Thursday, June 19, 2008

للذكر مثل حظ الانثيين ..اشمعنى ؟

السلام عليكم ورحمة الله وبركاته
أقر انا ذو التوقيع ادناه ان حب الاسلام والدفاع عنه فطرة فطرها الله في نفسي وروحي وليس لي فيها فضل لذلك أرجو من الله ان يثيبني على ما قدرني عليه من اجتهاد بأن يجعل لي الاجرين في الصواب والاجر في الخطأ وكل خطأ هو من نفسي والشيطان وكل صواب ارجو ان يثيبني على اني كنت فقط وسيلة اظهاره فليس لاحد فضل في اظهار الحق مهما اجتهد .ان الفضل كله لله ..وقد اتخذ الله جنوده بحيث لا يعلم جنود ربك إلا هو , فينصرن الله هذا الدين بالبر والفاجر ..ولا نعلم ايهما نكون , نتهم انفسنا فالله اعلم بنا من أنفسنا ونرجو ان يتقبل منا صالح عملنا ويجعله شفيعا لنا يوم الدين ..نسألكم الدعاء , والحمد لله رب العالمين
أحمدالباحث
......................................
اليوم هنتكلم ببساطة عن سؤال بيتكرر دايما من بعض الناس حتى المسلمين منهم
وبيقولوا اشمعنى نصيب الولد اكبر من نصيب البنت في الميراث ..فين العدل؟
اولا: ما ينفعش انك تاخد مسأله وتقتطعها كده من منظومتها وتقول اشمعنى
ثانيا : تعالوا نلقي نظرة على منظومة المواريث في الاسلام
هنتكلم باختصار وايجاز شديد جدا علشان ماصدعش دماغكم فيه ناس مش بتحب الحساب
............
اولا انا عندي الانصبة المفروضة في المواريث سته
النصف , الربع , الثمن , الثلثان , الثلث , السدس
وعندي الحالات العملية التطبيقية لهذه الفروض واحد وعشرين حالة ميراث للفروض في الاسلام
النصف فرض في خمس حالات ..نصيب المرأة فيهم اربع حالات من الخمسة
الربع فرض في حالتين ..نصيب المرأة فيهما واحدة
الثمن فرض في حالة واحده ..ترث فيها المرأة فقط
الثلثان فرض في اربع حالات ..ترث فيهن المرأة فقط
الثلث فرض اثنين ..ترث فيهما المرأة حالة الام , وحالة الاخوات فقط وقد تكون مشتركة او ذكور فقط
السدس فرض سبعة ..ترث المرأة فيهم في اربعة, وحالة قد تكون مشتركة
يبقى حالات الميراث في الاسلام الواحد وعشرين المرأة ترث في خمسة عشر حالة اكيدة منهم
وحالتان مشتركتان هي هي اما ذكور واناث هم اخوه واخوات لام للمتوفي او اخوات اناث فقط فتكون هذه الحالة السادسة عشر فيرثن الثلث او تكون الحالة السابعة عشر فيرثن السدس او ذكور فقط
اذن ترث المرأة في سبعة عشر حالة من واحد وعشرين
........................
السؤال هل نصيب الذكر مثل حظ الانثيين مطلقا؟
الجواب : لا بل هو في حالة الابناء فقط
يعني ليس الاسلام متحيزا للرجل ضد المرأة فالرجل لا يرث في كل الحالات ضعف نصيب المرأة
بل هي حالة واحدة فقط
سؤال : هل يمكن ان يكون نصيب المرأة اكبر من نصيب الرجل؟
نعم وهذا مثال في حالة اذا توفي وترك زوجة وبنت وأب وام
فنجد ان نصيب البنت هنا هو اكبر الانصبة واكبر من نصيب اب المتوفي
حيث ترث البنت نصف التركة فرضا ويرث اب المتوفي وجد البنت السدس فرضا
وفي حالة رد الباقي تعصيبا فأن نصيبه لن يصل ابدا الى مثل نصيب البنت
سؤال : اذن ما الحكمة في ان نصيب الابن مثل حظ ابنتين للمتوفي ..اين العدل في ذلك؟
الجواب : العدل هو ان تكون الحقوق في مقابل الواجبات اذا زادت الحقوق تزيد المسئولية والواجبات ايضا
ووجه العدل هنا هو ان الاسلام اعطى للرجل نصيبين واعطى للمرأة نصيب واحد
وجعل واجب النفقة إلزاما على الرجل فقط ولم يلزم به المرأة
فنجد الرجل ملزم بالانفاق على اثنين..هما نفسه واسرته
فإن لم يكن له ابناء وكان عقيم فإن اقل عدد يكون ملزم بالانفاق عليه هو شخصين نفسه وزوجته
في حين ان المرأة غير ملزمه بواجب النفقة على احد
فأستلزم ذلك ان يكون نصيب الابن اكبر من نصيب الابنه
ثانيا : هناك اشكالية قد تجعل الرجل مظلوما لانه يأخذ ضعف المرأة مرة واحدة وليس اضعافا كثيرة
وهي ان المرأة في الاسلام غير ملزمة بالنفقة على نفسها بل نفقتها على زوجها وان كانت اغنى منه او اغنى نساء العالمين ..فربما كان يجب ان يأخذ الرجل اضعافا كثيرة
وقبل ما يفتكر احد ان الراجل دلوقتي هو اللى مظلوم في الميراث نقول
والجواب على هذه الاشكالية البسيطة هى : ان الاسلام فرض العمل على الرجل وجعل العمل والسعي في الكسب واجبا عليه
بينما العمل والسعي في الكسب ليس واجبا على المرأة
لذلك كان يجب ان يجعل لها الاسلام حقا ماليا مقابل عدم إلزامه لها بالعمل ..فمن اين تتكسب اذا كانت غير متزوجة أو ارملة أو هلك عائلها وليس لها عائل سواه يعولها؟
وهذا السبب هو الذي نفسر به جعلها ترث نصف التركة اذا لم يكن معها اخ يعولها في فقرها وحاجتها
كمان في امر كان سببا حسب ما ترويه كتب السنن في فرض نصيب من الميراث للمرأة

