Wednesday, May 21, 2008

ازاي تخلي ..الملائكة تحبك

ايه احساسك اول ما تسمع كلمة الملائكة؟
بتحس بصفاء وراحة وتأتي في ذهنك هالات من النور وتشعر بلهفة واشتياق
كأنه صديق عزيز كنت مفتقده وفجأة لما ذكر اسمه قدامك تذكرت كل شئ حلو متعلق في ذهنك به
النهاردة هنتكلم عن ازاي تقوي صلتك بالملائكة وتقوي علاقتك بيهم
أفتح معايا شمس المعارف الكبرى صفحة 7
ايه نسيتم تجيبوه معاكم
بسيطه
أفتح معايا كتاب الكبريت الاحمر صفحة 9
برضه نسيتم تجيبوه معاكم
ولا يهمكم
ولعوا في الكتب دي اصلا
وافتح معايا كتاب ربنا القرآن الكريم
واللى هيقول نسيته هعلقه على باب الكاشفة
يقول تعالى بعد اعوذ بالله من الشيطان الرجيم
بسم الله الرحمن الرحيم
إن الذين قالوا ربنا الله ثم استقاموا
خد بالك ده شرط العلاقة
تتنزل عليهم الملائكة
دي ثمرة العلاقة
تتنزل عليهم الملائكة ألا تخافوا ولا تحزنوا وأبشروا بالجنة التي كنتم توعدون
نحن أولياؤكم في الحياة الدنيا وفي الاخرة ولكم فيها ما تشتهي أنفسكم ولكم فيها ما تدعون
صدق الله العظيم
تلاقي في كتب العفاريت اللي ذكرناها قبل الاية علشان تتصل بجني مسلم او غير مسلم
لازمك رياضة نفسية جامده اوى ..تنعزل وتترك اهلك
تصوم اربعين يوم ولا تأكل من ذي روح
وتقعد طول الليل ترسم في دواير ومثلثات وتكتب في حروف وتدور على ساعات السعد وساعات النحس وتبعد عن الاعمال لما يكون شرف زحل في منزلة المريخ ولما يكون عطارد قريب من الزهرة ويا سعدك لو المشتري في منزلة الشمس تبقى هاصت معاك العملية ولو انت برج الحوت ابعد عن القوس ومتنساش تحسب اسم امك
المهم علشان ما نطولش
ربنا بين لنا كل شئ في كتابه العزيز
والملائكة مخلوقات الله وعلشان تنول اي حاجه في ملك ربنا لازم تنولها برضاه
ويا مصيبتك لو نولتها وانت على معصية - فولي وجهك شطر جهنم يا جميل عدل
( قل تمتع بكفرك قليلا انك من اصحاب النار)
علشان تتقرب من الملائكة لازم تعرف انت دي علاقة تبعية
يعني ايه
يعني لازم يكون هدفك الاساسي هو ربنا ..انك تقرب من الله
انك تحب ربنا
هتلاقي كل حاجه بعد كده سهله ..حتى الملائكة هي اللى هتتقرب منك مش جائزه لك ولكن انت اللى جايزه لها
فالملائكة تحب كل من هو قريب من الله
علشان كده جاء في الحديث : ما اجتمع قوم في بيت من بيوت الله يتلون كتاب الله ويتدارسونه بينهم إلا حفتهم الملائكة وغشيتهم السكينة وذكرهم الله فيمن عنده
طيب علشان تقرب من ربنا والملائكة تحبك وتكون ولي لك في الدنيا والاخره
والولي : من الولاية والنصرة والحماية
يبقى ولاية الدنيا هي : الحماية والنصرة
ولاية الاخره : هي الشفاعة
طيب كيف ننال رضا الله وحب الله
عندي شرطين بس ذكرتهم الاية
الشرط الاول : الذين قالوا ربنا
بسيطة صح؟
لا مش سهله كده اصبر على رزقك
الشرط الثاني: ثم استقاموا
ومخك ييجي في دي ويروح مقفل ويقول هو ماقلش استقاموا يعنى اعمل ايه بالظبط عايز كده واحد, اتنين ,تلاته
نوضح علشان اللى اوله شرط اخره نور
الشرط الاول : الذين قالوا ربنا الله
طبعا انت افتكرتها سهله علشان (قالوا) يعني بمجرد ما (قالوا) خلاص اللي بعده بقى
لا.. متنساش دي علاقة مع ربنا ..يعنى اول ما تقول (قالوا) يعنى تقول : ربي الله ..وخلاص كده
ان لم تكن كذلك فعلا ..يقول الله لك كذبت
سبحانه عارف كل حاجه
يبقى المسألة مش قول باللسان بس
شوف انت ربي الله يعني ايه
هديك امثله علشان البطيخة اللى فوق كتافك تفهم
فلان استاذي ..يعني بسمع كلامه
فلان مديري ..يعني بنفذ اوامره
فلان أبي ..يعنى مقدرش أخالفه
الله ربي ..يعني ....( اكمل مكان النقط)...؟
وضحت ؟؟ البطيخة فهمت؟؟
اسمع البيتين دول لابن القيم وهتفهم اكتر
تعصي الاله وانت تزعم حبه ..هذا لعمري في القياس شنيع
لو كان حبك صادقا لأطعته ..ان المحب لمن أحب مطيع

