Tuesday, February 26, 2008

استئذان

السلام عليكم و رحمة الله و بركاته
كان من المفترض أن يكون موضوع هذه المرة هو عرض لرأى الشيخ الطبيب محمد اسماعيل المقدم فى علاقة الإسلام بالوطنية .. و لكن جدت ظروف جعلتنى أغير الموضوع .. و على العموم .. النقاش مازال مفتوحا فى التعليقات على الموضوع السابق و سوف أظل أتابعه حتى بعد إنزال المواضيع الجديدة
ا
أنا هارغى شوية و هاطول و فى الآخر هاقول إنى هاخد أجازة .. شوية كدة و راجع بإذن الله .. اللى عايز يقرا و يكمل .. يروح الأول يجيب كوباية شاى من القهوة و ييجى يسمع
ا
كل المواضيع التى قمت بكتابتها كانت بمثابة مواجهة لأنفسنا بمشاكلنا .. فأنا أرى أن الكثير من الأزمات التى تمر بها أمتنا نشأت من فهم غير منضبط لإسلامنا العظيم .. ربما يقول بعضكم:"و انت بقى اللى فاهم الإسلام فهم صحيح؟؟" ..هاقول إنى و الله باحاول أفهم ..و كل ما كتبته هو مجرد إشارة منى لمواطن الخلل فى الكثير من القضايا .. قد أكون صحيحا و قد أكون مخطئا .. و لكنى على الأقل حاولت .. و وضحت أماكن التناقض و مواطن الخلل قدر فهمى و قدر استطاعتى .. و كل منا لديه العقل و الإرادة و الضمير الذين يمكنونه من اتخاذ القرار الصائب
ا
كان لا علاقة لى بالتدوين .. كنت أتابع ذلك النشاط فقط كمشاهد من بعيد .. فكنت أظن أنى لا أحمل شيئا جديدا أو ذا قيمة لكى أنشى لأجله مدونة خصوصا فى وجود فطاحل عالم التدوين .. إلى أن تشجعت يوما تحت ضغط الانفعال إلى أن أعلق على مدونة أحد الإخوة معترضا على الطريقة التى عالج بها الموضوع على الرغم من أهمية الموضوع .. و كان عن الحل الإسلامى .. ربما بعضكم يعرف ملابسات الموضوع .. المهم .. يومها طرحت بعض الأسئلة و التى أرى أنها من الأهمية بحيث يجب علينا جميعا أن نعرف إجاباتها .. دار حينها شد و جذب بينى و بين كثيرين .. كانت محصلته ما بين تجاهل و إساءة و سخرية من ناحية (كأن وصفت من أحدهم بأنى أخطر على الدين من المثليات .. أما و قد عرفتمونى.. هل هذا صحيح؟؟)... و بين اهتمام و استحسان و إيجابية من ناحية أخرى.. فقد قام أخى الكريم الباحث عن الحقيقة (و لم أكن أعرف عنه شيئا مطلقا) من نفسه بعرض كل التساؤلات التى أثرتها و أجاب عليها فى تدوينة مستقلة باختصار و روية و تمكن ..و كانت إجابته نافعة جدا جدا بالنسبة لى (خاصة النقطة الخاصة بقراءة التاريخ و اتباع منهج مقارنة النصوص) .. و أجمل ما فى الموضوع أنه اهتم .. نعم اهتم بما أثرته من تساؤلات و هو لا يعرف عنى شيئا .. بل نشر لى رسالة أرسلتها إليه بالبريد .. و قدم أكثر شىء يستطيع تقديمه .. و أعتقد أنه لو كان يستطيع أن يفعل أكثر مما فعل.. لفعل
ا
فى نفس الوقت وجدت الأستاذ عصفور المدينة (الرجل الذى هو من أكثر المدونين إيجابية و لم أكن أعرفه أيضا حينئذ) قد قام بالإشارة فى أحد التعليقات إلى تدوينة كان قد كتبها عن الثوابت و المتغيرات كإجابة على تساؤل من التساؤلات التى أثرتها
ا
أما الأخت الفاضلة فتاة الجنة (و هى التى أنا مقصر فى حق مدونتها بشدة و أرجو أن تعذرنى على ذلك .. و أرجو أن يخبرها أحدكم بهذه التدوينة فأنا سأشعر بالحرج من دعوتها بعد هذه الفترة من الانقطاع) فقد قالت فى حقى قولا جميلا .. كانت كلمات موضوعية يدور معناها حول "و جادلهم بالتى هى أحسن" .. كل ذلك حمسنى أن أتابع المدونات المختلفة بحماس متزايد
ا
إلى أن جاء اليوم الذى فتحت فيه بريدى الإلكترونى ووجدت رسالة من أخى الباحث عن الحقيقة يدعونى فيها إلى مشاركته فى مدونته .. كانت سعادتى غامرة .. يعنى ماكنتش مصدق نفسى من الآخر .. و ظللت أقرأ الرسالة عدة مرات .. و بدأت معه التدوين ..و فوجئت بشخصبة الباحث عن الحقيقة الرائعة .. كان شخصا يحترم "الآخر" بشكل كبير .. كان لا يقاطعنى إذا تكلمنا على "الشات" .. و كان يستمع منى و يهتم لما أقول .. و يسدد النصح بإخلاص .. و كان متحمسا بشكل كبير .. استفدت منه كثيرا .. قدمنا الكثير من الموضوعات .. كانت له روحا عالية .. بل كان هو الذى يبعث الروح فى المدونة على عكسى تماما .. فأنا ممل بشكل كبير و غير جذاب و ربما منفر فى بعض الأحيان .. ربما بسبب طبيعة دراستى .. و كم قلت له أنه هو روح المدونة .. و لكن من عادة الروح .. أنها تحلق فوق عوالم البشر .. تتحرك جامحة بحرية .. تعلو و تهبط .. ننتظرها أن تعود إلينا يوما لتبعث فينا الحيوية و البهجة
ا
