Saturday, May 17, 2008

بدايتي كانت محاولة : تأليف قرآن

بدايتي الفكرية كانت بمحاولة تأليف (قرآن) كنت في اولى ابتدائي او تانية ابتدائي وعجبني الزخرفه اللى في كتاب الدين في سور القرآن..فقلت اما اعمل زيها
فرحت جبت كراسه مش بستعملها وقعدت ازخرف فيها زي شكل السور القرآنية ونقلت الزخرفه بدقه
وبعدين كتبت : بسم الله الرحمن الرحيم يسبح لله ما في السموات وما في الارض لانه هو الذي خلق الانسان
وبس ..لاني كنت تعبت من الزخرفه طبعا كنت طفل في اولى او تانية ابتدائي بالكتير والزخرفه وحدها اخدت ساعة
وكانت هذه هي المحاولة الاولى والاخيرة في حياتي
محاولة تفسير القرآن
تاني حاجه في مرحلة بداياتي الفكرية كانت وانا في تانية ابتدائي بالظبط . وابويا كان جايب الشيخ احمد حسين الله يرحمه علشان يعمل خاتمه فجبت كراسة وقعدت قريب من الشيخ وكان هو يقرا القرآن وانا اكتب اللي بفهمه منه
محاولة تفسير يعني ..وكنت اروح اقعد جنب ستي ربنا يديها الصحة واقعد اقرالها اللى كتبت وهي تهز دماغها
وبرضه هذه المحاولة لم تتكرر
كنت موهوب بس ما لاقتش اللي يشجعني وده نظرا لظروف البيئة المحيطة ومنظومة التعليم عامة ولغاية اليوم
...................................
نشأت بطبعي وانا احب القراءة عن فهم وعن بحث مش بحب نظام التلقين ولا التقليد
لاني اصلا ما وجدتش حد يلقني ولم اجد من اقلد عنه سواء شخص او كتاب
فجعل ذلك مواهبي تنمو بشكل لم تتدخل فيه يد بشر وهو ايضا ليست جهودا ذاتيه ولا انسب فيها فضل لنفسي ولست مغرورا ولا متعاليا حين اقول ان الفضل في ذلك هو لله - فقد عرفت في بداياتي حياة روحانية كانت هي الفتح الذي اثر في عقلي حياة روحانية متزنه وهبني الله اياها من حبي منذ كنت صغيرا للمساجد
ثم جائت مرحلة المراهقة
مرحلة النقد والاكتشاف : فقد اخضعت عقيدتي التى اؤمن بها الى النقد العقلي بدأ من الالوهية والقرآن ومحمد علية الصلاة والسلام
انتهت الى نتيجة عقلية ان الله حق وهو واحد لا اكثر وان القرآن كتاب الله المحكم المعجز وان محمد نبي كسنة الله في الانبياء واحقيته بالرسالة دون غيره من العالمين حتى تاريخنا فلم يظهر ولن يظهر شخصية مثله
ثم تعرضت لمحنة نفسية اثرت كثيرا جدا على شخصيتي هي نوع من الوسوسه جعلني مشتت الذهن فاقد التركيز
استمرت معي زمنا طويلا افقت منها لاجد فراغا مكانها فعشت وانا اشعر بغربة ذاتيه
تنازعنى ميولي الروحانية وضرورة الاتصال بالواقع لتعويض ما فات لذلك كنت في هذه الفترة عندى مشكلة في الادراك لما حولي فكنت استجيب متأخرا لما يحدث حولي لاني كنت اتعامل مع الواقع كشخص كبر فجأة ويحتاج لفواصل زمنية ليستوعب ما يدور حوله من مجريات الحياة الزمنية
استمرت هذه المحنة وعوارضها زمنا طويلا ..تعافيت بفضل الله منها ومن كثير من عوارضها
ولم يبق إلا مرحلة الاستقرار -وتأمين وسائل العيش حتى يمكنني التفرغ لميولي الروحانية الانعزالية ولكن باعتدال دون تطرف
ان ما أعيبه على الصوفيه هو انها جماعات ..فالتصوف عندي مرادف للزهد والزهد عمل فردي لان الزاهد يتقي الرياء وشبهاته ولا يحلو له انس إلا في خلوه ولا يتم وصال إلا اذا خلا ما بين المحب ومحبوبه مما سواهما فيهيمن المحبوب على حبيبه فيأخذ بقلبه وعقله وجواراحه فيصير المحب عدما ويصبح الوجود كل الوجود هو المحبوب
إلهي وسيدي ..مولاي وخالقي شكرا لانك جعلتني عبدك ..شكرا لانك سيدي
........................
على فكرة مش ده الموضوع اللى كنت عايز اكتبه
انا كنت عايز اكتب حاجه تانية خالص
ههههه
انتظروا الجزء التاني ..هوريكم بفكر ازاي
سلام مؤقت