جَاءَتْ امْرَأَةُ سَعْدِ بْنِ الرَّبِيعِ بِابْنَتَيْهَا مِنْ سَعْدٍ إِلَى رَسُولِ اللَّهِ صَلَّى اللَّهُ عَلَيْهِ وَسَلَّمَ فَقَالَتْ يَا رَسُولَ اللَّهِ هَاتَانِ ابْنَتَا سَعْدِ بْنِ الرَّبِيعِ قُتِلَ أَبُوهُمَا مَعَكَ يَوْمَ أُحُدٍ شَهِيدًا وَإِنَّ عَمَّهُمَا أَخَذَ مَالَهُمَا فَلَمْ يَدَعْ لَهُمَا مَالًا وَلَا تُنْكَحَانِ إِلَّا وَلَهُمَا مَالٌ قَالَ يَقْضِي اللَّهُ فِي ذَلِكَ فَنَزَلَتْ آيَةُ الْمِيرَاثِ ..الخ
سنن الترمذي- السنن الكبرى للبيهقي- وحسنه الالباني في صحيح وضعيف سنن الترمذي وقال في مشكاة المصابيح رواه أحمد والترمذي وأبو داود وابن ماجة
فالمال هو احد الاسباب التي تنكح المرأة لأجلها - وخاصة اذا لم تكن تلك المرأة الجميلة , وكانت هذه الشكوى من امرأة سعد هي سبب فرض نصيب من الميراث للمرأة
هذا هو الاسلام عدالة تشريعية اخذت بالاعتبار تحقيق العدالة الاجتماعية لذلك صار الاسلام صالحا لكل المجتمعات لانه دين عدل ومنظومة متكاملة يديرها الله سبحانه وتعالى
وَمَنْ لَمْ يَحْكُمْ بِمَا أَنْزَلَ اللَّهُ فَأُولَئِكَ هُمُ الظَّالِمُونَ
والله المستعان

30 comments:

عاشقه الفردوس said...

