنا شوية
كل ما أحاول أركز و أفهم
ألاقيك معدى من جنبى
صدعتنى





مش قلت لك ماتعديش من هنا تانى ؟؟؟
مش عاوزة بقيت الحساب خليه ليك
بس الله يخليك ما عدتش تعدى من هنا
عااااااااااااااا


<<< هأرجع أقرأ تانى

فارس عبدالفتاح said...

سلام عليكم ورحمة الله وبركاته

الاخوة الافاضل المحترمين الباحث وابن حجر وعصفور المدينة


الموضوع ممتاز وجميل وجزاكم الله خير لكن انا لا افهم شي على الاطلاق وهذا منى وليس منكم


فانا والحمد لله اعاني من الغباء الاستوائي

بحيث اني لا افهم الامور الشرعية الا عن طريق معلم او استاذ او شيخ او امام

اما عن طريق التلقين والحفظ والفهم والاستيعاب

وغير ذلك لا استطيع ان افهم شيئ وهذا سبب عزوفي عن قراءة الكتب الفقهية والشرعية بصفة عامة .

ومن اجل ذلك ايضاَ اجد صعوبه بالغة في فهم السور المدنية التى نذلت فيها التشريعات وبالتالي يسهل علي قراءة السور المكية جميعها لانها معظمها لا توجد بها احكام شرعية غير التوحيد واثبات العبودية لله سبحانه وتعالى .

وجذاكم الله خير

على فكر انا بسأل يعني مواطن بيسأل عن اخوانه المواطنين

سلام عليكم

آفاق الحرية said...

انا متأخرتش اهه
ان شاء الله المرة الجاية هاجي باليونيفورم
تحياتي

الباحث عن الحقيقة said...

دكتوره ايمان
اخبار العصافير ايه؟
معلش لو كانت الجرعة كبيره
يظهر اندفعت فى كتابة من غير ما اخد بالى من ان الكم كبير
معلش المره الجاية مش هتضطرى تمسكى فى عجل الطيارة
بالمناسبة هو الباقى اللى ليى عند ابن حجر كتييير؟؟
معلش خليه يحوش لغاية ما يتجوز هو كمان ونخلص منه

............

الاخ فارس عبد الفتاح
والله رحتلك يا عم ولقيت عندك موضوع كبير عن غزة والحالة السياسية
قلت خليه ده دلوقتى اقراه على مزاج ومن وقتها الواحد مش لاقى وقت
شكرا يابو البلديات على الزيارة اللى بتسعدنا وبتحرجنا بزوقك ده

.................

افاق الحرية

اهلا وسهلا نورتم دار الكاشفة وفروعها
شكرا على الزيارة والالتحاق بالمدرسة
بالمناسبة اليونيفورم بني مخطط بالطول

شريف طلال said...

بارك الله فيك
احجزلى اول ديسك فى الدرس الجاى والنبى يا استاذ

الساحرة said...

استاذي الفاضل انا جيت متاخرة ممكن تعيد من الاول

جزاك الله كل خير

بس كلمه في سرك الدرس كبير اوي
اناتهت منك
ومرة تانيه متبدئش الدرس من غيري
اسلوبك سهل وبسيط

Ahmed Al-Sabbagh said...

شكرا على اللقاء الجميل بساقية الصاوى

تعالى عشان تغطية اللقاء

ايميلاتى اهى

ahmed4u21@yahoo.com

ahmed000eg@hotmail.com


تحياتى

أحمد الصباغ

بت خيخة وأى كلام said...

مستر
مستر
انا مافهمتش حاجة برضه
كتير اوى يا معلمى
واحدة واحدة عليا
انا مش سهل عليا انى افهم الكلام ده
مرة واحدة
انا محتاجة اسبوع فى البوست ده علشان اقراه وافهمه
شكلى وحش اوى اوى
انا ماشية بقى وهاقراه تانى يمكن افهم حاجة المرة دى
سلام
خيخة

مجداوية said...