كانت الموضوعات التى كتبتها هدفها الأول هو محاولة لتوضيح بعض الأساسيات و بعض المبادئ العامة .. و أيضا التركيز على الكثير من المشكلات التى لمستها فى حياتى و بين زملائى .. كان هدفى أن نضع يدنا على المشكلة .. فقد كنت أتوجه بما أكتب إلينا .. نعم .. كنت أتوجه إلينا .. إلى الشباب من بنى وطنى و دينى ممن يحملون هم هذه البلاد و هم هذا الدين.. خاصة الذين يكتبون على مدوناتهم مواضيع دينية .. كنت أحاول ألا نقطع جذع الشجرة التى نحن واقفون عليها كأن ننكر تاريخنا و تراثا إلا ما رحم ربى .. فذلك للأسف ما يقوم به الكثير من الناس .. من يرفضون التاريخ و التراث إلا برؤيتهم هم فقط و من دونهم خاطئ.. و يرون أن التاريخ بدأ من نقطة محددة لاغيا كل ما قبله .. و كأن تاريخنا وزر .. يأتى الإسلام فيجب ما قبله من تاريخ و من أوزار (مع أن الفراعنة من أوائل من عرفوا التوحيد .. هناك من عرفه وحيا ..و هناك من عرفه عقلا .. هناك من آمن .. و هناك من كفر) .. و يرون أن التاريخ يسير فى مسار هم حددوه من قبل .. و ما دون هذا المسار يعد بدعا و ضلالات .. لا يوجد إلا فرقتهم هى فقط الناجية .. و هم فقط الذين يعرفون ثوابت الشرع .. و هم أهل التميز و العقل و من دونهم هم الدرجة الثانية .. الاجتهاد هو فقط اجتهادهم و هم أفقه الناس بالنصوص .. رأيهم صواب لا يحتمل الخطأ و رأى غيرهم خطأ لا يحتمل الصواب .. أعتذر عن هذه الكلمات الشديدات .. و لكنى استمعت مؤخرا إلى أحد الدروس و التى وظف الرجل فيها كل ملكاته ليحذر الناس من أباطيل حجة الإسلام أبى حامد الغزالى .. الغزالى العالم الذى اتفق جمهور الأمة على أنه مجدد المائة الخامسة مثلما اتفقوا على أن مجدد المائة الأولى هو سيدنا عمر بن عبد العزيز و مجدد المائة الثانية هو الإمام الشافعى و اختلفوا على غير هؤلاء الثلاثة.. بل هو العالم الوحيد فى تاريخ الإسلام الذى أطلقوا عليه أنه "حجة الإسلام" .. و يا ليت هذا الداعية الحنبلى اقتدى بابن الجوزى الحنبلى .. الذى كان من أشد الناقدين للغزالى و مع ذلك اختصر و هذب كتاب الغزالى "إحياء علوم الدين" فى كتاب "منهاج القاصدين" و بهذه الإيجابية كذلكم كان بن تيمية الحنبلى و الطرطوشى المالكى
ا
إخوانى .. لم أدع يوما أنى الصاحب الأوحد للحق .. و إن كنت ادعيت أنى صاحب حق فلم أقل أنى الصاحب الأوحد له و غيرى باطل .. فأنا لست صاحب فكر أو رؤية مستقلة .. فذلك يستهلك عشرات السنوات.. أنا مجرد شخص عادى .. أقرأ و أستوعب و أفكر .. و فى النهاية أكتب بغرض الإشارة إلى جوانب أراها صحيحة .. و أخشى أن أكون مخطئا .. لذلك أستغرب ممن يستيقنون أنهم على الصواب الأوحد فى أمور هى من أمور الحياة و التى يحتمل الصواب فيها أكثر من وجه ناهيكم عن الاختلاف فى أمور الدين الفروعية (لتجد عبارة "هذا اختلاف غير سائغ" موجهة كسلاح إليك) .. و الطامة الكبرى تكون فى الاختلاف حول أمور الأصول (لتجد عبارات الذم و التهديد و الحدة و ربما تهم الابتداع و حينا آخرا التكفير)ا
ا
كلمة أخيرة .. أحب أن أوجه كل تحياتى و تقديرى للأستاذ عصفور المدينة .. ذلك الرجل .. السلفى المستنير .. الإيجابى .. الذى يكتب ليربى و يوجه .. و يحسن معاملة الناس .. و كأنه أب يربى أبناءه بالحسنى و الحكمة و الموعظة الحسنة .. لك منى يا أستاذنا كل احترام و تقدير
ا
كل ما سبق كان من قبيل استرجاع بعض الأحداث المثيرة فى الفترة السابقة .. إيذانا فى الدخول فى أجازة لن تستمر طويلا بإذن الله .. و سيكون معكم أخى الرائع الباحث عن الحقيقة .. بعض التفاصيل ستجدونها على الاستراحة
ا
أما بخصوص موضوع الشيخ محمد اسماعيل المقدم .. فمنذ أن بدأت كتابة ذلك الموضوع منذ شهور و أنا متردد فى نشره .. لا أدرى بوضوح لماذا.. و لما أخذت قرارى بأن أنشره ظهرت الموانع تلو الموانع .. و لا أدرى هل سأنشره يوما ما أم لا .. و لكن حتى ذلك الحين كنت أود أن يقرأه من اهتم بالعرض الذى قمنا به فى موضوع الوطنية .. فلا أدرى هل أرسله للمهتمين عن طريق البريد الإلكترونى ؟؟ .. حسنا .. جاءتنى فكرة .. سوف أرسله مبدأيا لكل من سوف يشرفنا بالتعليق على هذا الموضوع حتى و إن لم يطلب .. سوف أذهب إلى مدوناتكم و أحصل منها على عناوينكم الإلكترونية .. و من يريد أن يحصل على الموضوع و فى نفس الوقت هو لا يضع عنوانه الإلكترونى على مدونته و لا يريد لأحد أن يعرف عنوانه .. فليراسلنى على عنوانى التالى
Ebn.7ajar.al3asqalani@gmail.com
أما من لا يريدنى أن أرسل له الموضوع فليقل لى تصريحا أو تلميحا و أنا سوف أفهم طلبه و أتفهم رغبته
ا
فى النهاية .. أود أن أوضح عنى بعض المعلومات: فى أمور السياسة و المجتمع فأنا لست إخوانيا (بل أنا لست إخوانيا على الإطلاق).. فى أمور الفكر و الدعوة فأنا لست سلفيا (سلفي بمعنى تبنى الفكر الحالى للتيار السلفى) .. فى صفات الله و تأويلها فأنا لست أشعريا (ربما ظن البعض أنى كذلك لدفاعى عن التأويل) ..أردت بذلك فقط التوضيح لأنى شعرت من البعض فى تعليقاتهم أنهم يظنون أنى أنتمى لفئة من هذه الفئات.. و لجميع هؤلاء احترامى و تقديرى
ا
و أراكم فى التعليقات على خير
ا
يا ترى .. ماحدش فيكم سأل نفسه أنا ليه سميت نفسى على اسم العالم الجليل الحافظ بن حجر العسقلانى ؟؟ لو حد كان فكر فى سبب ياريت يقوله يا جماعة

