Friday, March 14, 2008

الفرق بين : فرض العين وفرض الكفاية , والحرام لذاته والحرام لغيره؟؟

السلام عليكم ورحمة الله وبركاته
معلش اتأخرت عليكم
انا عارف ان الموضوعات دى مش سهله .. لذلك تم تغيير الخطة الى تقديم موضوعات ميسرة فى اصول الفقه
مش هنقول كل حاجة بالتفصيل هنقول اللى يهمك انت كمسلم انك تعرفه واللى عايز يهتم بالعلم ده يقدر ينزل الكتب من النت او يجتهد بطريقته فى تحصيل هذا العلم العظيم
نبدأ
قلنا تعريف الواجب الدرس السابق وازاى افرق بين الواجب والمندوب لان كلاهما بيأتى بصيغة الامر : أفعل .. وقنا بيكون فيه قرينة منصوص او غير منصوص عليها
ايه نسيتم كده بسرعة ولا ايه؟؟ ..هات العصاية يابن حجر من الفصل اللى جنبنا بسرعة
اليوم هنتكلم عن اقسام الواجب
طبعا الواجب له اقسام كتيره بتختلف حسب الاساس اللى بيتم عليه التقسيم
وسواء كان الواجب موسع او مضيق في وقته ..وسواء كان مخير فيه بين عدة امور زى التخيير فى واجب كفارة اليمين بين الاطعام او الكسوة او عتق رقبه او صيام ثلاثة ايام او غيرمخير ومعين مثل الصلاة ..وسواء كان واجب مقيد بوقت زى صوم رمضان او غير مقيد بوقت زى اداء الكفارات ..او واجب مقدر بمقدار معلوم زى الزكاة او غير مقدر زى النفقة في سبيل الله
فكل هذا واجب يتعين على الفرد المسلم الاتيان به.. وتقريبا كده يعتبر شرحناهم باختصار
لكن المهم تعرف الفرق بين الواجب العينى والواجب الكفائى
او زى ما بنسمع يقولوا : فرض عينى وفرض كفاية ..والفرض بمعنى الواجب عند جمهور الفقهاء
طب ايه اهمية انك تعرف الفرق بينهما ؟؟ علشان تعرف ايه الواجب اللى لازم تعمله بنفسك ..وايه الواجب اللى لو غيرك عمله يبقى انت براءة ومش عليك حاجة؟؟
نقول
الواجب العيني : هو ما طلبه الله من كل فرد من الافراد المكلفين ..المكلف يعنى مسلم بالغ عاقل
مثال : الصلاة الصوم الزكاة الحج , واداء الكفارات زى كفارة اليمين
الواجب الكفائي : هو ما طلبه الله من مجموع المكلفين بحيث لو قام به البعض فانه يسقط عن الباقى - وسمى كفائى لانه يكتفى فيه بقيام البعض بفعله
يعنى ببساطه المسلمين هنا بيكونوا زى " تيم وورك " او " جروب " المجموعه دى مطلوب منها تعمل كذا ..يبقى لو واحد عمل الشئ ده او كلهم مش هتفرق المهم انه يتعمل ..مثال المجموعة دى عليها انها تبنى حائط مثلا ..لو واحد بس بنى الحائط فانه يغنى عن المجموعه ..او لو فى مسابقه فيها مجموعتين لو واحد من المجموعه جاوب النقطه بتحسب للفريق كله
نقول امثله شرعية : رد السلام واجب كفائي او فرض كفاية زى ما اشتهر بين الناس
..تعلم العلوم الشرعية وافتاء المسلمين, تغسيل الميت وتكفينه والصلاة عليه فرض كفاية
طيب ازاى افرق بين واجب العين وواجب الكفاية؟؟ علشان اعرف ايه اللى لو حد عمله ..انا ممكن خلاص ما اعملوشششش؟؟
واجب العين : هوكل امر فرضه الله وجعله حقا لله على العباد ..زى الصلاة والصوم والعبادات جميعا
واجب كفاية : هو ما فرضه الله وجعله حقا للعباد على العباد ..زى رد السلام ده حق ربنا فرضه لصالح العبد اللى ألقى السلام ..وصلاة الجنازة وتشييعها حق ربنا فرضه حق للعبد على العبد المسلم
اهو النوع ده هو اللى لو عمله البعض سقط عن الجميع
..................
كده كفاية علينا اللى عرفناه عن الواجب واظن الدرس يسمع اننا ناخد نتكلم كمان عن الحرام
فاصل ونواصل
اعلان تجارى : مع استراحة الكاشفة اشرب واكسب ..كل خمس مشروبات من الاستراحة عليهم مشروب مجاني عبارة عن كوب واحد ماء
مع تحيات ابو العساقيل
رئيس مجلس الادارة ابو البواحث
...................
عـــــــــــدنــــــــــــــــــــــا