23 comments:

la3lahakhier said...

تالف قران يا نهارك مش فايت وفى اولى ابتدائى ؟؟؟؟ ارهابى من يومك
حروح الشغل واما ارجع اقرا براحتى

الساحرة said...

تاليف قران مرة واحدة
وتفسير كمان

دة انت تخوف ارهابي صغنن هههههههه

مستنين نعرف بتفكر ازاي

مع اني حللت شخصيتك وتوقعت تفكيرك

مستنيه اشوف صح ولا لاء

خلي بالك من عقلك ههههههههه

بت خيخة وأى كلام said...

انا اول حاجة الفتها كنت فى سادسة ابتدائى
كانت مسرحية بعنوان عائلة الحاج عبد الحميد
ياااااااااااااه
كل ما اقرا المسرحية دى
اقعد اضحك على سذاجتى
كانت مسرحية هبلة موووووووووووت
هههههههههههههه
بس ان الواحد يألف قرأن دى جديدة بصراحة
مستنين الجزء التانى من حكاياتك

تحياتى ليك
اختك خيخة

رفقة عمر said...

سبحان الله ليه الواحد منا لم يلتزم ويقرب من دينه قوووى
لازم تحصله الوسوسه دى انا كمان مرت عليا وبتكون فتره صعبه جدا على النفس
الحمد لله انها مرت على خير

free heart said...
This comment has been removed by the author.
free heart said...

بدأت رحله البحث عن الله
منذ الصغر

ولله الفضل في ذلك

أحسنت

فمن وجد الله ماذا فقد ومن فقد الله ماذا وجد

الباحث عن الحقيقة said...

لعلها خير
انتى جاية تطلعي عليا اشاعات وتخلعي وتقولى رايحة الشغل
اتوصي بالعيال شويه وخدي بالك جيز فيهم مبدعين ومش لاقيين حد يشجعهم
علشان يبقوا ارهابيين ههه

***************

الساحره
اعملي فيها بقى يحيى الرخاوى
قال حللت شخصيتك قال
بس شوفتينى وانا صغنن
كنت اخوف صح
سك على المشاريب يا بن حجر

الباحث عن الحقيقة said...

بت خيخة واي كلام
ازيك يا حاج عبد الحميد
هههههه
عماله فيها العيال كبرت
وتلاقيكى كنتى متخيله حسن مصطفى بيمثلها
وبعدين انتى رأيك فيها انها هبله مووووووت
انا من رأيى اننا نحاكمك احسن
ونعدمك رميا بقراطيس الورق

*******************

رفقة عمر

اولا اشكرك على تواجدك
ثانيا اشكرك على تفهمك لهذه المرحلة وكمان انا فاهم الشئ اللى مررتي بيه
هى تجربها صحيح بتؤثر فينا كتير
لكن بتبين لنا ايضا قد ايه ربنا جنبنا وبفضله بنقدر نعدي اى محنه
اشكرك لتواجدك
وربنا يحفظكم دايما

الباحث عن الحقيقة said...

فري هارت
يا ريت تاخدي بالك من الاملاء علشان مش تحذفي ردك تاني

***********

فري هارت
وبعدين
يعنى هم كلمتين وتقعدي تكتبي وتحذفي
اعتقد هو ده سر الحياة
وهو ده سر اسمي
الحقيقة اللى ببحث عنها هي : السعي الى الله
حتى يتملك الوجد من قلبي لله سبحانه وتعالى ولا ينازعه في قلبي حب سواه

جني said...