21 comments:

عاشقه الفردوس said...

السلام عليكم

تدوينه كبيره هقراها واجي ارد

ابن حـجـر الـعـسـقـلانـى said...

عاشقة الفردوس

ليكى عندنا تاج .. هايتنشر قريب على الاستراحة

عاشقه الفردوس said...

ايه ده تاج اولها كده
ده انا في ذكتي تاجين معملتهمش
انسانه كسوله

الله المستعان


بجدموضوع متميز
وشكرك لاستاذنا كلنا عصفور المدينه ده حقيقي وكنت بفكر فيه

استاذ عصفور استاذ رائع وله كثير من المواقف مع كل المدونين تقريبا
ربنا يبارك فيه

وربنا يبارك فيك ويثبتك ويؤيدك ويزيدك علما وتقا ونورا

وربنا يجعلنا من الهادين المهديين لا الضالين المضلين اللهم امين

انا عايزة الموضوع

عاشقه الفردوس said...

بس اللينكات اللي حضرتك حاططتها ماشاء الله عايزاها كوبايه شاي كده من الاستراحه ونقراها واحده واحده
ده انا فتحت
اسئله حول الاسلام وماشاء الله لقيته مش اي كلام
هشوفها واقراها كلها ونبقي نتناقش فيها

جزاكم الله خيرا

عصفور المدينة said...

السلام عليكم ورحمة الله وبركاته
بداية أدعوك لزيارة هذه المدونة
http://shababshow.blogspot.com/

ثانيا أي تعليق حأقوله حيبقى إعادة أو اقتباس لمدح ومحبة بثثتها سابقا أنا أو أنت في تعليقات أو إيميلات يعني كمية التعليقات التي بيننا والتي وصلنا فيها لمساحة مشتركة كبيرة من الاتفاق على مفاهيم كثيرة هي مدرسة والله لا أقول على مستوى التدوين بل أقول على مستوى عالم الانترنت بل أتجرأ وأقول على مستوى العصر الحالي
(أصله ببلاش

طبعا أنا عافر إنك مش حتقدر تنقطع فترة طويلة وفي انتظارك لابد أن تطمئني عنك دوما عشان على الأقل النتحدث الرسمي باسمك مش ينفع ما يعرفش أخبارك