اول تعليق

بالصدفه والله

بت خيخة وأى كلام said...

طب هل وجود ابن للمتوفى ده بيمنع ان اى حد تانى يورث مع اسرة المتوفى
يعنى اخوات المتوفى من الذكور والاناث مش بيورثوا بدال المتوفى عنده ابن
وهل الام والاب بيورثوا من ابنهم حتى ولو ابنهم ده عنده ابن


جاوبنى بلغة سلسة الله يخليك علشان افهم

وشكرا على البوست ده يا معلمى
تحياتى ليك
اختك خيخة

جنّي said...

السلام عليكم

حرام عليك أحنا لسه ما خدناش نفسنا من البوست السابق .. وجايبلي مواريث تاني وأسئلة من خيخة هاتجاوبها ولا ؟
ما تقوليش جاوب والله مش فاضي الأسبوع القادم بكامله .. بعد كده تحت أمرك ..
قرأت نصف الموضوع هاأكمله وأحضر للتعليق ..
بس حبيت أقولك تعالى وخذ الواجب بتاعك سلام موقت

الباحث عن الحقيقة said...

عاشقة الفردوس
انتي لازم تكوني اول تعليق غصب عنك ..انتى ناسية اني سبق وعملتك معيدة في مدرسة دار الكاشفة للدراسات الاسلامية
وانك اخدتيها بالتزكية بعد تواضع الاخت مجداوية
:)
يعني لازم تكوني اول الحضور
ومنتظر تعليقك ورأيك

عاشقه الفردوس said...

ياااااااااااااااه
انا متضايقه اوي لاني كنت وانا بقرا التدوينه وجدت سطر رااااااااااائع بجد وعملتله كوبي علشان اقولك انهي سطر ده
بس كنت بكلم واحده وعملتها كوبي لحاجه ونسيت انهي سطر


بس بجد رااااااااااائع الموضوع ده

انا مش كنت بفهم في موضوع المواريث

بس يوم ماكنت بحفظ سورة النساء
يااااااااااااااه علي العظمه والعدل في شرع الله

بجد كنت بقرا الايات وابكي

سبحان الله بجد هو الله العدل

جزاك الله خيرا علي مواضيعك القيمه
ربنا يباركلك

عاشقه الفردوس said...

عاشقة الفردوس
انتي لازم تكوني اول تعليق غصب عنك ..انتى ناسية اني سبق وعملتك معيدة في مدرسة دار الكاشفة للدراسات الاسلامية
وانك اخدتيها بالتزكية بعد تواضع الاخت مجداوية
:)



ايه ده
ده امتي ده
surprised face
:)))

الباحث عن الحقيقة said...

بت خيخة واي كلام
والله دايما في بالي واسأل هي مش بتيجي ليه

بصي يا ستي بكل بساطة ومن غير تعقيد
الاب والام يرثوا رغم وجود الابن الذكر
وياخذ كل واحد فيهم السدس والزوجة تاخد الثمن والباقي يأخذه الابن الذكر
واذا له اخت يتقسم الباقي بينهم هو ياخد قدها مرتين
يعنى الاب لازم يورث ونصيبة السدس فرضا
.....
في حالة لو معندوش ابناء ومات فهل يرث اخواته فيه مع وجود ابوهم على قيد الحياة ؟
نقول لا : الاب هنا يحجب الاخوة لانه كل من اتصل بالمتوفي بوارث فانه يحجبه
يعني الاب يحجب اخوة المتوفي عن الميراث لانهم متصلين بالمتوفي عن طريقه
واي خدمة يا خيخه
وبلاش تتأخري علينا

جنّي said...

أنت موجود وبترد على تعليقات زوارك .. جميل.. نبدأ.. بسم الله .. أقول وبالله التوفيق .. أولا نحسبك على خير ولا نزكيك على الله تعالى ..

هذا هو ديننا دين الوسطية والاعتدال لم يتحيز لرجل أو امرأة وأعطى كل حقه غير منقوص والله تعالى خير من قدر الأمور بقدرها فأعطى الرجل والمرأة بحسب ما قدره لهم هو سبحانه وتعالى من وظائف تتفق وطبيعة كل منهما ..