أنا جيت بعد ما طردتني شر طردة من البوست السابق ..
ماشي طيب عندي مسالة عن الطلاق .. لا لا ما تخافش ..
أنا قلت مولانا ومن يومك ..
أما عن الزهد والخلوة فهما مطلوبان بعيدا عن الصوفية التي نعرفها طبل وزمر وطواف حول الأضرحة والنذر لغير الله والتبرك بالأموات وأختي في الطريق وأكثر من كده أن نطلب من شيخ الطريقة العون والمدد ..
لقد مررت ببعض ما مررت به في البحث عن الطريق السليم وذات يوم جائني أخ وصديق يعرض علي طريقة معتدلة ليس بها طبل ولا زمر وناس بتعبد ربها في خلوةالخ الخ وذهبت مع صديقي إلى شيخ الطريقة وكان دكتور في الأزهر علشان آخد العهد وجلست أمامه ووضع يده اليمنى على صدري ويضرب بأصابعه مكان القلب في الناحية اليسرى من الصدر كما يعتقد مع أن القلب في منتصف الصدر تقريبا المهم من ضمن الأشياء التي طلبها مني أن أفعلها أثناء خلوتي أن أتذكر صورة الشيخ وأطلب منه العون والمدد ويسمونها رابطة الشيخ ولكني ما لبثت أن فككت رابطة الشيخ ونقضت العهد ولو عرفت اسم الطريقة ليك عندي هدية قد كده ..
تعرف لقد أوحيت لي بفكرة كتابة بوست
عن تجربتي في التصوف فأنتظرها قريبا
..
بتألف قرآن دا انت طلعت جن
سلام يا مولانا

صيد الخاطر said...

لاحول ولاقوة الا بالله

يه ياعمنا

قران مرة واحدة

على كده بقى لما وصلت ستة ابتدائي
كنت عملتلك دار نشر الكتب الباحثية المقدسة
ههههههههههه

ربنا يكرمك

جميل كلامك بل رااااائع حقا والله اخي الكريم

تعرف كمان

فكرتني انت بالامام الغزالي في فترة شكه

واهم شيء في حياة الانسان ومن يمر بهذا الامر خاصة
ان ياتيه نور من الله تعالى يستنقذه

والله انا سعيد جدا بالبوست ده

ربنا يكرمك


واخيرا

اذا لم يكن عون من الله للفتى
فأول مايجني عليه اجتهاده

وان كان عونا من الله للفتي
تهيأ له في كل أمر مراده

لك خالص تحياتي
ولأخيك الكريم
ابن حجر

أبلغه تحياتي

ammola said...

عارف والله
سيرة ذاتية مبشرة
وربنا يديم عليك نعمة الحق اللى عرفته
ويرزقك الاخلاص والعمل بما علمت
عارف..انا كمان كنت عندى ميول دينية وانا صغيرة اوى يعنى تانية ابتدائى مثلا
كنت يوم اروح بالحجاب..اللى هو مجرد ايشارب عادى على زى المدرسة..بس فى حصة الالعاب اشيله والبس جيب قصيرة وتى شيرت
وبعدين اروح البس الحجاب واحضر مع الجماعة الدينية
يعنى تقدر تقول كده كان حجاب يوم ويوم
بس فى الصيف بأه...ياللا الستر أولى بأه
كنت صغيرة خااالص
ودلوقتى لما الواحد التزم ظاهريا بيتمنى مايكونش ده آخر المطاف واقدر التزم من جوة كمان
تحياتى ليك ولابن حجر

momken said...

البوست حلو اوى
وعلى فكره اغلبنا مر بمراحل شبه دى

يعنى انا فاكر انى كنت بروح المسجد فى يوم الجمعه من الساعه سبعه الصبح
هههههههههه
وعلى ماتيجى الصلا اكون زهقت وعاوز اروح
واكون جوعت اوى
وتعبت من القعده على الارض
كنت تقريبا تمن سنين
وكنا يوم الجمعه المحفظ بتعنا كان بيجمعنا من الظهر للعصر فى المسجد ويقيم مسابقات الحفظ والتلاوة

انا عاوز كل مره تيجى تكتب بوست تقوم كاتب غيره
علشان يطلع حلو كده

تحياتى

عبدالرحمن فارس - مدونة لساني هو القلم - said...