==============
لا أقول استعدت هذا الشريط الذي ذكرته بل هو حاضر في ذهني دوما سأضيف تفصيلة صغيرة أضربت عن ذكرها سابقا رغم أني أرسلتها في تعليق سابق ثم محوته

كان كثير من معارفي أو من يراسلني أرسل إليهم حواراتنا في البداية ويتابعونها وكان بعضهم يقول لي
أسلوبك لين معاهم ليه دول شكلهم نصارى مدسوسين دول معتزلة وووو

فقمت بعمل تجربة لطيفة ربما سببت لكم جرحا لكن كان لها بالغ الأثر التربوي ويمكنك تحديث المدونة بهذه القصة اللطيفة

قمت بإدراج تعليق تهكمي على تدوينة كان بيننا حوار فيها وكنا ماشيين مع بعض كويس وهذا التعليق التهكمي وضعته باسم مجهول وهذه هي المرة الوحيدة في حياتي التدوينية التي أعلق مجهول ونهجي هو إما أختلف بأدب أو أتفق أو أنسحب بهدوء أو ألقي بعض الأسئلة التي تثير الذهن ثم أنصرف

قام أخونا الباحث بالرد على التعليق بطريقة مهذبة أكسبته تأييدا بين الحاضرين للموضوع واكتسب هو كما أقول دائما التفوق الأخلاقي مش علي شخصيا
:(
ولكن على مبدأ التهكم أي على الشخصية المجهولة التي اخترعتها

فكان هذا درسا عمليا يوضح بشكل
extreme
الفرق بين حصيلة الأسلوبين ويوضح أيضا أن كل أحد يقدر على التهكم ويقدر على التعليق بمجهول ويقول مالايقال وهكذا

وهو ما نلمسه اليوم ظاهرا في هذه الوداعية الوهمية التي أعرف أنها ستنقلب إلى عودة سريعة إن شاء الله

بت خيخة وأى كلام said...

انا جاية ادحرج التماسى واسالك هو يعنى ايه السلفى المستنير دى
مستنير وفهمناها يعنى متنور ومتعلم ومتثقف
لكن سلفى دى انا مخدتهاش قبل كدة
انا حاسة انها حاجة حلوة اوى
بس عايزة افهم معناها علشان شكلى وحش اوى وانا شاحطة كدة ومش فاهمة يعنى ايه سلفى
انت يا عسقول بتقول كلام كبيييير يصعب على الخيخة مثلى فهمه
ارجوك تبقى تكتب معانى الكلمات تحت البوست
منعا لاحراجى
سلام
اختك فرنسا
يووووووووه
قصدى ستك خيخة

فرنسا هانم said...

مش عارفه ليه اتاثرت بالتدوينه دى وحاسه انك عايز تبعد عنا
ده احساس
حسيته وانقبض قلبى
ابن حجر
احب ان اقول لك لقد وصفت عصفور المدينه بانه السلفى المستنير
وهو يستحق اكثر من ذلك لاننا نحبه ونحترمه جدا
ولكن ابن حجر العسقلانى
ايضا من اكثر الناس الذين قابلتهم فى عالم التدوين استناره
فحديثك عن حسن نصر الله يشدنى
وحديثك عن الدين يبهرنى
وحديثك عن الاخوان والسلفيين
واهل الدعوه
حتى عن القوميه العربيه
اخى العزيز ابن حجر
لا تتاخر عنا
فاننا نحتاج من هم مثلك بيننا

واخيرا
سلام من اختك
بنت خيخه
قصدى
خالتك فرنسا هانم

الباحث عن الحقيقة said...

اعترافات ليلية
ايه الجمال ده يا استاذ عصفور
معلش اركن انت يا عسقول دلوقت
اولا انا اشكرك على وقوفك جنبنا من البداية
بس انا زعلان من نفسى لان تعليق حضرتك باسم مجهول خلانى اتجاهل مدونة احدى الاخوات ظنا منى انها هى صاحبة التعليق خاصة لتشابه الاسلوب حتى انى بقول لابن حجر مش ملاحظ التشابه قلى تسعين فى المية هى
فاكتفيت بتجنب مدونتها بس هذا مع قرائن اخرى وهى اسبقية تهكمها على مدونتى فى مدونة الاخ مسلم
ما علينا
اشكر لتواجدك معنا وانا كنت سعيد جدا بتعليقاتك وكنا ننتظرها انا وابن حجر بلهفة فى الحقيقة لمعرفة ردة فعلك
اخى الفاضل ابن حجر
يظهر ان محدش قرا كلامك عنى
الناس دى بتضهدنى يا عم ولا ايه
محدش قلى شكرا لانى مكتشف النجم التدوينى ابن حجر العسقلانى
ما علينا انا سعيد جدا بمشاركتك بقلمك فى المدونة لانك تمتلك قلم موضوعى حتى وانا اختلفنا معه لكن وكما اثبت الواقع انه قلم يستحق التقدير والاحترام
وكفاية كده عليك مانت قاعد ومونسنى وانا شغال دروس
اديك شفت بعينك فيه ناس بتجيلك انت دلوقتى بعد ما كنت بتقولى روح انت علق عند الناس انا اسمى مش عاطفى
اهو اللى مش عاطفى بقى عسقول اهو مره واحده
تحياتى للاخ محمد انسان فى غاية الادب والذوق والاحترام
اوعى تغرق الدنيا انا عارفك
ههههههههههه

عاشقه الفردوس said...

