Friday, April 4, 2008

الدرس الثالث: الفرق بين ..المكــروه والحـــرام


بسم الله الرحمن الرحيم
الله المستعان
انا كبرت الخط اهو علشان محدش يبقى له حجة
نكمل سوا ان شاء الله الدرس التالت من دروس اصول الفقة
زى ما قلنا هنتكلم بأختصار ..علشان نقدر نوصل المعلومه المهمة لاكبر عدد من المشاركين
نتوكل على الله
نربط الاحزمة ..نواصل الانطلاق في رحلتنا الجوية رقم تلاته
فاكرين فى الدرس الاول اتكلمنا في نهايته ازاى افرق بين الواجب والمندوب
لان كلاهما بيأتي بصيغة الامر : أفعل؟

وقلنا فيه قاعدة بتقول الامر يفيد الوجوب ما لم توجد قرينة تصرفه الى مراد اخر
يعنى الندب او الاباحة
هنا ممكن حد ظريف يسأل هو ممكن الامر يبقى معناه الاباحه مش الوجوب او حتى الندب؟
نقول ايوه لان فيه قاعدة شرعية بتقول : الامر بعد الحظر يفيد الاباحه
مثال الحديث : كنت نهيتكم عن زيارة القبور ألا فزوروها
فزيارة القبور مباحة لان الامر بها ورد بعد حظر يعنى كانت ممنوعة
وافكركم بمثل سريع لما قلناه عن التفرقة بين الواجب والمندوب
يقول تعالى : يا ايها الذين امنوا اذا تداينتم بدين الى اجل مسمى : فأكتبوه
الامر فأكتبوه ..قلنا لا يفيد الوجوب او الالزام والحتم ..وانما هو مندوب يعنى غير ملزم او حتمي
والمندوب ما يثاب فاعله ولا يعاقب تاركه
وعرفنا انه مندوب من قرينة ..هى قوله تعالى في نفس الاية : فإن امن بعضكم بعضا فليؤد الذي اؤتمن امانته
يعنى اذا وجدت الامانه فخلاص تكفي الامانه وليؤد الذي اؤتمن امانته
.........
دلوقتى هنتكلم ازاى افرق بين المكروه والحرام؟؟
نذكر الاول بمعنى كلا من المكروه والحرام
المكروه هو : طلب الكف عن الفعل طلب غير جازم يعنى على غير وجة الالزام والحتم
الحرام هو: هو طلب الكف عن الفعل طلب جازم ..يعنى بوجه ملزم او حتمي
الاتنين الصيغة الغالبة او الاشهر لهما هى صيغة النهي : لا تفعل
ولكن الحرام قد يأتي بصيغ اخرى ذكرناها مثل الاجتناب او نفي الحل : لا يحل ..او التوعد بالعقاب
او لفظ التحريم نفسه مثل: حرمت عليكم الميتة ..زى ما وضحنا الدرس السابق
والمكروه يأتي باكثر من صيغة وممكن يأتي بصيغ زي اللى بتيجي في الحرام ..ما عدا لفظ التحريم
لكن تأتي بلفظ كره مثل الحديث : ان الله حرم عقوق الامهات ووأد البنات ومنعا وهات ..
وكره لكم ثلاث قيل وقال وكثرة السؤال واضاعة المال
وبالتالي لازم اعرف ازاى افرق بينهم..لان العبرة هنا بالقرينة التى تصرف المعني المراد من التحريم الى الكراهة