ندخل على الشرط التاني
الشرط الثاني : ثم استقاموا
هنا بقي بنتلكك..وكل واحد فاهم الاستقامة على مزاجه
الاستقامه هنا مكملة للشرط الاول بمعنى الاستقامه على طاعة الله وأتيان اوامره واجتناب نواهيه
الرجل الامي فهمها وكانت واضحه بالنسباله ومحتاجش يستفسر
جاء اعرابي الى رسول الله وقال له قل لي في الاسلام قولا لا اسئل عنه احدا بعدك ابدا
يعني انا راجل فهمي على قدي ومش بتاع علوم ولا حفظ اديني كلمتين أعمل بيهم يكونوا سهلين على اللى زيي
قال له رسول الله : قل أمنت بالله ثم أستقم
وفي رواية : قل امنت بربي ثم أستقم
والراجل زي ما سمعهم خدهم وقال يا فكيك ..لا سمعناه قال استقامه يعني اعمل ايه ..وما اعملش ايه
لان الاستقامة امر فطري كلنا عارفينه بس بنقاوح وبنوجد لنفسنا المبررات
يعني اللى بيسفه أراء غيره عارف ان التسفيه في حد ذاته فعل قبيح
اللى بتقول ان المنقبه ومش بتعمل بيه بتكون اشبه بكيس زباله ..عارفه ان ده تشبيه قبيح حتى لو كانت مش بتعمل بيه فعلا
اللى بيقول ان النبي كان علماني في حياته - قعدت اضحك - هو عارف انه بيغالط نفسه
هههههههههه قال نبي وعلماني ..بذمتكم دي جمله لها محل من المنطق
ده مش تسفيه لاراء الاخرين ده انا بقول يا شمس انتى منوره
حقيقة وواضحة اعمل ايه
كلنا عارفين ايه الصح ..وعارفين ايه الغلط مهما قمنا من مبررات
كلنا عارفين لما بنت تنزل الشارع لابسه بنطلون وفانله ( بلوزه او تي شيرت) والام ضميرها مرتاح اوي علشان فوق الفانله حجاب
يا صلاة الزين على عزيزة يا صلاة الزين- على رأي عبد المطلب
يبقى محدش يقول استقامه يعني ايه ..واضح
يبقى حققنا الشرطين : الذين قالوا ربنا الله ثم استقاموا
تعالوا نشوف ثمرة هذا العمل
الايات 30: 32 من سورة فصلت
بسم الله الرحمن الرحيم
إن الذين قالوا ربنا الله ثم استقاموا تتنزل عليهم الملائكة ألا تخافوا ولا تحزنوا وأبشروا بالجنة التي كنتم توعدون
نحن أولياؤكم في الحياة الدنيا وفي الاخرة ولكم فيها ما تشتهي انفسكم ولكم فيها ما تدعون
نزلا من غفور رحيم

صدق الله العظيم
والسلام عليكم ورحمة الله وبركاته
ابقى تعالوا كل يوم

28 comments:

ابن حـجـر الـعـسـقـلانـى said...