ههههههههههههههههههه استاذ الباحث

لا طبعا احنا متشكرين ان حضرتك عرفتنا بابن حجر والله نشكرك فعلا

بس انا لسه جايه من القهوه لقيتك سايبها وجيت هنا
هوده الشغل بقي
؟؟؟؟؟

هنهمل في القهوه ولا ايه
:))

ربنا يباركلكم ويبارك لاستاذنا عصفور المدينه

ammola said...

صحيح ليه ابن حجر؟؟؟؟؟
وهل الامر له علاقة بالقهوة والشيشة؟
جميل ان الباحث هو اللى زقك ع التدوين
وجميل انك دونت واثريت التدوين بحاجات ثرية ربما لايقدر عليها الكثيرون
وبرضة جميل انك تطالب بأجازة...من حقك(بس ما تطولش)
بس اللى مش جميل انك ما تجيبش سيرتى فى التدوينة ولو بأن تقول ان من أهم الناس اللى كانت بتعلق عندى فلان وفلان وأمولة
عموما الحساب يجمع وكله مخصوم م البقشيش

الساحرة said...

مش عارفه ليه حسيت انه خطاب تنحي
انت هتعتزل ولا ايه
ولا بترجع الشريط
بلاش ترجيع هنا هههههه
وشكرا للباحث عن الحقيقه لانه كان سبب انك تكتب

فرنسا هانم said...

الباحث عن الحقيقه
ازاى يا معلم انت الخير والبركه برضه
ومحدش يقدر ينساك ابدا
تحياتى لك
وربنا معاك فى شغل القهوه
وانت لوحدك

عصفور المدينة said...

الله يحفظك يا أحمد
انت كمان ربنا يبارك لنا فيك ويرد محمد بالسلامة والعلم النافع

Soul.o0o.Whisper said...

؟؟؟؟؟؟؟

كل دا يحصل من ورايا ؟؟
كل دا علشان بعدت أسبوع ؟؟
طب الحمد لله إنى ما طولتش
احسن كان ابن حجر قال هاعتزل خالص
ههههههههههههههه

اخونا الفاضل /ابن حجر

الله يبارك فيك
و مش عارفة بردوا اقولك عقبالك و لا عقبال ولادك ؟؟..
ما علينا
المهم إنك أكلت و شبعت؟؟

أخى الفاضل /
طبعا انا ماكنتش اعرف بدايتك فى عالم التدوين
الحقيقة اكتشفت ان اخونا الباحث بتاع وجوه جديدة
يعنى اكتشفك
و بردوا هو اللى حرضنى << خللى بالك من حرضنى دى
على أنى بجانب الخواطر و الشعر اللى كنت بانزله على المدونة انى اكتب حاجة توصل للناس
هى بصراحة كانت فى دماغى من زمان
و يمكن الموضوع اللى كنت باحضر له لسه بردوا مش بدأت فيه
بس اهو بدأت حاجة كدا على الماشى

ربنا يبارك فيكم يارب

بالنسبة للاجازة طبعا كل واحد من حقه يستريح شوية ،
بس مش يكسل
لالالالالا مش عندنا دى

و بعدين عندى ملاحظة كدا
مش عارفة صح و لا غلط

انا لمحت من كلماتك كدا
خير اللهم اجعله خير
ان فيه شوية ذبذبة
لا مش فى الارسال
ذبذبة نفس
يعنى اعتقد انك واقف الوقتى مع نفسك بتقول يارب انا ماشى صح و لا غلط
و اعتقد ان الهدنة دى علشان تراجع حسباتك تانى
و تبدأ بقوة أكبر ان شاء الله

احب اقولك ان دى حالة كلنا بنمر بيها
لاننا فعلا عاوزين نعرف الحق و الحقيقة
و لا نملك الا الدعاء و سؤال الله التوفيق
ربنا يوفقنا جميعا و يهدينا و يسددنا و يثبتنا


على فكرة أنا بردوا سألت نفسى كتير اشمعنى ابن حجر يعنى ؟؟؟
و بما ان انت طرحت السؤال
فعلل يا بشمهندس

لماذا اخترت اسم ابن حجر العسقلانى
سؤال تانى معلش
اصل انا كنت فاكرة ان فى صلة بينك و بين الباحث
و لكن بما انه اتضح ان مافيش قرابة
ياريت بردوا تشرحولى العبارة الجايةلانى وقفت ادامها كتير

يعنى ايه عمى و عم عيالى ؟؟؟
:)
معلش بس انا باحب افهم بردوا
هههههههههههه

ياللا سلامى للكل
و ماتتأخرش علينا

آفاق الحرية said...

السلام عليكم
استرجاع جميل لذاكرة مليئة باحداث اجمل
تحياتي

الباحث عن الحقيقة said...