اما عن كيف نفرق بينهم ؟ ..نقول
القاعدة هي : النهي يفيد التحريم ما لم توجد قرينة تصرفه الى مراد اخر
وزى ما قلنا فى الفرق بين الواجب والمندوب ان القرينة نوعين..هنا كمان القرينة نوعين قرينة منصوص عليها وقرينة غير منصوص عليها او تستفاد من خارج النص
نقول مثال
يقول تعالى : يا ايها الذين امنوا لا تسألوا عن اشياء ان تبد لكم تسؤكم
النهى هنا : لا تسألوا ..هل يعنى ان السؤال عن كل ما لم يرد بشأنه حكم شرعي حرام؟؟
الاجابة : النهي في الايه يفيد الكراهة مش التحريم
ليه يا عم الحج مش ده نهي اهو؟؟
ايوه نهي بس فيه قرينة ..والقرينة دى منصوص عليها وهي فى نفس الاية
يقول تعالى : وان تسألوا عنها حين ينزل القرآن تبد لكم . سورة المائدة ايه 101
فلو كان السؤال حرام ..لم يكن مكنش يبقى جائز حين ينزل القرآن
يبقى معنى كده ان السؤال عما لم يرد بشأنه حكم شرعي مكروه .. لكن اذا نزل فيها قرآن او حكم شرعي جاز السؤال عنه
هنا القرينة اللى عرفنا بها ان النهى للكراهة مش التحريم منصوص عليها
دلوقتى هنقول مثال ازاى نفرق بينهم بقرينة غير منصوص عليها ولكن عرفناها من خارج النص
مثال
قال رسول الله صلى الله عليه وسلم : دع ما يريبك الى ما لا يريبك
النهى هنا : دع اى اترك ..ما يريبك ..يعنى ما كان محل شك
النهي ده ..هل يعني ان كل شئ محل شك يبقى حرام ويجب انى اتركه ؟؟
قالوا : لا ..النهي هنا يفيد ان فعل المشكوك فيه مكروه ..وليس حراما
طب عرفنا ازاى انه مكروه مش حرام؟
قلنا لازم تكون فيه قرينة ..والقرينة هنا غير منصوص عليها ..عرفناها من خارج النص وهى قرينة العقل والمنطق
فالشئ المنهي عنه مشكوك فيه ..يعنى مش متأكدين هل هو حرام ..ام حلال
فكما يحتمل الخطأ او الحرمة يحتمل الصواب ايضا او الحل
وراجعوا الدرس الاول فى نهايته هتتذكروا كيف افرق بين الواجب والمندوب؟
................................
استراحة كالعادة علشان تنفعوا الكانتين ..انا سمعت ان فيه ناس مش بتشتري
وفيه ناس بتغالط في الحساب ..شكلي لازم اشد عليكم اكتر من كده
انا عارف ان زميلي ابن حجر كان مدلعكم في الاستراحة
..........................
عدنـــــــــــــــــــــــــــــــــــــــا
ونقول الجرس ضرب .. هنتكلم الدرس القادم عن الفرق بين الفرض والواجب
والفرق بين الكراهة التحريمية والكراهة التنزيهية
انتظرونا ومحدش يزوغ ..هنعمل جدول حضور وانصراف بعد كده وهنكهرب السور ادينى حذرت
ملحوظة : اسيبكم مع الموضوع ده في الاستراحة الدنيا ربيع والجو بديع ..ربنا يستر اعتبروها وجهة نظر

19 comments:

عاشقه الفردوس said...

انا جيت اهو

واول واحده في الفصل كمان


هسمع الدرس بقي واجي اقول اللي مش فاهماه

عاشقه الفردوس said...

فهمت فهمت
الحمد لله

كنت بسمع قبل كده كلمه قرينه خصوصا من واحده ربي يهديها كانت دايما تحرم وتحلل وتقول قرينه
وتحرم وتحلل في اساسيات او في ثوابت
ازاي
معرفش
:(


لحد ماكلمتها 0وهي في التلفزيون طبعا ) وقلتلها نفسي اعرف ايه قرينتك في كل حاجه دي
ومكنتش فاهمه قرينه يعني ايه


فهمت بقي دلوقتي

جزاكم الله خيرا في ميزان حسناتكم باذن الله




تكهربولنا السور؟!!!!!!!!!
طيب المدرسين اللي بيتاخروا عن المواعيد هيتعمل فيهم ايه
هنكرشهم من المدرسه
:))))

مجداوية said...

السلام عليكم أخى الكريم واستاذنا الفاضل
طيب أنا دلوقت بأضحك ازاى يجتمع العلم فى الدين والضحك
طبعا أخى هذا قمة النجاح ونرد به على المتزمتين واللى فاكرين الدين انك تكون مكشر وتزعق وبس ..لأن الدين يسر وتستطيع توصيل المعلومة فى جو من المرح البرىء بل انه هنا أصبح ميزة وبيشجع على الحضور والشراء من الكانتين وعدم النط من على السور ,,,أضحك الله سنك ,,والله أخى فى المعهد هناك أناس مثلك يعطونا العلم فى العسل دائما فنتذوقه متلذذين وهناك منهم من يجعلك تتمنى فعلا أن تنط من على السور لضيق أفقهم ومنهم دكتورة وهى وبلا شك ذات علم غزير وتحترم من أجل علمها لكن تقول احنا جينا هنا نتدبر القرآن وأى حد عنده سؤال يتفضل ولو رفعت ايدك تقول على طول لو سمحتم مش عايزة حد يقاطعنى يعنى عايزة تجننا منين جايين نتدبر ومنين مفيش أسئلة !!! وأيضا هناك بعض الأخوة الدارسين علمهم قد يساوى علم الدكاترة ولا اعلم لماذا هم ملتحقون بالمعهد الا لسبب واحد هو كتم النساء هناك وبيتعاملوا معانا كأننا شيطان رجيم ومنهم أخ قال وهو يخطب فينا والنساء والعياذ بالله وكررها ثلاث مرات !!! بس اختك مسكتش فقولت له هو احنا بقينا شيطان بتستعيذ مننا واعتذر وقال انها ذلة لسان لكن فى الحقيقة هم يتعاملون معنا من هذا المنطلق واننا سبب شرور الدنيا وعندهم حق لكن الطريقة والاسلوب قد تجعل العاصى مؤمن والعكس ايضا ,,وأنت ربنا يبارك فى عمرك اسلوبك جميل وسهل وميسر ودمه خفيف فلا تغيره بالله عليك وجزاك الله عنا كل خير أعتذر للاطالة لكن أنا سعيدة بالحضور الى هنا بس ابقى وطى السور شوية هههههه ,,بجد مدرسة واحة القلوب