نكمل الدرس
الحــــــــــــــــــــــرام
الحرام هو : طلب الكف عن الفعل طلبا جازما وقاطعا
وده بييجى بصيغة النهى المعروفه : لا تفعل
ولكن قد يأتى باكثر من صيغة اخرى مثل نفي الفعل : لا تقربوا الزنا .. ومثل لفظ الاجتناب : اجتنبوا كثيرا من الظن ..ومثل نفي الحل : لا يحل دم امرئ مسلم إلا بثلاث ... او يأتى بلفظ حرم مثل : حرمت عليكم امهاتكم
وقد يستفاد التحريم من خلال التوعد بالعقاب على الفعل مثال : ومن يقتل مؤمنا متعمدا فجزاؤه جهنم خالدا فيها
انــــــــــواع الحــــــــــــــــرام
حــــــــــــرام لذاتـــــــــــه ... حـــــــــــــــــرام لغيـــــــــــــــره
يعنى ايه الكلام ده : الحرام لذاته هو اللى ربنا حرمه لما فيه من ضرر متعلق بذاته ..يعنى الشئ ده ضرر ..مثل القتل , السرقة , شرب الخمر , اكل الميتة , الزنا , زواج المحارم ..الخ
والحرام لغيره هو : ما حرمه الله لا لذاته ولكن لما يترتب عليه من فعل محرم او ما يقترن به من امر يستلزم تحريمه
يعنى الحرام لغيره نوعين
النوع الاول حرام لغيره يترتب على فعله فعل امر محرم ..مثال النظرالى عورة المرأة يترتب عليه فعل محرم هو النوع الزنا ..الزواج من الاختين او البنت وعمتها او البنت وخالتها ..يترتب عليه فعل محرم هو قطع الارحام
يقول النبي صلى الله عليه وسلم لا تنكح المرأة على عمتها ولا على خالتها ولا على ابنة اخيها ولا على ابنة اختها انكم ان فعلتم ذلك قطعتم ارحامكم
النوع الثاني من الحرام لغيره هو : الحرام بسبب ما يقترن به من امور تستلزم تحريمه
يعنى الفعل نفسه مشروع وجائز ولكن يقترن به او يرتبط به امر يجعله حرام
مثال : الصوم يوم العيد .. صوم التطوع مباح ..ولو كان صوم كفارة فهو واجب ..ولكن اذا اقترن او ارتبط بامر هو انه حصل يوم عيد فقد اصبح حراما
وليه الصوم يوم العيد حرام لان المسلم فى يوم العيد يكون في ضيافة الله وحق على المضيف ان يكرم ضيفه وصوم العبد فى هذا اليوم بمثابة رفض لما يقدمه الله له واعراض عن ضيافته سبحانه وتعالى
مثال اخر : البيع وقت النداء لصلاة الجمعة ..البيع مشروع وحلال ..لكن حصوله وقت النداء للجمعة جعله غير مشروع وحرام لقوله تعالى : اذا نودى للصلاة من يوم الجمعة فاسعوا الى ذكر الله وذروا البيع
طيب ايه النتيجة المترتبه على تقسيم الحرام الى حرام لذاته وحرام لغيره؟؟
قال الفقهاء الحرام لذاته لا يصلح ان يكون محلا للتعاقد ..يعنى لا يجوز ان تبيع او تشترى اللحوم الميته او الزواج بالمحارم او بيع الخمور او الاتفاق على السرقة
اما الحرام لغيره فانه يصلح ان يكون محلا للتعاقد وتترتب عليه اثاره ..يعنى البيع وقت النداء لصلاة الجمعة حرام لغيره ولكنه بيع صحيح يلتزم فيه البائع بتسليم المبيع ويلتزم المشترى بدفع الثمن ..ولكنهما رغم ذلك عليهما إثم البيع وقت النداء للجمعة
الفرق الثانى : ان الحرام لذاته لا يباح إلا عند الضرورة ..مثال اكل الميتة خشية الهلاك جوعا ..او شرب الخمر لازالة الغصة عند الاكل (يعنى ينزل لقمه واقفه فى زوره ومفيش قدامه غير الخمر فيباح له ذلك رخصة من الله ..بس مش يسوق فيها طبعا) ..اما الحرام لغيره فانه يباح عند الحاجة ..والحاجة اخف من الضرورة
مثال : اباحة البيع وقت النداء من يوم الجمعة عند الحاجة إليه ..مثلا بائع فائت من الشارع ومعاه بضاعه انت محتاجها وقت النداء لصلاة الجمعة يباح لك انك تشترى فى هذا الوقت
مثال اخر يجوز للطبيب ان ينظر الى عورة المرأة بقصد العلاج او الولادة عند عدم وجود انثى تجيد مهنة الطب
........
كفاية عليكم كده النهاردة .. علشان لسه فيه طلبه ما دفعوش الرسوووم