شكرا فرنسا وعاشقة الفردوس
اهلا يا دكتوره ايمان منوره طبعا
مش عارف ليه كل ما اشوفك افتكر المضاد الحيوى
يمكن علشان انتى صيدلانية مثلا
منوره بطلاتك وتعليقك اللى بيسعدنى جدا
واحب اقولك ان مفيش صلة قرابة بينى وبين الجدع ده
مره واحد صاحبى قرا اسم ابن حجر فى المدنى
فراحمبحلق عنيه ومنهدش جدا وقال : ايه ده هو انت تعرف ناس من زمان كده
اما مسألة عمى وعم عيالى دى قبل ما ييجى ينفع فيها فدى بنسميها انا وابن حجر لغة المسامير ..اعمل ايه بيحب يثبتنى بالكلمتين دول قال فاكر هيضحك عليا وانا بشربها بمزاجى
على فكره محمد ابن حجر اكبر منى فى السن بشهرين
ههههههههه
ايه رايك فى الفضايح دى يا بطل
شكرا دكتوره ايمان على تعليقك
واشكر افاق الحريه
واشكر اختى الساحره
واشكر الاخ زكى جمعة
وكمان مره اشكر خيخة هانم وبت فرنسا واى كلام
هههههههه

الباحث عن الحقيقة said...

اموله هانم تعليق لوحدك اهو علشان متزعليش
انا وابن حجر بنعتبرك ابتسامه فى عالم التدوين وبتطرحى افكارك بشكل ممتاز جدا وطريف وبيوصل بسهوله وطبعا نجاح مدونتك والتعليقات فيها خير دليل
شرفتنى زيارتك جدا واسعدتنى خالص
مع تحيات اخوكم تحتمس

ابن حـجـر الـعـسـقـلانـى said...

عاشقة الفردوس

يا أختنا و الله كويس إن التاج عجبك بس و الله هو مش ملزم إنك تجاوبى عليه ... براحتك لو عايزة ما تجاوبيش .. و بخصوص المواضيع اللى فاتت .. ربنا يعينك على قرايتها :) أصلها طويلة جدا .. و احنا تحت أمرك فى أى مناقشة فى أى موضوع

و نيجى لأستاذنا عصفور المدينة .. و الله يا أختنا .. الأستاذ عصفور بجد عايز يعمل حاجة حلوة للناس .. و دة واضح جدا فى كتاباته ... ربنا يعينه على ما يفعل و يسدد خطاه

و نورتينا يا أختنا
-------------

عصفور المدينة

هو أنا كدة مفقوس دايما .. بالفعل الواحد مش هايقدر يبعد عن التدوين .. الواحد اكتشف هذا المجتمع الجديد و ارتبط بيه و صعب إنه يسيبه

بس و الله يا أستاذ عصفور أنا ما سبقش لى و اتناقشت مع حد و كان مستوى الكلام بهذا المستوى العالى إلا أشخاص قليلين جدا .. بس و الله على قدر ما باستنى تعليقات حضرتك .. على قدر ما ركبى بتخبط فى بعضها .. بجد و الله مش عارف ليه .. أظن أنها الهيبة.. حضرتك ليك هيبة فى نفوس الناس .. زادك الله هيبة و عملا للحق

أتعرف يا أستاذنا ..فى الكثير من تعليقات أخى الباحث تعلمت دروسا فى الحوار .. لقد أثر فى كثيرا .. و هذه هى طباعه و ذلك من أكثر ما أعجبنى فيه .. و أعتقد أن رد فعله تجاه تعليقك المجهول كان طبيعيا و يعبر حقيقة عن أخلاقه .. و أظن أن تعليق حضرتك مر مرورا عاديا

لكن ما يضايقنى هو هؤلاء الناس الذين وصفونا بصفات نحن منها براء .. أنا أعرف أنهم دافعهم لذلك هو الحرص على الدين .. و لكن الدين يأمر بأن نجتنب الكثير من الظن لأن بعض الظن إثم
لقد ساءلت نفسى كثيرا هل بالفعل أنا على هذه الدرجة من السوء أو الخطورة .. و جلست مع نفسى أراجع عدة أمور .. بل قبل أن أنشر الموضوع فإنى أكتبه ما يزيد عن خمس مرات فى المتوسط.. و أقرأه عشرات المرات .. و لكن على العموم .. إن كان لما نكتب أثرا محمودا ففى ذلك كل السلوى و الحمد لله

و بخصوص المدونة التى أشرت إليها .. ففى رأيى أن بها بعض الأشياء الجيدة .. و هناك ما أعترض عليه .. و أظن أن الحديث عنها يطول .. و ربما هناك موضوع معين تقصده .. فأرجو أن تشير إليه ربما بدأنا حوله نقاش

و لك كل تحياتى أستاذنا .. و أشكرك على كلماتك الجميلات .. و أرجو لك التوفيق و السداد
-------------

بت خيخة و أى كلام

و الله يا خيخة أنا بابقى سعيد لما بتعلقى فى الصحيفة .. بجد بابقى سعيد جدا

ندخل فى الموضوع

المشكلة فى لفظ "مستنير" إنه ظهر فى الثقافة الغربية و انتشر بالمعنى الغربى و هو الاستقلال بالعقل و التحرر من قيود التقليد .. و قيود التقليد هنا المقصود بيها "الدين" و دة فى معناه الغربى لأن المسيحية فى أوروبا سيطرت على عقول الناس و أجسادهم و ضمائرهم فلما انتفضوا اعتمدوا على العقل فى مواجهة القيود و تسلط الكنيسة