الأخ الكريم
جئت لمدونتك لأقرا بحثا لك عن حديث الفرق الناجية بناءا على نصيحة الأخ الجعفرى وقد أحسن توجيهى فما شاء الله لقد لممت بكل جوانب البحث فيه سواء بالاتفاق أو بالاختلاف وأشكرك الشكر الجزيل على ما أمددتنى به من معلومات فى دقائق قليلة كنت ساستغرق للبحث عنها ساعات بل أيام يسر لك الله أمورك كلها واسمح لى أخى الكريم أن التحق بمدرستك ولكن الرجاء تكبير الخط وتقليل كمية الدرس قليلا فأختك نظرها ضعيف كما أنها ملتحقة بمعهد دينى أيضا ولكن العلم يجذبنى اليه كالمغناطيس وجزاك الله عنا كل خير ,,بس أدفع المصاريف فين ؟؟

ammola said...

والله انا ما اعرف ان الدراسة بدات الا دلوقتى حتاخد ورقى واللا اسجل منازل؟وبعدين موضوع اليونيفورم البنى ده انا مش بالبس غير اسود يمشى واللا ايه النظام
سلمت يمينك والله بجد حلو وانا مش شايفة ان الكم كبير ولا حاجة هى بس مسالة ان اصول الفقه من العلوم اللى عايز قبول ودماغ عارفة هى رايحة فين وجاية منين ومع الوقت المصطلحات بتوضح وربنا ينفعنا بما نقرأ يارب
على فكرة الشاى بتاعكو مش حلو...انا عايزة ايرل جراى
انا مع الباشمهندس محمد انك تعمل رسم توضيحى...مش عارفه؟يعنى تكتب عنوان كبير وتنزل منه فروعه ومن كل فرع تنزل فروعه وهكذا دواليب دواليب
:)

الباحث عن الحقيقة said...

الاخ شريف طلال
شكرا لزيارتك وتشريفك الكريم لنا

..........

الساحرة
سعيد جدا بتواجدك وان شاء الله تستفيدى معانا

...........

احمد الصباغ
لا تعليق..انظر التعليق السابق على اول رد ليك


............

بت خيخة
هو بجد ولا ايه؟؟
لا انا لا اسمحلك ..انتى هت>اكرى وتتفوقى كمان معانا

...........


مجداوية

اشكر تواجدك اولا
واسف للتأخير فى الرد ..ثانيا موضوع الفرقة الناجية كتبه زميلى وشريكى فى المدونة اسمه ابن حجر العسقلانى وشهرته ابو العساقيل

.............

اموله
بنى يعنى بنى
لو مصممه على الاسود يبقى تحضرى بالليل علشان محدش يشوفك ويقلدك وتعملى تمرد ..وبعدين البنى ده يونيفورم سنة اولى ..لسه الاسود ده بتاع الجامعه
يعنى كل سنة يوينفورم جديد ..دواليب دواليب
والشاى هتدفعى تمنه حلو او مش حلو انتى اللى بتنضغى لبان مر قبل الشاى اعملك ايه

Soul.o0o.Whisper said...

شفت
شفت
مش قلت لك هو العيب من الصداع

أدينى قرأت الموضوع و فهمت
آه والله العظيم فهمت

هيييييييييييييه
هييييييييييييه
مش باقولكم التركيز حلو يا جدعان


بجد ربنا يبارك فيك يا معلمنا
صحيح هى نقطة القرينة عاوزة توضيح حبة

بس كله تمام
شكرا جدا

الباحث عن الحقيقة said...

حاضر يا دكتوره ايمان
هنوضح القرينة حبه فى درس لاحق ان شاء الله
هنتكلم عن الفرق بين الحرام والمكروه

عبدالرحمن فارس said...

الثانيه بعد منتصف الليل

فنجان ثالث من القهوه لمحاولة الفهم

وكسل خفيف الوزن يطهو فنجاني الرابع

محبتي

الباحث عن الحقيقة said...

عبد الرحمن فارس
ربنا يكرمك
سعيد بوجودك