وأخبرا قمة الإيمان بالله تعالى تطبيق تعاليمه دون النظر في الحكمة من فرضها
شكر الله لك وجعل مواضيعك في ميزان حسناتك

الباحث عن الحقيقة said...

جني ابو السيد
هو انت رحت مكة اللى في شبرا ولا اية
حمد لله على السلامه يا حبيب قلبي
يوم تاني غياب وكنت هعيط
اه انا ممكن اكسل في رد الزيارات بس اللى في القلب في القلب
ولو قصدك واجب لعلها بخير فده مبعوت لي قبلك يا جميل

الباحث عن الحقيقة said...

عاشقة الفردوس , سيد , الباحث
احنا التلاته على الهوا دلوقتي وبعدين التعليقات هتدخل في بعضهااااا
يعني اشد شعري يعني واشيل الل باقي منهم ولا ايه

عاشقة الفردوس
ركزي معايا شوية السطر ده كان عندك تعقيب او سؤال عنه يعني ونسيتي؟
وبعدين انتى تجارة انجلش
يعني لو بصيتي في المواريث راح تعجبك جدا ..انا جايب جيد جدا في مادة المواريث وذاكرتها في اسبوع واحد بس تقريبا
مش فاكرة عينتك معيدة امتى؟؟
طيب كويس ده هيسهل علينا اننا نلغي القرار
بس هعتبر ده انذار من هنا ورايح تجيبي كرسي وتقعدي على باب المدونة
ولا اقولك عايزك انتى كل يوم تيجي تفتحي الصبح
وهديلك اتنين جنية
في الاسبوووووع

عاشقه الفردوس said...

ركزي معايا شوية السطر ده كان عندك تعقيب او سؤال عنه يعني ونسيتي؟


لا لا لا ده سطر انت كنت كاتبه عجبني اوي وكنت شايفاه انه بالمدونه بحالها


:::::::::::::::::::::::::


اتنين جنيه في الاسبوع

ياربي ع البخل


ربنا يباركلك ياباحث ويفتح عليك ويرزقك من علمه


معلش مش هبقي معاكو ع الهوا لمده ساعه

سلام

الفاتح الجعفري said...

ما شاء الله اخي الحبيب
احياك الله ناصرا للاسلام واماتك مدافعا عنه بأذن الله
رائع حقا تثرينا وتفيدنا كثير جزاك الله عنا كل خير واحسن الله اليك
ونقر ونعترف ونشهد ان الله لايظلم مثقال ذرة وكل شرع نزل هو الحق والعدل والانصاف موقنين بدلالة او من غير دلالة موقنين لانه من عند العزيز الحكيم
ولكن حقا حجج دامغة متعقلة
بارك الله في عمرك
وجزاكم الله خيرا كثيرا

جنّي said...

مكة اللي في شبرا .. ماشي محروم من العريكة لتاني مرة

أنت ناسي إني جني ..

اللي معاك على الهوا دا الجثة فقط أما الروح هناك في الحرم ..

بقولك ايه سيبك من عاشقة الفردوس أنا مستعد أجيلك من الفجرية أكنس وأرش ميه ولي شايي وسكري وسجايري قلت أيه ؟

بلغ حبيبك ابن حجر يجي ياخد الواجب هو كمان واتسلو سوا وحلوه ..

الباحث عن الحقيقة said...

عاشقة الفردوس
سطر وشايفاه بالمدونة بحالها
ايه الجرأة دي
وبتقوليها ومش خايفه
خصم اول اتنين جنية من المرتب

***********

الفاتح الجعفري
والله العظيم كنت في بالي النهاردة
واقول لا انا لازم اروح ان شاء الله حتى اسلم وخلاص
جايلك يا فاتح بس اياك ألاقيك قافل


***********

الجني سيد
مانا لو اعرف ايه العريكة دي كنت زعلت عليها
وبعدين يا باشا ده شرف لينا ان انت ترش المدونة
قبل ما تحلف ..ثواني اجيبلك الجردل والمقشة
بس عاشقة كنا هندفعلها
انت بقى هتدفع كام
نيهاهاهاها
وبمناسبة نيهاهاها دي اقولك عسقول مشغول جدا وشعلك اتنفخ في الشغل بسبب الشغل اللى كان مطلوب منه ولسه مش خلصه
بس ياريت ييجي يحل الواجب علشان انا بيجينى مغص من الواجبات

nigro said...