الله عليك يا باحث

الله ينور عليك

الباحث عن الحقيقة said...

هو انت
وانا اقول مين اللى لحق كده بسرعة ده مراقبني ولا ايه
اسكت مش الجهاز اتفرمت
قعدت اعمل اصلاح الباد سكتور بصيت يا خويا لقيت الهارد كله بقى درايف واحد
الكتب والموسوعة
شقى عمري راح
يلا حصل خير
هو العصر ادن ..امال انا ماسمعتوش ليه
سلام

وجهة نظري said...

ربنا يبارك لك، مافيش تبسيط أكتر من كده

ابن حـجـر الـعـسـقـلانـى said...

يا عم الموسوعة دى شكلها كدة نحس

انت كل ما تنزلها الهارد يفلسع .. يا عم أنا فضلت أنزل فيها تلات سنين و فى الآخر الملف نزل بايظ .. الموسوعة دى عليها عفريت

مجداوية said...

السلام عليكم
يا مستر

حتقولى ايه مستر دى
اقول دى النداء الحديث للاستاذ وعشان اكون متجددة وماشية مع العصر

المهم
الانسان سجدت له الملائكة ممثلا فى سيدنا آدم

فسجدت له طاعة لأمر الله ولكن تميز الانسان انه خليفة الله فى الأرض و
لما يملكه من علم

ولما يمتاز من قدرة على الاختيار فالملائكة مجبولين على الطاعة ليس لديهم اختيار
لكن الانسان قال الله تعالى عنه :
ونفس وما سواها ألهمها فجورها وتقواها قد أفلح من زكاها وقد خاب من دساها
فنرى مكانة الانسان عند الله وقد كرمه وأمر ملائكته بالسجود له ونرى الانسان الجاحد الناكر لوجود الله أو الذى يسجد لغير الله أو الذى يترفع عن عبادة الله أو الذى يتجرأ بغروره ويغير شرع الله
أو يجادل الله
لذا

فالعبد الطائع لله باختياره يرقى عن الملائكة فلما بنقول ده شخص زى الملاك
لأنه نورى الطباع والأخلاق بل ويشع وجهه نورا لفيض ما بداخله من خير
ووصفهم الله يوم القيامة بقوله تعالى :


يوم ترى المؤمنين والمؤمنات يسعى نورهم بين ايديهم وبايمانهم بشراكم اليوم جنات تجري من تحتها الانهار خالدين فيها ذلك هو الفوز العظيم
صدق الله العظيم


اللهم اجعلنا ممن يسع نورهم بين ايديهم
اللهم آمين
جزاك الله خيرا يا مستر على التذكرة لعلها تنفع المؤمنين

Mafrousa said...

الله يفتح عليك يا باحث
انا بقالى نص ساعه عاوزه افهم انت العسقلانى ولا انت واحد و العسقلانى واحد تانى
معلش العتب على الفهم البطييء
حلو اوى و استقيموا...الاستقامه ديه لوحدها يتقال فيها بوستات
بص يا باحث احنا فى زمن المستقيمين فيه مش كتير زى ما انت متخيل
مايغركش كم المحجبات و المنقبات و الملتحين
زمان الراجل الملتحى كنت تحس فى وجه الخشوع و النور و كانت لحيته مهذبه
و الست اللى بتبقى محجبه كنت تشوف النور كله فى وشها كانها صغرت 10 سنين
وكانت بتعمل حساب لحجابها لانه يعكس ايمانها و تقربها الى الله و ليس من المعقول ان تكون قريب من الله و تنفذ اوامره و تخالفه فى امور اخرى مثل حالنا اليوم من لو ويست و هدوم محزئه.....وبطن باينه...وصحوبيه مع الاولاد و مشى على الكورنيش فى حالة هيام .....
عايز تعمل كل ده بلاش تلبس الحجاب لان ده بيسيء لنظرة الدين بتاعك
و كذلك المنقبه
و الملتحى