44 comments:

بنت الصالحين said...

ماشاء الله حلو الدرس ده ومش كبير زي المره اللي فاتت


بس يعني لما ننسي لازم تجيب العصايه

في ميزان حسناتكم باذن الله

اللؤلؤة المكنونة said...

هو اللى هتفوته حصة هتعمله فيه ايه ؟

مش العنف ممنوع برضه فى المدارس ولا انتم مش تبع الوزارة ؟؟؟

بجد

جزاكم الله خيرا
استمتعت واستفدت
فى ميزان حسناتكم ان شاء الله

الباحث عن الحقيقة said...

الاخت /عاشقة الفردوس
السلام عليكم ورحمة الله وبركاته
اهلا بيكى يا فندم منورة المدرسة وشكرا على متابعتك الجادة واهتمامك
اه اللى هينسى هجيب العصاية انا مش بعد التعب ده كله يجى حد يكون مش مذاكر
وعلشان محدش يفكر ياخد دروس خصوصية بره ..هو حر هحطله صفر فى اعمال السنة

....................

الاخت / اللؤلوة المكنونة
اللى هتفوته حصة ..امم حاجه بسيطة
هنفتح شنطة العدة ونطلع الكماشة ونقلع ضوافره ونشد رموشه
وبعد نخبطه مفك في عينه نعمله عاهة مستديمه وييجى يقعد فى الاستراحة يمد ايده ويقول لله يا محسنين
هههه
جميل جدا جدا مقولة : استمتعت واستفدت
بجد انا فى غاية السعادة والامتنان على رأيكم ده
لان ده بيحسسنى ان مجهودى وتعبى جاب نتيجه واثمر ثمرة طيبه وهى انى قدرت اوصله للناس بسهوله ويسر
جزاكم الله خيرا على المتابعة وانا اللى بشكركم جميعا كلكم
والدرس اللى يفوتك تراجعيه طبعا لانى هعملكم اختبار مفاجئ يوم الاتنين الساعة 4 بعد العصر
سنة 2017
يعنى تذاكرى من دلوقتى

ابن حـجـر الـعـسـقـلانـى said...

أبو البواحث يا كبييير

الله ينور عليك يا كبير

معلش يا باحث .. النت فاصل عندى من خمسة أيام و ماعرفتش أدخل النت خالص

المهم يا معلم .. أنا جيت جرى أهو و معايا صندوق الحاجة الساقعة لزم تلقيط الرزق ... و على ما الناس تاخد الحاجة الساقعة فيه سؤال كدة فى السريع .. ماعرفتش أجاوبه فى الكتاب اللى اشتريته لما كنت معاك ... السؤال بيقول

قد يكون الواجب موسعا من وجه مضيقا من وجه آخر و يسمونه "ذا الشبهين" و مثلوا له بالحج. وضح ذلك فيه. و هل مثله صوم الكفارة ؟؟

جاوب و اشرح لى الله يهديك عشان مش فاهم حاجة

أسيبك بقى و أروح ألم القزايز الفاضية و آخد الحساب

حاجة تانية ... الماسنجر مش عايز يفتح عندى عشان عايز يعمل تحديث لنفسه .. و كل ما يعمل تحديث يتوقف و مايرضاش يكمل

مستنى الإجابة يا برنس

ahmed mefrh said...

السلام عليكم
طبتم و جزاكم الله خيرا
تحياتى ابو مفراح

مروة الزارع said...

بجد الله ةةةةةةةةة عليك

وجزاك الله خيرا على لبوست دة

مجداوية said...