أما فى الثقافة الإسلامية فـ"الاستنارة" هى التكامل بين العقل و الشرع كما يقول أبو حامد الغزالى من القرن الخامس الهجرى:"العقل مع الشرع نور على نور" و هو دة المعنى اللى أنا أعنيه

أما "السلفية" فممكن نتكلم عنها كتير .. و لكن اختصارا .. الشعار الذى يرفعه السلفيون الآن هو "القرآن و السنة بفهم السلف الصالح" يعنى إشارة إلى الاعتماد على المصادر الأصيلة للدين الإسلامى فى التعامل مع الحاضر بغرض رد البدع و تنقية الدين مما طرأ عليه من دواخل أو بغرض تطبيق للدين الإسلامى على أفضل وجه كما فعل الصحابة
هذا باختصار

و الله يا خيخة أنا بابقى سعيد جدا بتعليقاتك هنا .. و كمان لما عرفتينى إنك بتقرأى المواضيع من غير تعليق فرحت برضه .. و والله مش مهم يا خيخة .. مادامتى بتقرأى المواضيع مش لازم تعلقى .. إن الموضوع يقرأ دة فى حد ذاته شىء جميل

أنا بصراحة كان نفسى كتاباتى يبقى فيها نفس جاذبية كتاباتك .. لكن دى مواهب بقى .. ربنا كرمك بيها ... و كرمنا إننا نتابع مدونتك عشان من المدونات اللى ما بنفوتش منها موضوع

و ابقى خلى شريف يبقى أهلاوى يا خيخة الله يخليكى عشان أعصابه ما تبوظش زى حالاتى
-------------

فرنسا هانم

تعليقك دة و الله بجد أثر فيا جامد .. مش عارف أقول إيه ..الكلام اللى عايز أقوله كتير لكن الكلام مش عايز يطلع .. بس بجد أشكرك يا فرنسا ..و الله أوقات كتير باحس بلا جدوى الحاجات اللى باكتبها .. بس و الله كلامك دة مش عارف أقول لك عمل فيا إيه .. الحمد لله إن الواحد عمل حاجة لقت صدى عند الناس

و كمان كنت سعيد جدا لما عرفت رأيك فى القومية العربية و فى المقاومة اللبنانية ... و طبعا دة شىء مش غريب على أهل بلد الغريب

و مستنيين باقى حكايات المؤرخة فرنسا عن مدينة السويس

صحيح .. نسيت أقول لك .. و كل ما آجى أقول لك أنسى ... انت بتتابعى حلقات محمد حسنين هيكل على الجزيرة كل يوم خميس الساعة تسعة ؟؟ أصله بيتكلم عن حرب السويس .. بقاله حوالى شهرين أهو .. مش عارف انت بتتابعيه و لا لأ
-------------

ammola

لأ .. أرجوكى .. كله إلا البقشيش .. دة هو دة اللى أنا باعيش عليه .. و عشان كدة أنا هافتكرك أهو
أمولة أمولة أمولة أمولة أمولة أمولة أمولة أمولة أمولة أمولة أمولة أمولة أمولة أمولة أمولة أمولة أمولة أمولة أمولة أمولة أمولة أمولة أمولة أمولة أمولة أمولة أمولة أمولة أمولة أمولة أمولة أمولة أمولة أمولة أمولة أمولة

البقشيش بقى يا ريت عشان عايز أأكل العيال و أمهم .. و هنيالك يا فاعل الخير

و الله أشكرك على كلماتك الطيبات .. الحمد لله الذى أعاننا (الباحث و أنا)على أن نقدم للناس شيئا ذا قيمة

و بخصوص اسم "ابن حجر العسقلانى" دة كان نتيجة موقف طويل شوية هأبقى أضربه فى تدوينة قريب بإذن الله

و الله يا أخت أمولة أنا و الباحث بتعجبنا موضوعاتك جدا .. عندك روح فكاهية عالية جدا .. دى بتبقى هبة من عند ربنا .. بس انت مقلة شوية فى المواضيع .. انت وراكى تدريبات زيى و لا إيه ؟؟
-------------

الساحرة

و الله هو مش خطاب تنحى و لا حاجة .. أنا لقيت نفسى باتأخر فى الرد على المعلقين و كمان بانشر مواضيع قليلة جدا .. و كمان لقيتنى مأثر فى حق حاجات تانية عشان الوقت اللى باقضيه فى التدوين كان طويل جدا مش أقل من ساعتين فى اليوم و ساعات أكتر من كدة بكتير .. فقلت أروح أشوف حياتى شوية و بعد كدة راجع لكم بإذن الله و هلقعد على قلبكم
-------------

Soul.o0o.Whisper

أنا مت من الضحك على السؤال بتاع "عمى و عم عيالى" .. انفجرت فى الضحك

أصل أنا لما باقدر حد و أحب أمسمره .. يعنى أثبته .. يعنى أمدحه .. بأطلق عليه مقام "العمومة" يعنى يبقى عمى .. و مش عمى أنا بس ... لأ دة وصل من علو المقام لدرجة إنه يبقى عم عيالى من بعدى برضه .. و مش كدة و بس .. لأ .. دة كان عم جدودى من قبلى برضه