الباحث عن الحقيقة said...

الاخت / عاشقة الفردوس
اهلا باول تلميذه تحضر بدري
ايه الشطارة دى ..ربنا يستر ..لا وكمان فهمتي
خير خير ..فيه امل اهو
جزاكم الله خيرا على حضوركم الكريم
وبخصوص القرينة
اولا معنى القرينة هى من قرنت الشئ بالشئ اى جمعتهما
ولذلك سمي القرآن قرانا لان اياته مقرونة الى بعضها
يعنى مجموعه ..يقول تعالى ان علينا جمعه وقرآنه ..فاذا قرناه فأتبع قرآنه. صدق الله العظيم
والقرينة تستخدم كدليل في قواعد الاثبات ..لكن غالبا تستخدم في النفي لان الاصل فى الاشياء الاباحة والاصل فى الامر انه للوجوب والاصل فى النهى انه للتحريم ..لكن اذا اقترن بالامر قرينة او حدث سواء فعل او قول ينفي ذلك الاصل فهنا نحكم بغير الاصل استنادا الى القرينة التى نفت ان يكون المراد بالشئ هو اصله من الوجوب او التحريم او الاباحة
وبعدين تلفزيون ايه خليكى دايما على قناة الكاشفة واوعى تغيرى المحطة

مهندس مصري said...

بجد استفدت
الله ينور عليك

الباحث عن الحقيقة said...

الطالبة / مجدواية
اولا حضرتك اخت كريمة .وستاذتنا كلنا
فبلاش استاذنا دي خلي البساط احمدي كلنا اخوة بنتعلم من بعض ومع بعض
بصى حضرتك خير الامور اوسطها
لا افراط ولا تفريط
فكل من الافراط في الشئ والتشدد فيه هو ميل عن الوسطية ..وكذلك التفريط
وهذا الميل سواء الشخص المنحل او الشخص المتشدد المتزمت كلاهما مريض نفسيا
واحد مريض بالاباحية التانى سيكوباتية
وبخصوص طريقة التدريس فعلا فيه ناس بيبقى عندها علم غزير جدا ..بس للاسف مش بتعرف توصل المعلومه ..واحيانا بتخلى الناس تمل بسرعه وممكن تكره الدرس
مش عارف بصراحة الجماعة دول نحل مشكلتهم دى ازاى ..بس اعتقد انهم محتاجين دروس فى فن الالقاء والتحدث وجذب المستمع
ممكن تنصحيهم بكتاب كيف تكسب الاصدقاء وتؤثر فى الناس لديل كارنيجي
وعموما حضرتك اذا فيه مسألة او سؤال محيرك او موضوع مش قادرة تستوعبيه بسبب صعوبة طريقة الشرح انا تحت امر حضرتك ان شاء الله
وربنا يبارك فيكم وشكرا لتشريف حضرتك

الباحث عن الحقيقة said...

مهندس مصري
شرفتني جدا بزيارتك واشكر حضرتك على زوقك الكريم
تقبل تحياتي الاخوية

فارس عبدالفتاح said...

سلام عليكم ورحمة الله وبركاته

على الاخوة اللى بيسألوا على اخوانهم المواطنين


لكن خلينا انا الوحشين


تقبلوا كل الاحترام والتقدير

للاخ عصفور المدينة والاخ ابن حجر والاخ الباحث وكل الاخوة الاعداء

سلام عليكم عشان انا بخش النت سرقة اليومين دولة وبعدين هفضالكم يا اخوانا

موطولش عليكم

الباحث عن الحقيقة said...

اخويا وحبيبى وابو البلديات وابو عمو
لا يا عم احنا الوحشين
وتحديدا ابن حجر ههههه
معلش اعذرنا احنا متغبيبن اليومين دول وشبه منقطعين عن التدوين
انما ان شاء الله نعاود نشاطنا بشكل طبيعى
الف شكر يابو الفوارس على تشريفك وحضورك

الساحرة said...