أستاذنا الفاضل
أنا سألت حضرتك الحصة اللى فاتت فين أدفع المصاريف ولم أتلق جوابا فالتقصير فى تحصيل الرسوم من حضرتك أنا ماسكة المصاريف فى ايدى من المرة اللى فاتت ,ووكمان طلبت من حضرتك تكبر الخط عشان نظرى ضعيف أو تقعدنى أول الصف لكن برضه الكتابة زى ما هى وطبعا الستات لازم يقعدوا ورا وأنا مش شايفة كويس ممكن حضرتك تكبر البونط شوية ,أما درس اليوم فهو مفيد جدا رغم المجهود البصرى لقراءته لكن فعلا جزاك الله كل خير أسلوب سهل ممتنع ,,التدريس ده موهبه بس أرجوك تكبر البونط شوية أنا عضمة كبيرة ونظرى على أدى ولك خالص الشكر وخالص التحية

الباحث عن الحقيقة said...

الزميل الفاضل / ابو العساقيل
ماشى يا عم ..بقى تجى منك وماتجيش من الغريب ومش مكسوف
يظهر انى كان لازم اعملك امتحان الاول انت فورا تجهز السى في بتاعك علشان اعملك دوسيه عندى
اسمع يا تاعبنى
هتكلم باختصار علشان التعليق ما ياخدش مساحة كبيره ..عايزين نوفر
واجب موسع فى وقته : هو الذى يتسع وقته لادائه واداء غيره من جنسه ..ده عند الاحناف مثال صلاة الظهر وقتها ممدود حتى صلاة العصر ده واجب موسع فى وقته تقدر تصلى فيه صلاة الفرض او صلاة تطوع يعنى من جنس الفريضه دى صلاة بس فرض ودى صلاة ولكن تطوع او قضاء مثلا
اما عند الشافعيه فيقولون الواجب الموسع هو الذى يتسع وقته لادائة واداء غيره معه سواء من جنسه او غير جنسه
يعنى مثلا خلال الوقت الممتد للصلاة تقدر تصلى الواجب وتقدر تصلى تطوع او تكفر عن يمينك او تصل رحمك فهنا وقت الصلاة الممتد اتسع ليشمل الصلاة وغير الصلاة وذلك فى الوقت بين الصلاة الى الصلاة التى تليها
واجب مضيق فى وقته يعنى لا يتسع إلا لادائه فقط سواء اتسع لاداء غيره من غير جنسه ام لا مثال صوم رمضان ما ينفعش تصوم فى رمضان صيام الواجب وصيام تطوع نتكلم عن مثال الحج
عندى الحج له ثلاث صور : الافراد , التمتع, القران بين الحج والعمره
يبقى لو هتؤدى واجب الحج مفردا ..يبقى هنا مضيق فى وقته لا يتسع لاداء غيره من جنسه
ولو هتؤدى الحج مقرنا يبقى هنا الحج اصبح واجب موسع فى وقته لانه يتسع لاداء الحج واداء غيره من نفس جنسه وهو العمرة
اما صوم الكفاره فهو ليس مثله بل هو واجب مطلق عن القيد بوقت معين يمكنك تأديته فى اى وقت ..وقد تقول انه اثناء الكفاره قد استطيع ان اؤدى كفارة اخرى او اى عبادة اخرى فهنا هذا القول باطل لان الكفارة ليس لها وقت اصلا حتى نقول انها تتسع لغيرها معها ام لا
كفاية عليك كده ..اجرى صلح الماسنجر ومتنساش تسلملى على احمد الصباااااااغ

الباحث عن الحقيقة said...

الزميل الاستاذ ابو مفراح
تشرفت بزيارة زميل مهنة اهلا وسهلا بحضرتك

.............

الاخت / مروة الزارع
اشكرك يا فندم على تشريفك الكريم للمدونة
وشكرا على اعجابك بما نكتبه والحمد لله ان المعلومه وصلت للناس بسهوله
جزاكم الله خيرا

الباحث عن الحقيقة said...

الاخت مجداوية
رد خاص اهو يا فندم علشان خاطر حضرتك
وانا اسف النت كان تعبان عندى جدا لدرجة انى ارسلت الموضوع الجديد بعد ما كتبته ومقدرتش اشوفه نزل فعلا ولا لا إلا تانى يوم وقرأت تعليقكم وشكرا لحضرتك على المتابعة
بس انا شايف ان الفونط حجمه عادى مش صغير ولا حاجه ..عموما هحاول اكبر الخط بس هو عندى بيظهر كبير فعلا اخاف السطور تدخل فى بعضها
ومتنسيش حضرتك شباك رقم تلاته
ايوه ادفعى المصاريف هناك شباك رقم تلاته ..بس استنى لما ألف واجى اخدهم منك
وانا تحت امر حضرتك فى شرح اى مسألة تقابلك فى ما اذكره هنا او فى اللى حضرتك بتدرسيه فى المعهد
وجزاكم الله خيرا

MKSARAT - SAYED SAAD said...