ربنا يجازيك خير على مواضيعك القيمة دي يا أبو حميد
انت بجد بتُثرينا بموضوعاتك دي
مسائل المواريث من المسائل المتداخلة اللي بيصعب على الواحد استحضارها دائماً رغم فهمها
توضيحك اللي في الأول ده بجد عجبني جداً لدرجة إني بسببه أخدت البوست كله
copy-paste
عندي على الجهاز

ربنا يباركلك يا أحمد
و زادك الله علماً و عقلاً
و نفعنا بعلمك

يلا سلام

مع اصرارى said...
This comment has been removed by the author.
مع اصرارى said...

ربنا يباركلك يا أحمد
لسة عارف دلوقتى من نيجرو ان اسمك احمد
بص بقى يا حج أحمد يا محامى
إنت الكلام اللى فى لأول جايبه منين؟
يعنى مصدره ايه؟
ماتخافش وما تتضايقش أنا قصدى خير!
يعنى الموضوع ده مقتبس من حد ولا بتاعك.
معلش يا بو حميد أصل الموضوع ده مهم جدا. لإن الكلام ده فيه فتح من ربنا حاجة ماحدش قالها قبل كدة واللى ربنا بيديله حاجة زى كدة وبيجرى على ايديه فتح بيكون راضى عنه."نصر من الله وفتح قريب" ربنا راضى عنك يا أحمد إنك سمعتنى كلام أول مرة اسمعه ومنطق أول مرة أفكر بيه وحسابات ما خطرتش على بالى قبل كدة ربنا يفتح علينا زى ما فتح عليك
وتقبل تح.... وافر احترامى


تم حذف التعليق السابق لخطأ إملائى فى نص قرآنى. آسف

الباحث عن الحقيقة said...

نيجرو
والله انا اللى بشكركم على سرعة تجاوبك وتفاعكلم مع اللى بنكتبه
لان ده بيشجعنا ديما على الاستمرار واننا نقدم الجديد بشكل اسرع
ولو كنت اعرف انك هتاخده كابي بيست كنت زودت في ذكر الحالات بشكل تفصيلي شويه بس انت عارف انا هنا عايز اوصل الفكرة اكتر من المعلومة
لان المعلومة بتحتاج لشرح مستفيض خاصة لما تكون شرعية علشان تحس انك عملت اللى عليك
شكرا يا نيجرو
ربنا يبارك فيك ويجزاك خير على تشجعيك لنا

الباحث عن الحقيقة said...

مع اصراري
بيني وبينك انا لقيت نفسي هيدخلني العجب
بصراحة
وانا عارف حالي من التقصير ..فخفت على نفسي من فتنة النفس
فأسترسلت في الكلمات دي علشان اذكر نفسي بحقيقة اننا ليس لنا فضل في ما نكتبه او نقدمه للناس
وان الفضل فيه لربنا
ونحمد ربنا انه استعملنا في خدمة الدين ودي نعمة كبيره على المقصرين امثالي اللى ربنا اعلم بحالهم
شكرا ليك على تشجيع حضرتك
وانا كمان بيعجبني فكرة واسلوبك وتأملك الهادي والجميل

مجداوية said...