انا مش بعمم لان فيه منهم ناس جميله جميله و مستنيره و فى ناس بتخالف تعاليم الدين فى السلوكيات مع الناس و السلوكيات ديه اللى بتخلى النظره للدين مش تمام
فاهم انا اقصد ايه يا باحث و لا لأ

رئـــــيسـة حزب الأحلام said...

موضوع جميل
تحياتى لك
جزاك الله خيرا

الباحث عن الحقيقة said...

وجهة نظري
ربنا يبارك في حضرتك
وشكرا لزيارتك وتعليقك اخي الكريم

*********

مجداوية
مستر مين بقى
انتي اللى مستر
شكرا على التعليق الرائع ده يا فندم
ده ينفع بوست لوحده جزاكم الله خيرا
وبلاش تغيبوا عننا اوى كده

الباحث عن الحقيقة said...

واحده مفروسة
وشكلها جايه تفرسنا معاها
يعني هكون بكتب بشخصيتين مثلا
اكيد الباحث واحد والعسقلاني ده واحد تاني ..فيه فرق في الطول
تتصوري ملاحظتك في محلها
زمان كان الناس وشها منور من التقوى والايمان
دلوقتي اللحية شبرين وما تعرفيش النور فين
بالعكس احيانا تلاقي ملامحه منفره للناس وتخلي الناس تبعد عنه كده من بعيد
زي ما قلتى حضرتك الاستقامه مش مظاهر
مش اني ابقى محجبه لكن بكدب
وبلبس ملابس ضيقه
مش كل واحد يمشي على مزاجه ويقول انا مستقيم
لا امشي على مزاج الشرع يا كابتن
علشان مش نبقى بنخدع نفسنا
شكرا يا مفروسة
ربنا ما يحرمك من د س ل

**************

رئيسة حزب الاحلام
او البتنجان
اهلا وسهلا بحضرتك
نورتي الصحيفة الكاشفة
جزاكم الله خير على التعليق والتشجيع

la3lahakhier said...

انا مش حعلق
ههههههههههههه
كل التحية

الباحث عن الحقيقة said...

وانا مش هرد
هههههههه
تلات ارباع التحية

ابن حـجـر الـعـسـقـلانـى said...

و انا ماليش علاقة بالموضوع
ههههههههه
ربعين التحية

مجداوية said...

السلام عليكم
معلش عندى سؤال لأختنا واحدة مفروسة وهو للعلم فقط
زمان اللى كانت فيه المحجبة وشها بيشع نور كان امتى الزمان ده ؟؟؟
يعنى من كام سنة ؟

الساحرة said...

من اجمل الدروس اللي شرحتها

بجدالله ينور عليك


بس انا زعلانه منك

سمعت ان في بطيخ وقعدت ادور

وقلبت الصحيفه الظاهر انت وابن حجر كلتوة


ينفع كدة هههههههههه

عصفور المدينة said...

جزاك الله خيرا
:)

الباحث عن الحقيقة said...