صديقي العزيز
جزاك الله خير عنا
ربنا يوفقك
تحياتي
سيد سعد

عين فى الجنة said...

الله ينور عليك يا استاذنا والله كلامك مختصر مفيد
بارك الله فيك

ياسر شمس الدين said...

يا بن حجر انا اعتذر لك على ما اعتبرته استهزاء منى فى حقك وهذا والله مالم اكن اسعى اليه ولكنى اعتقدت انك ستفهمنى وانا اعتذر اذا كان اسلوبى لم يعجبك فنحن اولا واخيرا اخوه
واما موضوع الناصريه وغيرها فسيكون لنا نقاش اطول باذن الله
لكن المهم دلوقتى ان انت ما تزعلش وباعتذرلك مرة تانيه وبقولك ان انته فهمتنى غلط
ويا ريت تقبلنى صديق ليك
والسلام عليكم

آفاق الحرية said...

السلام عليكم
جزاكم الله خيرا
بس انا والله دفعت المصاريف
ده حتي بقت 150 جنيه بعد ما كانت 77 جنيه السنة اللي فاتت
واضح ان مدرستك غالية اوي

ammola said...

السلام عليكم
..........
شرح مبسط وطيب ربنا يكرمك عليه
عندى سؤال حضرتك..سيادتك قلت ان الحرام لغيره يمكن ان يكون محلا للتعاقد ولكن يقع على المتعاقدين اثم ما حسب الحالة..طيب سعادتك احنا ممكن نطبق الكلام ده على ادوات التجميل وملابس المتبرجات؟؟يعنى انا ممكن ابيعها وهى حلال فى ذاتها بس الاثم يقع على الست الوحشة اللى حتسىء استخدامها؟الله يكرمك خد عندك كمان المايوهات والملابس الرياضية ممكن اللى تشتريها تلبسها فى بيسين او جيم خاص بالنساء او تستعرض نفسها فى جهنم ان شاء الله لما ربنا ياخدها هل انا يبقى عليا وزر لو بعتهالها؟ومش معقول كل واحدة حاقولها اعترفى يا بنت انتى حتعملى ايه بالحاجات دى.
نرجو سرعة الرد والافادة افادكم الله
سلامى الكبييييير لابن حجر وسؤاله كان بيبين انه طالب عايز يفهم معلش ابقى طول بالك عليه ده بيشتغل علشان يصرف على نفسه ويكمل علامه
:)

الباحث عن الحقيقة said...

الاخ الكريم / سيد سعد صاحب محل مكسرات
اشكرك يا فندم لتواجدك وتعليقك الطيب الكريم
جزاكم الله كل خير
وشكرا للمتابعة

..............

الاخ العزيز / راجي
منورنا بابتسانتك الجميلة انا شفت صورتك ماشاء الله .شكرا على الزيارة
ربنا يكرمك يا رب ويخليك لينا

...............

حدوته مصرية
انا من رأيى تشتكى ابن حجر فى القسم وانا هشهد معاك

الباحث عن الحقيقة said...

الاخت / افاق الحرية
يعنى كل حاجه تغلى ..إلا العلم
احنا عايزين ناكل عيش
وبعدين انا بجرى على ابن حجر ..عايز اجهزه علشان ألاقى وحده ترضى بيه وتريحنا من غسيله
ثم ان 150 دى لسه ناقصه ..فاضل 300 جنية ضريبة ملاهى

............