السلام على من اتبع الهدى
وأنا بأقول شرقت ليه شرقت ليه !!1
ربنا يذكرك دايما بالخير أخى الكريم
وتحياتى وسلامى لكل التلاميذ والأساتذة والمعيدين والمعيدات ولرئيس الجامعة ,,هى مش كانت مدرسة ؟ظبقى فيها معيدين امتى
ما علينا
المهم
اتفضل تعالى اشرب الشربات عندنا
ولأختى الحبيبة عاشقة الفردوس انت استاذتنا وبالتزكية وبدون منافس
ولموضوعك القيم
أقول
الله اسمع العدل واسمه القيوم
فأنت أستاذى لا تدافع عن الاسلام لأن اذا عجز الانسان عن فهم حمة الله فالقصور فى الانسان واذا قال اشمعنى فلا يستحق ان يكون مسلم
ولكن مع هذا فعرضك للمساله رائع وسهل ويظهر براعة واستحقاق لرئاسة الجامعة الكاشفة

احترامى وامتنانى

الباحث عن الحقيقة said...

مجداوية
طبعا انا من فرحتى بعودتك جريت على طول على مدونتك
مبروك نجاح نسمة

جنّي said...

السلام عليكم

لما انت مش عارف العريكة ما تعملش نفسك ناصح وتقولي بتلزق في السنان

بالنسبة للمطبق ما روحتش الحسين مرة وأكلت فطيرة محشية بالمكسرات والقشطة مثلا .. أهو المطبق فطيرة محشية لحمة مفرومة وكرات وطماطم وتوابل ..أو محشوة موز مهروس بالبيض والسكر .. أو جبنة أو قشطة ..

المعصوب مش ها تصدق ..
فطيرة سادة تفرم في المفرمة ثم يضاف إليها موز مفروم في المفرمة وتخلط المقادير ويوضع عليها قشطة أو سمن ..

نيجي للعريكة ..
تشبه العصيدة .. عبارة عن طحين بر وسمن بري وتمر وتطبخ مثل العصيدة ويوضع عليها العسل الأبيض ..

إحنا قلبناها مطعم الكاشفة وتركنا المواريث .. أنت اللي سألت عن العريكة
سلام

الباحث عن الحقيقة said...

وطبعا فاكر ان العك اللى انت بتعكه ده هيخلي ريقي يجري مثلا
هأو
ده قلب معدتي يا عم

اه اكلت المطبق بالوصف اللى انت بتقول عليه ده تقريبا عزمني عليه عسقول في الحسين
:))))
ابتسامة عريضة
اصلها كانت اكله وفضيحة دولية
كان قعد قبالنا فرنساويين وكنا بناكل بأدينا وهم قعدوا يتفرجوا علينا
تقولش احنا اللى سواح

الفارس الملثم said...

المشكله ي بعض اللي بينتقدوا احكام الاسلام انهم غير مدركين ان الاسلام واحكامه جائت موافقه لكل الازمنه والعصور والبيئات وهدفه الاسمي تحقيق العدالة ومراعاة اختلاف طبائع البشر وتناقضاتهم

ففي اوربا مثلا في العصور السابقه لم يكن للمرأه اي حقوق بينما الاسلام ضمن حقوقها الكاملة منذ اكثرمن 1400 سنه ولما جاءت دعاوي تحرير المرأه تطرفوا في تفكيرهم وافترضوا ان المساواه في كل شئ تمثل العداله المطلقه دون ان يدركوا باختلاف طبيعة كل من الرجل والمرأه

الاسلام حمل في روحه العدل المطلق وهو شئ عجزوا عن ادراكه بنظرتهم السطحيه للاشياء

بوست قيم جدا

تحياتي
محمد

Soooo said...

سلامو عليكوووووووو

بص ياعمنا
انا جاي اعلق عشان قريتلك تعليق عند مجداويه بتقول فيه انك بتجيلك حالة احباط شويه لما بتلاقي الناس مش بتتفاعل معاك وتعلق في الصحيفه الكاشفه وبيروحو الاستراحه ومقضينها مشاريب عشان ابو العساعيس عمال يبعزق ومش بياحد فلوس من حد وفاتحها سبيل

وعايز اقولك حاجتين
حاجه عامه .. وحاجه خاصه

الحاجه العامه .. هي اياك تفكر بالشكل ده .. انا مقدر طبعا ان عدم تفاعل الناس بيخليك تصاب باحباط نسبي .. لكن صدقني ده طبيعي
انت بتعمل لربنا
يعني احتسب عند ربنا واقسملك بالله العظيم انك هتلاقي اللي بتعمله ده عند ربنا يوم القيامه اضعاف مضاعفه من مجرد تعليق لواحد او كلمة شكر من حد
احتسب ثواب اللي انت بتقولو ده عند ربنا وكفى بالله حسيبا