ابن حجر العسقلاني
وديت الكانتين فين
قعدت ادور عليك علشان تنزل بالكانتين عيل صغير قلى يا عمو انا شفته واخد نص كيلو سكر ورايح السويس عند فرنسا
وديت السكر فين يا واد

*****************

مجداوية
اسمحيلى ارد على استفاهمك الموجه للاخت مفروسة
لانه غالبا لسه تعارفنا بيها مش قوي فمجيئها هنا كان رد زياره
ويارب تتكرر
اظن الاخت رأيها ان زمان وحضرتك ست العارفين مكنش الحجاب منتشر اوى كده
فكانت اللى بتلبسه بتلبسه عن اقتناع وهي ملتزمه بمعناه الاخلاقي
انما دلوقتى حضرتك برضه زى ما بتشوفي برضه
اصبح عادة ..لانه كله بيتحجب
المتدينة حقيقي واللى لابساه علشان خاطر ماتقدرش تنزل من غير حجاب
والصنف ده هو اللى بيبقى لابس الحجاب فوق الفانله ..او البلوزه الضيقه او ...الخ
فيا تري النور هييجي منين؟
انما فيه متدينات طبعا واخوات ربنا يكرمهم الواحد من نورهم اللى بيشع منهم بيتكسف يبوصلهم خجلا وحرجا
بعكس التانية ببقى عايز اروح اقولها ليه يا انسه ؟ليه كده وايه التناقض ده
لابسه حجاب علشان تداري شعرك ومش بتداري اخلاقك وميوعة كلامك ولبسك وخطوتك
الخ
ودايما منوره يام بسمه

الباحث عن الحقيقة said...

الساحره
ازيك يا خالتي الحاجه
ههههههه
اصغر ام في عالم التدوين
ايوه خليكي هنا في دروسك وسيبي البنت تذاكر
وبعدين ما تخافيش احنا كلنا البطيخ وحوشنالك اللب
ولو عايز بطيخ ضرورى يعني
ممكن اجيبلك شقة من بطيخة ابن حجر
بس بحذرك ده اقرع

ملحوظة : خد بالك يا بن حجر وانت ماشي في الشارع اوعى تعدي جنب عربية بطيخ حرام عليك سيب الراجل يسترزق

شكرا يا ساحره ربنا يكرمك ويفرحك ببنتك

***************

عمنا
الباشا
اخيرا جناحاتك جابتك هنا
منور يا عم عصفور
وشكرا على الابتسامة الجميلة
اجمل تعليق جاني لغاية دلوقت
كلهم كانوا طمعانين في البطيخ
ههههههه
ربنا ما يحرمنا من تواجد حضرتك

الساحرة said...

قصدك انا اللي طمعانه في البطيخ ماشي


خلي بالك بعد كدة

سؤال فضولي واستفساري


وديتوة فين الفراشه مفيش عنها حس ولا خبر اوعوة تكونوة طفشتوها ما انتو تطفشوة بلد

جنّي said...

مش عارف أيه اللي بينك وبين الجن والعفاريت أنت والعسقلاوي عمال تتريق عليهم .. يا أبني أنا عملتك حاجة وحشة .. وبعدين ليه الشحططة علشان تتصل بينا .. يادوب كلك شمال هاتلاقيني في وشك طس وبا أقولك شبيك لبيك .. وبعدين اتضح ان ثقافتك المغنواتية تعبانة خالص دا اللي قال يا صلاة الزين زكريا أحمد مش عوبد ..
نكلم جد شوية يا مستر ؟ أوكي
سألت مرة شخص ما لما لا تصلي يا عم فلان فرد قائلا شوف يابيه مادام هنا نضيف ( وأشار إلى بطنه ويقصد قلبه طبعا ) ما يهمكش بقى كل المظاهر ما دام بينك وبين ربنا عمار .. ما تقليش صلاة ولحية وحجاب ونقاب المهم النية .. ولا أدري ما العلاقة بين النية وأن تمشي فتاة شبه عارية .. وما العلاقة بين من يدعي العلمانية وقلبه نضيف ونيته فللي وهو يراقص إمرأة غريبة مثلا ويعاقر الخمر .. دول ياعم الحاج لو سألتهم عن الاستقامة ها يردوا : يعني نمشي على العجين ما نلخبطهوش ..هؤلاء لهم ملائكة أيضا قال تعالى
{هَلْ يَنظُرُونَ إِلاَّ أَن تَأْتِيَهُمُ الْمَلائِكَةُ أَوْ يَأْتِيَ أَمْرُ رَبِّكَ كَذَلِكَ فَعَلَ الَّذِينَ مِن قَبْلِهِمْ وَمَا ظَلَمَهُمُ اللّهُ وَلـكِن كَانُواْ أَنفُسَهُمْ يَظْلِمُونَ }النحل33
هو الفجر أذن ولا لسه ؟
لسه طيب سلام يا صاحبي
تحياتي
said