الاخت الكريمة / اموله
حتشبسوت سابقا
بالنسبه لسؤال حضرتك ..شوفى سيادتك زمان وانا صغير ..غير انى كنت بحلم ابقى كبير وادخل كليه حربية وألاقى انجى وكده ..قريت كتاب صغير لفتاوى الشيخ الشعراوى ..كان فيه سؤال عن : هل يجوز للمرأة تقصير شعرها ؟ وكانت الاجابة نعم ان رأت فى >لك زينتها
فانا قلت ازاى وليه وكيف واين ومتى طب والتشبه بالرجال ومش عارف ايه؟ بعدين قلت يا واد طب هى هتتزين لمين؟؟لزوجها طبعا ده حسب الاصل يعنى ..يبقى هنا كل زينة للزواج مباحه
فلو اللى هتبيع ادوات التجميل ليس عليها ان تتحرى فيما سوف تستخدمه اللى بتشتريه لان الاصل ان تتزين الزوجه لزوجها ..واللى بتبيع مايوهات ليس عليها التحرى الست دى هتلبسه فى انهى داهية وقدام انهى مصيبه
فبيع ه>ه الاشياء من حيث الاصل مباحة ..لكن لو كنت هتبيع ادوات تجميل لست داخله عليك متبرجه اصلا فى الشارع يبقى هنا عليك اثم انك يسرت لها فعل الحرام ..فتكون كما لعن فى الخمر عشره منهم حاملها هنا يكون البائع فى الحالة دى زى حاملها بتاع الخمر
فالبيع هنا صحيح يعنى اللى خدت ادوات التجميل تلتزم بدفع الثمن ..والقاضى المسلم يقولها ادفعى تمنه ..بعكس لو واحد باع خنزير القاضى المسلم يقول ليس على المشترى دفع الثمن لان الخنزير محرم وليس اهلا للتعاقد
الخلاصة علشان ما اطولش على حضرتك
ه>ه فى الاصل بيوع مباحه ..ولكن بيع مباح كثر استخدامه فى الحرامه تركه اولى ..وه>ا يستفاد من قوله تعالى فى الخمر : واثمهما اكبر من نفعهما ..فيستفاد من الايه ان ترك ما كان ضره اكبر من نفعه اولى من الفعل
وان كان التحرى فى بيع المايوهات صعب لكن ما>ا يفعل من يرى سيدة متبرجه داخله عليه وعايزه تشترى ادوات تجميل؟؟ طبعا البيع صحيح لانه يبيع مادة مباحة وليست حرام ولكن الشخص المباعة له يستخدمها فى حرام ..وهو هنا يكون البيع صحيحا ولكنه عليه اثم من يعين على الاثم يقول تعالى ولا تعاوانوا على الاثم والعدوان
و>لك كمن يبيع العنب لمن يعصره خمرا ..البيع صحيح يلتزم فيه المشترى بدفع الثمن ولكن عليهما اثم فالبائع يعين على حرام والمشترى يستخدم فى حرام والاولى كان عدم البيع
وليس معنى ان البيع هنا يترتب عليه اثاره ان الفعل مباح وليس عليه اثم ..بل فقط الاسلام هنا بترتيب الاثار على البيع يضمن ان يحصل البائع على مقابل ما اعطاه لمن اشترى منه ويضمن ان يحصل المشترى على السلعة مقابل من دفعه
يا رب يكون واضح ..رغم انى حاسس انى انا تهت
منوره يا حتشبسوت سابقا
اخوكم / تحتمس سابقا

ammola said...

جزاك الله خيرا كلامك واضح وجميل
بمناسبة عيد ميلاد مدونتك ان شاء الله ابقى اجيب حرف "ذال"بدل اللى عامل لك مشكلة ده
:)
مافيش توهان ولا حاجة بجد الله يفتح عليك

الـسـيـدة نـون said...

هييييييييييييييييييييه
فهمت
يا جدعاااااان
انا فهمت الدرس النهاردة
هييييه هيييييه
لولولولولوى
بجد
يا معلمى الدرس النهاردة كان جميل والامثلة اللى انت ضربتها كانت كويسة علشان فهمتنى اكتر انت تقصد ايه
بجد يعنى ربنا يكرمك يارب
وعجبنى اوى الاعلان اللى فى النص ده
هههههههههههههه
اصل انا كنت عايزة اروح اعمل بىبى ومستنية اى فاصل علشان ادخل الحمام

لا بجد يعنى انا النهاردة مستكنيصة من الدرس اوى
تسلم ايدك
بس ممكن تبقى تكبر الخط شوية
انا وشى لزق فى الشاشة
تحياتى ليك
ولابن حجر

سلام
اختكم خيخة

الباحث عن الحقيقة said...

اموله
بجد فاجأتينى
اصل انا قريت ردى تانى برضه تهت مش عارف ليه بس بجد كان عندى صداع جامد وقتها يمكن ده السبب
وعيد ميلاد المدونة عشرين يوليو
بس ممكن تجيبى الحرف من اسبوعين فاتوا بمناسبة عيد ميلادى انا اول مارس

...............