الحاجه الخاصه .. انا باجي هنا كتير قوي وباقرأ اللي انت بتكتبه وبجد باستفيد بيه أيما استفاده
بس مش باعرف اعلق .. خصوصا اني باميل للهزار في تعليقاتي وباخاف حد يفسر هزاري اني باقلل من اللي بتقولو او بتتكلم فيه
فباكتفي اني اقرا وادعيلك بضهر الغيب وربنا يجعل دعايا ده في ميزان حسناتك ان شاء الله

بجد انت بسم الله ماشاء الله عليك انت وابو العساعيس
وربنا يارب يارب يسعدكم ويكرمك ويبسطك ويوفقكم ويرضيكم دنيا وآخره يارب



سلامووووووووووز

الباحث عن الحقيقة said...

الفارس الملثم
اشكر تواجدك الكريم
وبالفعل اعداء الاسلام لا يجدوا شئ لاتهام الاسلام سوى ان يدعوا علينا بأن الاسلام ينتقص من حقوق المرأة
وهم يدعون العدالة المطلقة وبالتالي يجب ان تكون هناك مساواه كاملة
وهذا هو الخطأ بعينة
العدالة لا تكون مطلقة
بمعنى انه اذا كان عندى ثقلين مختلفين في الحجم ورجلين شاب وعجوز
بالتأكيد اني سوف اجعل الشاب يحمل الثقل الاكبر من العجوز
وهذه هي العدالة
فاذا قال قائل ولماذا لا نجعل الثقلين في نفس الحجم
نجيبه بأن الثقل يتم تحديده بناء على مواصفات من سيحملة
لا يمكن ان اجعل شاب وعجوز او رجل وامرأة يحملان نفس الثقل من اجل ادعاء المساواه
وفي النهاية تسقط المرأة في حمل الثقل او الشيخ العجوز لان طاقتهما البدنية ليست مثل طاقة الرجل الشاب
فالعدل ان يحمل كل شخص بمقدار طاقته
وليست العدالة مطلقه

شكرا لتشريفك واطرائك على البوست

************

اخي الحبيب سووووو
اشكرك على تواجدك
وانا اعلم ان هناك من يقرأ ولا يعلق
لانك حين تنظر في عدد الزائرين اجد الزائرين مثلا لهذا اليوم ثمانين او تسعين
بالتأكيد ان احدهم قرأ موضوعا ..او حتى فقرة واحده
ولكن التعليقات تبين لنا رأيكم فيما نكتبه
والاسلوب وطريقة العرض
فربما مثلا اشك ان عدم التعليق سببه ان الاسلوب صعب او معقد او ممل
لذلك احتاج ان اعرف رأيكم وذلك يكون من خلال التعليقات
وشكرا لك على تجاوبك وتفاعلك مع كلامي اللى قلته عند مجداوية
اهلا بيك يا سووو دايما

shaimaa elgarhy said...

الاول بس احب اعتذر عن تأخيرى عن معاد الدرس أرجوقبول الاعتذار..

وده لانى بجد بحب المدونه دى جدااااااا

مش هقول اد ايه؟؟

ثانيا بقه ..لازم نستدل بأيه من الذكر الحكيم اللى وضعه لنا الله عز وجل وقالنا عنه رسولنا صلى الله عليه وسلم"تركت فيكم ما ان تمسكتم به لن تضلوا بعدى ابدا"

حيث يقول الله تبارك وتعالى " واذا حكمتم بين الناس فحكموا بالعدل"

فهل يظن احد منا ان يامر الله تعالى مخلوقه بشئ ولم ياتى سبحانه وتعالى به طبعاً لأ تعالى الله عن ذلك علوا كبيراً