مجداوية said...

السلام عليكم

كتر خيرك اخى الكريم المستر انك رديت عليا واهتميت بس انا سؤالى غير ما جاوبت انا فهمت كلامها وحضرتك شرحته تانى وطبعا فى الاعادة افادة والتكرار يعلم الشطار فانا فهمته جدا جدا وممكن اسمعه كمان انا سؤالى كان زمان امتى من كام سنة وهذا السؤال لن يستطيع الاجابة عنه الا اختنا مفروسة لن زمان عندى غير زمان عندك غير زمان عندها
كان عندى فضول اعرف زمان بتاعها من كام سنة
وطالما هى دخلت رد زيارة يبقى خلاص
مش مشكلة نلم الفضول ونرجعه مكانه وربنا يكرمك ويخليك ويجازيك كل خير
بنتى بتسلم عليك بس النقطة فوق مش تحت يعنى نسمة
شكرا يا مستر

Ahmed Al-Sabbagh said...

ربنا يكرمك يارب

Ahmed Al-Sabbagh said...

Ahmed Al-Sabbagh said...

إبن حجر العسقلانى


لو قولت لك ان تعليقك ده وسام على صدرى اعتز بيه مدى حياتى مش هكون مبالغ ولا مجامل
وان قولت لك انك من احب الناس الى قلبى مش هكون بتجمل

والله كلامك ده ما تتصورش عمل فيا ايه

بجد اشكرك من كل قلبى

ويارب يديم محبتى واخوتى لك لغاية اخر قطرة فى دمى

صبرني يارب said...

باحث عن الحقيقه ايه حكاية العفاريت الى كتبتها فوق دي ما علينا

حلو اوي البوست يا باشا بجد الايه دي انا كل ما اعدي عليها اقف اتأملها شويه واقول شوف البساااااطه

الباحث عن الحقيقة said...

جني بيه باشا
يا اهلا بالعفاريت

شرفتنا

بس انا مصمم انا عبد المطلب
جايز انت اقدم مني وتعرف اكتر

**************
مجداوية
اشكرك يا فندم لوجودك ومتابعتك معنا

***********

الصباغ
لك يوم يا صباغ

************

صبرني يا رب

اييييييه عاش من شافك

ها مين تاني
خلاص كده
سلامو عليكم

Mony said...

لسه انا اهه

استنوني



انا جايه اقول و ذكر فأن الذكري تنفع المؤمنين


و شكرا علي التذكرة

و ربنا يجعله في ميزان حسناتك

جنّي said...
This comment has been removed by the author.
Anonymous said...

الله اول مره اسمع ازاى تخلى الملايكه تحبك موضوعاتك كالعاده جميله ربنا يكرمك ويباركلك بعدين بتشرح بطريقه عميقه ومبسطه ربنا يجعله فى ميزان حسناتك ان شاء الله ..انا شاكره ليك زياراتك وتعليقاتك ومنقشاتك ليا جزاك الله كل خير ..فلى رعاية الله وامنه.

Anonymous said...

شوف عبد الرحمن ايده منوره على الكيبورد طلعت عايزه اتطلق مكتوبه ازاى ابنى هد المعنى..