امممممممم

طب انا هستنى الجزأ الثاني

تحياتي
و
محبتي

الباحث عن الحقيقة said...

اولا اعتذر عن التأخير
لان النت فاصل ولسه راجع
...........

الاخ العفريت / جني
كفاية اسئلة في الطلاق ده حتى فال وحش يا راجل
ومع ذلك مكنش تيجي وايدك فاضية برضه سايبلى لغز
بص يا عم كل الطرق زي بعضها لها مراسم كهنوتيه بتقوم في الاساس على تقديس العلاقة بين المريد والشيخ
وللاسف هنا الامر بيكون اقرب للاله من الرسول في تعامله
لان المريدون بيعاملوا شيخهم بشكل فيه قداسة اكثر من معاملة اصحاب محمد لمحمد صلى الله عليه وسلم وقد خالفوه في حياته في قليل من المواقف حتى انه قال لعمرحين عارضه في موقف تأبى يا عمر وانا ارضاه
منور يابو السيد

الباحث عن الحقيقة said...

صيد الخاطر
والله يا استاذنا بنيجي عندك
بس حضرتك اللى كنت مش بتيجي ومع الانشغال يا دوب الواحد بيكتفي برد الزيارات
وجزاكم الله خيرا على الكلمات الطيبة
اسف النت كان فاصل فأعذرني للتأخير في الرد
واكيد سلامكوصل لابن حجر اصل هو بيحب يقرأ في صمت

الباحث عن الحقيقة said...

اموله
ما هذا الذي
خطوه عزيزه يا فندم
يشرفنا زيارتك ومتابعتك للمدونة
وبعدين تصرفك بخصوص الحجاب وانتي في تانية ابتدائي هو الاستثناء انك كنتى تفكري تلبسيه في الوقت ده كطفله علشان كده مش لازم تحسي بتقصير علشان كنتى بخلعية ولكن يجب ان تشعري بفخر لانك فكرتي تلبسيه في هذا السن الصغير
وربنا يبتكم ويثبتنا على نور الهداية

الباحث عن الحقيقة said...

ممكن
مش عارف ليه فكرتني بابن حجر
حسيت بروحه في كلامك انت طلعت روحه من ورايا ولا ايه
وبعدين من سبعة الصبح
ما شاء الله
فكرتني بزمان ايام ما كانت الجوامع بتكون مفتوحة طول اليوم
منهم لله اللى قفلوها دلوقتى اطلع متوضي واروح الجامع قبلها بربع ساعة ألاقيه مقفول افضل ألف لغاية ما ألاقي جامع فاتح
شرفتنى بزيارتك يا فندم

الباحث عن الحقيقة said...

عبد الرحمن باشا فارس
امممممم
يعنى ارد ولا استنى لما انزل انا كمان الجزء التاني
تحياتي على زيارتك
وشكرا على محبتك
ربنا يكرمك
ليه الاحراج ده
انا بتكسف

ا بـن عــمــر said...

ندعوكم لحضور حفل زفاف (ابن عمر) وذلك يوم الخميس 29/5/2008 فى قاعة الأفراح بنقابة التطبقين بشبين الكوم وذلك عقب صلاة العشاء

المستنصر بالله said...

كويس انا فكرة تاليف قران كانت فى الطفوله
لو كانت حصلت بعد كدة كانت هاتكون مشكله كبيره
ثبتك الله على الحق ونور بصيرتك وزادك من فضله

مشتاق لله said...

الحمد لله انك وصلت الي الفطرة السليمة شكرا لاتك فكرت شكرا لانك وصلت -اطمنك عن مشروعي العلمي نجح بتفوق والحمد لله ولك السلام

mony said...

انا بأه رأيي ان تاليف قرأن في الطفولة ده لا ارهاب ولا تطرف

ده اعجاب

لان الاطفال لما بتقلد حاجة بتقلدها بدافع اعجابها بيه

فسبحان حضرتك معجب بالقرأن من صغرك
و ده نور من عند ربنا


بس علي كده حفظته ولا لسه؟؟