البت خيخه واى كلام

لولولولولولولولى
بجد انا فرحان علشانك اوى عقبال يا رب ما تاخدى الابتدائية
وان شاء الله تكونى مستكنيصة معانا ديما
مستكنيصه دى حاجه حلوه صح؟؟
شدى حيلك انا عايزك تطلعى الاولى كل مره
ايه ده سايبانى ورايحة فين ..الحمام برضه
يييييييه بطلوا الحاجت اللى بتاكلوها دى

Soul.o0o.Whisper said...

إيه دا ؟؟؟؟؟

مش ممكن ، فهمت الدرس الحمد لله
لا مش ممكن
أنا كنت خايفة و قلت درس المرة دى و درس المرة اللى فاتت

هيييييييييييييه هيييييييييييه

لا و كمان فهمت اللى قلته لابن حجر و أموله ،
إيه دا يا جدعان
التركيز حلو والله

أستنو كدا لما أروح أذاكر الدرس اللى فات ممكن أفهم

يمكن العيب فى الصداع فعلا

متشكرين يا معلم أبو البواحث
مش عارفة أودى جمايلك فين والله
و آسفة على التأخير



آه بالحق
ياللا صدقة جارية على روحى خدوها أهى

اللى بيظهر عنده الخط صغير يجرب الوصفة دى
يضغط
ctrl
مع علامة
+

و أبقوا قوليلى النتيجة
سلام يا زملائى الأعزاء

Soul.o0o.Whisper said...

آه معلش نسيت أقولكم

تضغطوا علامة +
مرة واحدة بس
أحسن بعد كدا هتلاقوا الصفحة بقت كلمة واحدة

فى الحالة دى تضغطوا
ctrl
مع علامة
-

أراكم أمس
- إقتباس من معلمنا

الباحث عن الحقيقة said...

دكتوره ايمان ..صوت نفسها
يا هلا يا هلا
وانا اقول مين هيمسح السبورة ..مين هيروق الفصل
مين هيغسل الكوبايات فى الاستراحة
كنت قاعد مستنى اى حد ييجى متأخر
ومفيش حد متأخر غيرك
يادى الهنا والسرور
قلتى ايه حضرتك ..ناخدك غياب ونجيب العصاية ..ولا تمسحى السبورة وتروقى الفصل وبعدين تدخلى على الاستراحة تغسلى الكوبايات ؟؟؟
انا شخصيا بقول العصاية
انما انتى حره طبعا
والدرس اللى فات كنتى بترفعى ايدك وتقولى فاهمه وانتى اتاريكى مكنتيش مركزه
كده لازم انزل من درجات اعمال السنه
وشكرا على التبرع الكريم بتاع كنترول و+ ..بس دى صدقه جارية حاف كده ..مفيش قرشين نجيب بيهم غموس نغمس بيهم الصدقه دى
مااااااشى
انتى دفعتى الرسومولا لسه؟؟

الباحث عن الحقيقة said...

ايه ده
جربت ومانفعش
الكلام ده لو بتكتبى فى ملف ورد يا ايتها التلميذه النجيبه
العصاية يابن حجر بسررررررعة

ابن حـجـر الـعـسـقـلانـى said...

أنا شكلى كدة هاجيب العصاية و اضربك بيها يا باحث ... عشان وصفة الدكتورة إيمان وصفة سليمة و بتشتغل مع الفاير فوكس .. أو الإكسبلورر الإصدار سبعة

العصاية بسرعة يا دكتورة

ابن حـجـر الـعـسـقـلانـى said...

حدوتة مصرية

أخى الكريم ... و الله لقد أثر اعتذارك فى بشكل شديد .. و والله أنا لم أكن أرجو منك أن تعتذر .. و لكن أنا فضلت فقط إنى أعبر لك عن اللى كان فى نفسى عشان لو كان ظنى خاطئ يبقى مايكونش حد فينا شايل من التانى

أخى الكريم ... بعيدا عن أى شىء .. أنا أرجو أن تسامحنى إن كنت قد تسببت لك فى بعض الضيق أو الحرج ... بجد بجد .. أنا آسف

الباحث عن الحقيقة said...

اعتقد يابن حجر تروح توصل اعتذارك للراجل فى مدونته
لان تعليقه هنا قديم زمانه فقد الامل في انه يتابع علشان يشوف تعليقك
وخلاص لازم تفضحنا يعنى وتقولهم انى معنديش فايرفوكس او حتى الاصدار السابع من الاكسبلورر
بجد الجهاز عندى بيمر بوقت عصيب جدا
ربنا يستر

الساحرة said...