علشان كده لازم نكون مستسلمين لك مايأمر الله به حتى لو ما نعرفش ايه السبب فى كده

ولا تحتاج ربوبية الله جل شأنه وتعالى حتى الى مجردالتفسير لما يأمرنا به الله ولكن مع ذلك برضه ربنا مامنعش اننا نبحث وندور ولكن فى الاخر معرف ايه اللى احنا هنوصل من علم "وهو ده بقه بالتحديد اللى ربنا تبارك وتعالى عايزنا نعرفه"

ثالث حاجه والاخيرة ...عندى سؤال إذا كان هناك ميراث فرضاً انه بيت عيله والاب يمتلك النص والام تمتلك النص مع العلم انهم منفصلين"مطلقين"

وجه اللاب عايز يبيع البيت ده هل من حقه بعدمايدى الام نص حقها انه يحرم اولاده من الميراث فى الجزء بتاعه ...ولانى عارفه انه اكيد مش من حقه فبسأل ما هو حكم الشرع فى ذلك على هذا الاب

جزاك الله خيراً

موضوع فى الجون...

الباحث عن الحقيقة said...

شيماء الجارحي
سعادتنا برؤيتكم في الدونة ومتابعتكم لنا بتخلينا ننسى زعلنا من تقصيركم في الزيارة
علشان عارفين انكم بتتابعوا حتى اللى فاتكم

بالنسبة لسؤالك هل يأثم ؟
نعم فالذي يخالف شرع الله ويحرم اصحاب الحقوق من الحقوق التى فرضها الله لهم
هو كالمستهزء بايات الله والعياذ بالله
يقول الله تعالى
وَلَا تَتَّخِذُوا آَيَاتِ اللَّهِ هُزُوًا
ويقول تعالى
وَقَدْ نَزَّلَ عَلَيْكُمْ فِي الْكِتَابِ أَنْ إِذَا سَمِعْتُمْ آَيَاتِ اللَّهِ يُكْفَرُ بِهَا وَيُسْتَهْزَأُ بِهَا فَلَا تَقْعُدُوا مَعَهُمْ حَتَّى يَخُوضُوا فِي حَدِيثٍ غَيْرِهِ إِنَّكُمْ إِذًا مِثْلُهُمْ إِنَّ اللَّهَ جَامِعُ الْمُنَافِقِينَ وَالْكَافِرِينَ فِي جَهَنَّمَ جَمِيعًا

ويقول
وَيْلٌ لِكُلِّ أَفَّاكٍ أَثِيمٍ (7) يَسْمَعُ آَيَاتِ اللَّهِ تُتْلَى عَلَيْهِ ثُمَّ يُصِرُّ مُسْتَكْبِرًا كَأَنْ لَمْ يَسْمَعْهَا فَبَشِّرْهُ بِعَذَابٍ أَلِيمٍ

فالذي يستمع لايات الله ثم لا يعمل بها فهو مستهزء بها وجاحد لها وله عذاب عظيم كأمثالة من الكفار المستهزئين

هل له عقوبة دنيوية؟
لو أقام عليه الحاكم حد الحرابة ما رأينا عليه اعتراض
لان الذي يخالف شرع الله ويمنع حقوق الله هو كالمحارب لله ورسوله
فيستحق حد الحرابة

بأختصار يا اختي
ما جزاء من يعصي الله ويصر على عصيانه؟
أليس هذا هو فعل أبليس
ارجو ان يتق الله هذا الرجل ويدرك نفسه قبل فوات الاوان

صبرني يارب said...

لا فض فوك يا باحث

بجد المهاجمين فى النقاط دي عندهم قصور فى التفكير .
وشمولية الدين الاسلامي وتكامله اكبر من فهمهم

تسلم يا باحث على البوست الجميل ولو انك وحش

الباحث عن الحقيقة said...

صبرني يا رب
تو ما افتكرتينا
رغم اننا بنتابع مدونتك رؤية اسلامية دايما وعمري ما قصرت
وزي ما قلت لحضرتك بس الموضوع الاخير بتاع شارب الخمر كان كويس ومش فيه حاجه اعلق عليها
ومنتظر الجزء التاني
واهلا وسهلا بحضرتك
شوفتي ازاى حضرتك بيفوتك المواضيع بقى