طبعا "عيالى" دة شىء مجازى لأنى لسة "ألووون" يعنى مش مرتبط أصلا .. ربنا يكرمنى يا رب .. و يكرم الباحث كمان

و ألف مليون مبروك ليكى و ربنا يتمم لك بخير يا رب

و إيه دة .. هو الباحث هو اللى حرضك انتى كمان ؟؟ دة شكله كدة هايحترف الاكتشاف و هايشتغل مكتشف و يبيع المدونين لأصحاب المدونات و ياخد عمولة بعد كدة

و الله أنا هاخد الأجازة بإذن الله عشان أركز شوية فى شوية نشاطات أهملتها لفترة .. إلى جانب إنى بقيت مشتت بين حاجات كتيرة و مابقيتش أقدر أرد على الناس إلا بعد فترات طويلة

حاجة تانية .. حاجات كتير بابقى مش مستريح لها .. و بافضل أفكر فيها كتير .. و حاجات كتير بابقى عيز أكتب عنها لكن بامتنع عشان بعض الناس ممكن تتضايق .. إلى جانب إنى دايما باسأل نفسى هل أنا صح و لا غلط .. و باسأل ربنا إنه يهدينى للصواب

و إن شاء الله هابعت لكم آخر موضوع كتبته عن الوطنية اللى هو عن رأى الشيخ الطبيب محمد اسماعيل المقدم على الإيميلات قريب

و ربنا يسهل هابقى أنزل قريب تدونة على سبب اختيارى لاسم "ابن حجر العسقلانى"ا


و بجد أشكرك بشدة لأنك كنتى من أكتر الناس اللى مهتمة و متابعة المواضيع اللى كتبناها .. و دة مجهود أحييكى و أشكرك عليه
-------------
آفاق الحرية

و عليكم السلام و رحمة الله و بركاته

الف شكر على زيارتك الجميلة .. و مستنيين زياراتك لينا دايما
--------------

أبو البواحث عنترة

تأخير الترتيب للاهتمام

أنا مستنى مواضيع أصول الفقه .. عندى أسئلة كتير .. ربنا يسهل كدة و لما تيجى مناسبة تبع الموضوع هابقى اسأل

يا أيها الباحث عن الحقيقة ... أتوجه إليك بكل الشكر و العرفان على وقوفك بجانبى دائما .. شكرا لك

عصفور المدينة said...

جزاك الله خيرا

والله يا هندسة أنا قصدي من ذكر الحدث ليس المنحى الذي أخذته من أن تغضب وتحس هذه الأحاسيس ولكن قصدي الفائدة التي ذكرتها وكيف أننا اكتسبنا إخوانا وتقاربنا في الأفكار بهذا الأسلوب بل وقد اقتنع كثيرون بمبدأ الحوار من خلال الأحداث التي مرت بنا ومنها هذا الحدث الذي افتعلته أنا وربما صحت الأجسام بالعلل

أشرت إليك إلى مدونة لترى أيضا أسلوب الحوار هناك والنتائج التي توصلنا إليها وكيف أن هناك أيضا سخونة في ردود البعض مع عدم الوصول إلى نتيجة

لا تنكر معي يا محمد أن أسلوبك أنت نفسك قد طرأ عليه بعض التغيير خلال هذه الفترة ولقد أصبح جل "زبائنك" من هؤلاء السلفيين المستنيرين

دكتور حر said...

أخي الجميل
ابن حجر
اللي أحيانا بقولك انك بتشوهه
(:

الله يشهد انك من احب المدونين الى قلبي بفكرك الجميل
وعقلك الواعي الفاهم

ربنا يتقبل منك ما كتبت وما ستكتب ويجعل كلماتك دوما نبراسا لنا ومرجعا لنا في مواضيعها وافكارها



ايميلي موجود على المدونه اتمنى التواصل يكون اكبر بإذن الله
لك تحياتي
ودمت بكل الود

ابن حـجـر الـعـسـقـلانـى said...

عصفور المدينة

أخ .. أنا أعتذر عن سوء فهمى .. خلاص أخدت بالى .. تعرف يا أستاذ عصفور .. أنا من ساعة ما دخلت فى موضوع التدوين دة و أنا حياتى اتأثرت بشكل كبير ... و الأهم إنى عرفت حاجات كتير عن التيار السلفى ماكنتش أعرفها .. أو بالأصح .. حاجات كتير اتصححت و اتغيرت للأحسن .. و و الله نفسى أقابلك يا أستاذ عصفور .. بس أنا فى حياتى كلها ما سافرتش اسكندرية إلا حوالى اربع مرات

و معلش يا أستاذ عصفور على تأخرى فى الرد .. بس بارجع كل يوم متأخر

ربنا يحفظك يا أستاذنا

----------------

دكتور حر

و الله انت شخص جميل .. روحك جميلة و كلماتك فى غاية الذوق و التهذيب

و بابقى سعيد إنك علقت .. و معلش أنا مقصر معاك حبتين بس و الله مشغول

و أول ما أخلص المقال هابعته للناس على طول