دايما اجي متاخرة

بس النهارد ة الوصفه سهله الوصفه هايله

بجد شرحك مبسط وفهمت والحمد لله ولو ان

ابوالعساقيل كان عامل دوشه وهو بيبع في الاستراحه هي المشروبات اجباري
مش كفايه مصاريف المدرسه

الباحث عن الحقيقة said...

الساحرة
وافرضى يعنى جيتى متأخره
عادى
الجردل والمقشة ونضفى الفصل
يلا شوفى شغلك وإلا
الفلكة يا جابر

الساحرة said...

هو التنظيف ورايه ورايه
ازوغ احسن من المدرسه

عصفور المدينة said...

السلام عليكم
بارك الله فيك اعذرني على التأخير لانشغالي
جزاك الله خيرا

آفاق الحرية مش أخت ده أخ زي الورد يعني طول بعرض واسمه محمد

دايما كاسفني كدة

رفقة عمر said...

اسفه عن التاخير بس كان عندى ظروف مش بادخل النت نهائى
بجد موضوع جميل جدا واستفدت منه جزاك الله كل خير وجعل كل كلمه فى ميزان حسناتك اللهم امين يارب العالمين

مجداوية said...

ايه ده هو فيه اضراب فى المدرسة كمان ولا ايه ,,,طيب والمصاريف بعد ما دفعنا تاخدوا الفلوس وتهربوا لسويسرا ولا ايه ؟؟ فين الدروس يا أستاذ هى الدروس مرة فى الشهر ؟؟؟

بنت أبيها said...

جميل بجد

ربنا ينفع بيكم

اللى استفدته التقسيم والفرق لان الامثلة كلنا عارفينها

جوزيت خيرا

momken said...

ماشاء الله

فعلا درس مهم
الفرق بين فرض العين وفرض الكفايه مهم جدا
لان ناس كتير بتخلط بين الفروض

ياريت الدرس القادم يكون عن الولاء والبراء
ولا هتخاف؟؟؟؟

جزاك الله خيرا
وجعله علما ينتفع به ولا ينقطع اجره الى يوم القيامه

تحياتى

bastokka طهقانة said...

جزاك الله خير

Anonymous said...

ربنا يكرمك يارب ويجعله في ميزان حسناتك

حجات كتيره اوي مكنتش فاهمها اوي فهمتها هنا

صيد الخاطر said...

السلام عليكم ياهندسة
معلش اخي الحبيب معلقتش ولامريت عندكم من زمان

بورك فيك ونفع الله تعالى بقلمك

لكن
لاتحرمنا من مواضيعك الفكرية الاخرى
فانها رائعة تثري الفكر

بنت الصالحين said...

الدرس الجديد فين

فييييييييييييييين
فييييييييييييييييييييييييين

ايه ده احنا دفهنا المصاريف
والاداره عندكم مش كويسه
المدرسان اللي حيلتكم مش بيحضروا ومش منتظمين
ايه ده نسحب المصاريف ولا ايه
:))))

صبرني يارب said...

بصوا انا هامسك فى خناق كل الناس الى هنا الى يعرفوني ومش بعتوني هنا من زمان
أول مره اجي هنا يا بن حجر وان شاء الله مش اخر مره
وربنا يجعله فى ميزان حسناتك
واول واحده شوفتها هنا واتكعبلت فى المدونه بتاعتك عندها هى خيخه وهاتتقطعي يا خيخه عشان مش شاورتيلى على المدونه
ما قريتش الا بوست واحد بس ان شاء الله هاتوغل بقى سبوني

صبرني يارب said...

ما كنتش اعرف ان الصحيفه بينكم انتم الاثنين بن حجر والباحث
المهم شكرا لكم انتم الاثنين وربنا يجعله فى ميزان حسناتكم

the movie fitna said...

don"t miss the great movie
Please support this film on youtube

Unknown said...

ارجوكم تراعوا ضعاف النظر من امثالي وتكبروا الخط
!!!!!!!!!!!!!!
:)

الباحث عن الحقيقة said...

كل الاخوة والاخوات اللى شرفوني
اشكركم من كل قلبي والله
وانا اسف جدا على تقصيري معاكم ارجوكم اعذروني
ربنا يباركلي في قلوبكم
وارجوكم متنسونيش من دعواتكم
اخوكم احمد الباحث