ايه النشاط دة
انت بتدي الدرس ولا قاعد في الاستراحه

افادك الله كما تفيدنا

بس بلاش تكهرب السور

الباحث عن الحقيقة said...

يا ساتر يا رب
خمسة وخميسة
قل اعوذ برب الفلق
ازيك يا ساحره بقالنا خمس دقايق مش شايفينك
خمسه واخده بالك ..خمسه
خمسه
اهو القر ده والنق هو اللى بيخلينى اتأخر

الساحرة said...

اانت علي باب الصحيفه ولا الاستراحه

انا النهاردة قعدالك اجازة بقي ههههههههه

لما اشوف اخرتها

صبرني يارب said...

حلو اوي يا باحث تصور انا مره حاولت اشرح الكلام ده لحد ما عرفتش اشرحه حتى شكيت فى الاخر ا نى اصلا مش فاهماه .

بجد برافو عليك
ربنا يجعله فى ميزان حسناتك

بس بلاش الكهربا بقى في السور عشان الكهربا غاليه

ولو جبت سندوتشات فى الكانتين هابلغ عنك عشان السندوتشات الايام دي كلها لحم كلاب وحمير نافقه .
شكرااااااااا باحث على البوست

عاشقه الفردوس said...

الله اكبر انا كده هتحسد

وفهمت النقطه دي كمان

جزاك الله خيرا يااستاذنا

لا لا لا خلاص مش هفتح تليفزيونات
انا في المدرسه وكفايه عليا


وبعدين لازم تيجي تقولي مواضيع معلش يااستاذ ده انا حتي كنت ناويه ازوغ من مدونتي يجي شهر كده الواحد واقف في الحفظ كده مش هينفع


تقبل عذرنا ياامعلمنا
وبلاش العصايه

:)))))

الباحث عن الحقيقة said...

صبرني يا رب
انتى جاية تشكرينا على الموضوع ولا جاية توقفي حال الكانتين
وبعدين انا سمعت ان عليكى فلوس للكانتين بتاكلى ومش بتحاسبي
بعد كده هشوف شغلي ..ومحضر رسمي على طووول

..............

عاشقة الفردوس
كلاكيت تالت مره
انا بحذرك اياك تغيبي عن مدونتك ..عايز كل ما اروح ازوك ألاقي اختراع جديد
ايه رأيك افتحلك ورشة وتعملي شنط
وليه ورشة ..احنا نقعد بيهم في رمسيس احسن
شفتى موضوع الاستراحة ولا لسه ..ربنا يستر

اللؤلؤة المكنونة said...

ايه التأخير ده كله .؟؟
احنا كده مش هنلحق نخلص المنهج ولا انتم ناويينى تجيبونا فى الأجازة

الا الأجازة...... أنا بقول من دلوقتى أهو أنا طالبة طب وأكتر حاجة تهمنا فى الدنيا الأجازة ......


كالعادة ...متعة واستفادة واستزادة
جعل الله مجهوداتكم فى ميزان حسناتكم

عاشقه الفردوس said...

ماشي حلو موضوع الورشه دي

بس ربنا يكرم هات راس المال يعني قول كد 50 جنيه وملكش دعوه:)))

هروح دلوقتي اشوف موضوع الاستراحه وقع مني ازاي ده

جني said...

الأخ الكريم
الباحث عن الحقيقة
السلام عليكم
للمرة الأولى أمر على مدونتك الجميلة في هذا الخضم من المدونات السطحية .. وأعترف أنني قد فاتني الكثير وذلك لإني لازلت على أول عتبات التدوين ... وارجو أن تعتبر هذا التعليق للتعارف .. والمرة القادمة ستكون لمناقشة موضوعاتك الدقيقة ..
ويشرفني دعوتك لزيارة مدونتي المتواضعة والجديدة ( لانج ) فالمدونة في شهرها الثاني ..
لك كل التحية

الباحث عن الحقيقة said...

اللؤلوة المكنونة
اسعدني جدا حرصك على المتابعة
واسعدني اكتر انى اعرف ان اللى بكتبه بيوصل للناس وواضح
وان شاء الله المنهج كده يظهر خلص والله اعلم
.........

الاخ / جني
اسعدني تشريفك لمدونتي وزميلي ابن حجر العسقلاني شريكي في المدونة واتمنى ان تنال موضوعاتنا اعجابك
ومرحبا بك وارجو ان تقبلنا ايضا هناك ضيوفا في مدونتك
شكرا لك

.......
عاشقة الفردوس
اذا كان على خمسين جنية يبقى بسيطة
من بكره انزل استلف ..وممكن ناخد قرض من الصندوق الاجتماعي